មុនឡើងជាស្នងការនគរបាលរាជធានីភ្នំពេញថ្មី តើលោក ជួន ណារិន្ទ មានប្រវត្តិការងារបែបណា?

លោក ជួន ណារិន្ទ ស្នងការនគរបាលខេត្តព្រះសីហនុ ដែលត្រូវផ្ទេរតំណែងមកបំពេញការងារជា ស្នងការនគរបាលរាជធានីភ្នំពេញ បានបំពេញតួនាទី និងកិច្ចការប្រទេសជាតិជាច្រើនសម្រាប់ជូនជាតិ។

លោក ជួន ណារិន្ទ ស្នងការនគរបាលខេត្តព្រះសីហនុ ត្រូវបានឯកឧត្តម ហ៊ុន ម៉ាណែត ផ្ទេរភារកិច្ច និងតែងតាំងលោកពីស្នងការនគរបាលខេត្តព្រះសីហនុ ទៅជាអគ្គស្នងការរងនៃអគ្គស្នងការដ្ឋាននគរបាលជាតិ កាលពីថ្ងៃទី២៣ ខែសីហា ឆ្នាំ២០២៣។ បន្ទាប់មក នៅថ្ងៃទី២៤ ខែសីហា ឆ្នាំ២០២៣ លោកបណ្ឌិត ស សុខា រដ្ឋមន្ត្រីក្រសួងមហាផ្ទៃ បានប្រគល់ភារកិច្ចបន្ថែមទៀតសម្រាប់លោក ទៅជាស្នងការរាជធានីភ្នំពេញ។

ក្នុងតំណែងរបស់លោក ជួន ណារិន្ទ ជាស្នងការរាជធានីភ្នំពេញនេះ គឺជំនួសលោក ស ថេត។ ចំណែក លោក ស ថេត ត្រូវបានតែងតាំងទៅជាអគ្គស្នងការនគរបាលជាតិ ជំនួសតួនាទីរបស់លោក នេត សាវឿន ដែលត្រូវឡើងជាឧបនាយករដ្ឋមន្ត្រី ឆ្នាំ២០២៣នេះ។ មុននឹងកាន់តំណែងនៅខេត្តព្រះសីហនុ លោក ជួន ណារិន្ទ ជាអតីតស្នងការរងរាជធានីភ្នំពេញ។ ក្រោយមក ឆ្នាំ ២០១៥ លោកបានផ្ទេរតំណែងជាស្នងការនគរបាលខេត្តព្រះសីហនុ ជំនួសលោក ស៊ាង កុសល រហូតដល់ឆ្នាំ ២០២៣។

ក្នុងរយៈពេលកាន់តួនាទីនៅខេត្តព្រះសីហនុ លោក ជួន ណារិន្ទ បានខិតខំប្រឹងប្រែងជាខ្លាំង ក្នុងការដឹកនាំបម្រើប្រជាជន និងថែរក្សាសន្តិសុខសណ្តាប់ធ្នាប់ខេត្តឱ្យមានរបៀបរៀបរយ និងសន្តិសុខល្អ។ ក្នុងនោះ មានដូចជា ការបង្រ្កាបគ្រឿងញៀន ដោះស្រាយពាក្យបណ្តឹង ការបង្រ្កាបការជួញដូរ និងប្រើប្រាស់អាវុធខុសច្បាប់ ចោរកម្ម និងករណីជាច្រើនទៀត។

ជាមួយនឹងកិច្ចការខិតខំប្រឹងប្រែង និងស្វែងរកដំណោះស្រាយឱ្យប្រជាជន និងរក្សាសន្តិសុខ នៅខេត្តព្រះសីហនុហើយ ក្នុងនាមជាស្នងការមួយរូប លោកក៏បានបន្ថែមនូវយន្តការមួយចំនួន ដើម្បីឱ្យភូមិ ឃុំ កាន់តែមានសុវត្ថិភាព។ ពង្រឹងភូមិ ឃុំ សង្កាត់មានសុវត្ថិភាព ដោយដាក់វិធានការជាក់លាក់ បង្រឹងលើការការពារចោរកម្ម ការសេព និងចែកចាយគ្រឿងញៀន និងផ្សព្វផ្សាយពីគ្រោះថ្នាក់ចរាចរណ៍ និងចូលរួមជាមួយអាជ្ញាធរគ្រប់ជាន់ថ្នាក់ក្នុងការថែរក្សាបរិស្ថាន។

ក្រៅពីនេះ លោកក៏បានដឹកនាំពង្រឹង និងជួយបង្ហាត់បង្រៀនដល់បញ្ជាការពារតាម ភូមិ ឃុំ ឱ្យយល់ដឹងពីច្បាប់ និងការជួយរក្សាសន្តិសុខតាមភូមិ ឃុំ បានកម្រិតណា។ លោកក៏បានអនុវត្ត បណ្តុះបណ្តាលមន្ត្រីដែលកាន់តួនាទី ឱ្យប្រកាន់ខ្ជាប់តួនាទី និងវិន័យនៅក្នុងខ្លួនជានិច្ច តាមជំនាញរបស់ខ្លួន។ ជាពិសេស គឺការដោះស្រាយបញ្ហាចរាចរណ៍ផ្លូវគោកដោយឥរិយាបថសមរម្យ ធ្វើយ៉ាងណាឱ្យពលរដ្ឋគោរពច្បាប់ចរាចរណ៍បានល្អ។ លោកក៏ថែមបានពង្រឹងសេវាសន្តិសុខ ដល់តំបន់ណាដែលមានទេសចរ ឬ មនុស្សរស់នៅ គឺសេវាសន្តិសុខ ត្រូវទៅដល់ទីនោះដូចគ្នា ដើម្បីជាកិច្ចការពារដល់ពលរដ្ឋ ៕