រញ្ជួយដីដ៏ខ្លាំងនៅ ក្រិក ឈានដល់ព្រមាន ពីរលកយក្សស៊ូណាមិ ខណៈ ៤ប្រទេសទៀត ក៏ប្រយ័ត្នខ្លួន

នៅថ្ងៃព្រហស្បតិ៍ទី២២ខែឧសភាឆ្នាំ២០២៥ គ្រោះរញ្ជួយដីកម្រិតធ្ងន់ ៦.១ រ៉ិចទ័រ បានវាយប្រហារកោះ Crete នៃប្រទេសក្រិក ឈានដល់ការទាញសញ្ញាព្រមានអំពីរលកយក្សស៊ូណាមិទៀតផង និងព្រមានឲ្យពលរដ្ឋរស់នៅក្នុងប្រទេសតួកគី អ៊ីតាលី បារាំងនិងព័រទុយហ្គាល់ ត្រូវប្រយ័ត្នខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ MSN ដោយដកស្រង់ប្រភពពីទីភ្នាក់ងារស្ទាបស្ទង់ភូមិសាស្រ្តអាមេរិក, រញ្ជួយដីនេះមានចំណុចកណ្តាលនៅចម្ងាយ៥៨គីឡូម៉ែត្រភាគឦសានទីក្រុង Elounda ជាមួយជម្រៅ ៦៩គីឡូម៉ែត្រ។

ដោយសារតែមានកម្លាំងខ្លាំង រញ្ជួយដីនេះធ្វើឲ្យរង្គើទូទាំងសមុទ្រ Aegean រហូតដល់ទៅផ្នែកខ្លះនៃប្រ​ទេសអ៊ីស្រាអែលឯណោះ ប៉ុន្តែភ្លាមៗ មិនមានសេចក្តីរាយការណ៍អំពីការខូចខាតនិងជនរងគ្រោះទេ។

ទោះបីជាយ៉ាងណាក៏ដោយ អាជ្ញាធរក្រិកកំពុងដាក់កោះ Crete ស្ថិតក្នុងកម្រិតប្រុងជើងការខ្ពស់ ហើយណែនាំឲ្យអ្នកកោះត្រូវប្រុងប្រៀបខ្លួនជានិច្ចចំពោះហេតុការណ៍អាក្រក់ណាមួយដែលនឹងអាចកើតឡើង និងត្រូវតាមដានការជូនដំណឹងឲ្យជាប់លាប់។

សូមជម្រាបថា ក្រិកស្ថិតក្នុងចំណោមប្រទេសអឺរ៉ុបដែលមានសកម្មភាពរញ្ជួយខ្លាំងបំផុត ដោយសារតែទីតាំងរបស់ខ្លួនស្ថិតនៅតាមបណ្តោយព្រំប្រទល់នៃផ្ទាំងតិចតូនិករវាងអាហ្វ្រិកនិងអឺរ៉ាស៊ី៕

អត្ថបទ៖ សុខ សុវណ្ណ

ចុចអាន៖ មនុស្ស​រាប់​ពាន់​នាក់​​នៅ​ក្រិក​​ត្រូ​វជម្លៀស​ចេញ​ពី​កោះ​​ Santorini ក្រោយរងរញ្ជួយដីជាង​៣០០ដង