ព័ត៌មានជាតិ

នាយករដ្ឋមន្ត្រី៖ បើគ្នានសុចរិតភាពត្រូវទទួលខុសត្រូវ ហើយកុំចោទថាយើងគ្មានការគោរពសិទ្ធិសារព័ត៌មាន

បានផុស

១ year មុន

នៅ

ថ្ងៃអាទិត្យ ៤ ឧសភា ២០២៥

ដោយ

នាយករដ្ឋមន្ត្រី សម្ដេចធិបតី ហ៊ុន ម៉ាណែត បានណែនាំដល់អ្នកសារព័ត៌មានប្រកាន់យកនូវសុចរិតភាពលើការផ្សាយ ជាការសំខាន់ និងត្រូវហ៊ានទទួលខុសត្រូវលើការផ្សាយរបស់ខ្លួន។ សម្ដេចថាគ្មានអ្វីល្អឥតខ្ចោះនោះទេ ការផ្សាយខុសយើងអាចកែតម្រូវប្រាប់អ្នកអានវិញ តែបើខុសហើយធ្វើមិនដឹងមិនឮមិនបកស្រាយនោះរដ្ឋាភិបាលនឹងមានវិធានការហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីអបអរសាទរទិវាសេរីភាពសារព័ត៌មាន និងជំនួបជាមួយអ្នកសារព័ត៌មានកាលពីយប់ថ្ងៃទី៣ ខែឧសភា ឆ្នាំ២០២៥ សម្ដេចធិបតី ហ៊ុន ម៉ាណែត បានប្រកាសថាអ្នកសារព័ត៌មានដែលប្រកាន់ជំហរ និងសីលធម៌ រដ្ឋមិនបានបំបិទសិទ្ធិនោះទេមានតែជួយលើកតម្កើនថែមទៀត តែប្រសិនជាប្រើប្រាស់ការផ្សាយដោយលើសក្រមសីលធម៌ គ្មានសុចរិតភាព មិនទទួលខុសត្រូវលើការផ្សាយរបស់ខ្លួននោះរដ្ឋនឹងវិធានផ្លូវច្បាប់ដើម្បីការពារប្រយោជន៍ជាតិ។

សម្ដេចថា៖ «អ្នកដែលធ្វើខុសព្រំដែន មិនថាអ្នកឯងអ្នកយកព័ត៌មានឱ្យបរទេស ការសែតបរទេស ឯករាជ្យ មិនឯករាជ្យស្អីទេ! ប៉ុន្ដែក្នុងទង្វើជាបុគ្គលរបស់អ្នកកុំជ្រកក្រោមផ្លាករបស់អ្នកសារព័ត៌មានឯករាជ្យហើយធ្វើព័ត៌មានដែលមិនសុក្រឹតហើយដឹងខុសហើយមិនព្រមកែគឺខ្វះសុចរិតភាព។ បើគ្នានសុចរិតភាពត្រូវទទួលខុសត្រូវហើយកុំចោទថាយើងគ្មានការគោរពសិទ្ធិសារព័ត៌មាន»។

សម្ដេចបានលើកឡើងពីគ្រោះថ្នាក់នៃការផ្សាយព័ត៌មានមិនពិតប៉ះពាល់ដល់ប្រយោជន៍ជាតិ និងប្រជាជន ដោយថាការអប់រំលើមនុស្សជារឿងសំខាន់ក្នុងការបញ្ជៀសនូវបញ្ហាទាំងនេះ។

កាលពីថ្ងៃទី២ ខែឧសភា ក្រសួងព័ត៌មានកម្ពុជាបានចេញរបាយការណ៍ស្ដីពីសេរីភាពសារព័ត៌មាននៅកម្ពុជាដោយបានវាយតម្លៃថាមានភាពល្អប្រសើរ តាមរយៈការស្ទង់មតិលើតំណាងអ្នកសារព័ត៌មានជិត៥០០នាក់ទូទាំងប្រទេស។ ក្រសួងបញ្ជាក់ថាតាមរយៈការសិក្សានេះបង្ហាញថាភាពជាម្ចាស់របស់កម្ពុជាក្នុងការគ្រប់គ្រងវិស័យព័ត៌មានដោយមានការលើកកម្ពស់សេរីភាពយ៉ាងពិតប្រាកដទៅកាន់ពិភពលោក៕