រដ្ឋមន្រ្តីអប់រំ បង្ហាញចក្ខុវិស័យពង្រឹងគុណវុឌ្ឍិគ្រូជាប់កិច្ចសន្យាឱ្យខ្លាំងពូកែ

ដើម្បីពង្រឹងគ្រូបង្រៀនពោរពេញដោយសមត្ថភាព លោកឧបនាយករដ្ឋមន្រ្តី ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានបង្ហាញចក្ខុវិស័យ បន្តពង្រឹងគុណវុឌ្ឍិគ្រូជាប់កិច្ចសន្យាគ្រប់កម្រិតតាំងពីគ្រូមត្តេយ្យសិក្សា ដល់គ្រូឧត្តម​សិក្សា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មហិច្ឆតាពង្រឹងគ្រូបង្រៀនជាប់កិច្ចសន្យានេះ ត្រូវបានលើកឡើងនាឱកាស លោកបានអញ្ជើញដឹកនាំកិច្ចប្រជុំស្ដីពី ការជ្រើសរើសនិងការគ្រប់គ្រងគ្រូបង្រៀនជាប់កិច្ចសន្យាចំណេះទូទៅ ដោយមានការអញ្ជើញចូលរួមពីសំណាក់ ថ្នាក់ដឹកនាំក្រសួង និងមន្ត្រីមកពីនាយកដ្ឋានពាក់ព័ន្ធក្រោមឱវាទ កាលពីថ្ងៃទី ២២ ខែឧសភា ឆ្នាំ ២០២៥។ កិច្ចប្រជុំនេះ ក៏ដើម្បីដាក់បង្ហាញនូវរបាយការណ៍ស្តីពី ការប្រើប្រាស់គ្រូបង្រៀនជាប់កិច្ចសន្យាចំណេះទូទៅ និងការពិភាក្សាផ្លាស់ប្ដូរយោបល់លើវឌ្ឍនភាពនៃការងារជ្រើសរើសនិងការគ្រប់គ្រងគ្រូបង្រៀនជាប់កិច្ចសន្យា។

លោករដ្ឋមន្រ្តី បានលើកឡើងថា នាពេលអនាគត ក្រសួងអប់រំ យុវជន និងកីឡា មានចក្ខុវិស័យ បន្តពង្រឹងគុណវុឌ្ឍិគ្រូជាប់កិច្ចសន្យាសម្រាប់គ្រូមត្តេយ្យសិក្សាត្រូវមានកម្រិតយ៉ាងតិច១២+២ ឬបរិញ្ញាបត្រ+១ រីឯគ្រូបឋមសិក្សាត្រូវមានកម្រិតយ៉ាងតិច ១២+៤ ឬបរិញ្ញាបត្រ+១ ចំណែកគ្រូបឋមភូមិ ត្រូវមានកម្រិតយ៉ាងតិច១២+៤ ឬបរិញ្ញាបត្រ+១ និងគ្រូទុតិយភូមិត្រូវមានកម្រិតបរិញ្ញាបត្រ+២។

ឆ្លៀតក្នុងឱកាសនោះ លោក ហង់ជួន ណារ៉ុន បានផ្តល់អនុសាសន៍ថា ចំពោះរយៈពេលវែង ១០ឆ្នាំខាងមុខ គ្រូបង្រៀនជាប់កិច្ចសន្យាត្រូវមានកម្រិតបណ្ដុះបណ្ដាលបរិញ្ញាបត្រ ដោយប្រើរូបមន្ត ១២+៤ ឬបរិញ្ញាបត្រ+១ ជាការបណ្ដុះ​បណ្ដាលឱ្យមានអាជ្ញាបណ្ណ។ លោកបញ្ជាក់ថា៖«ការបណ្ដុះបណ្ដាលត្រូវផ្ដោតទៅលើវិធីសាស្ត្របង្រៀន ការគ្រប់គ្រងថ្នាក់រៀន និងចិត្តគរុកោសល្យ ទាំងគ្រូបង្រៀនកិច្ចសន្យាក្នុងប្រព័ន្ធនិងក្រៅប្រព័ន្ធ»។

ជាមួយគ្នានេះ លោកបានណែនាំឱ្យ រៀបចំជាគោលការណ៍ក្នុងការជ្រើសរើសគ្រូបង្រៀនកិច្ចសន្យាទៅតាមកម្រិតសញ្ញាបត្រ ការវាយតម្លៃ និងគុណវុឌ្ឍិ ដោយរៀបជាស្ដង់ដារួមមួយ, ការរៀបចំឱ្យប្រឡងដោយផ្ដោតលើអំណានដំបូង គណិតដំបូង ការគ្រប់គ្រងថ្នាក់រៀន និងចិត្តគរុកោសល្យ , រៀបចំបណ្ដុះបណ្ដាលទាំងផ្ទាល់និងអនឡាញ ដោយផ្ដល់ជាក្រេឌីត ដើម្បីបំពេញគុណវុឌ្ឍិឈានទៅបរិញ្ញាបត្រ។

រាជរដ្ឋាភិបាលកម្ពុជា នឹងបន្តផ្តល់អាទិភាពក្នុងការជ្រើសរើសគ្រូបង្រៀន ដើម្បីបំពេញបន្ថែមនូវតម្រូវការគ្រូបង្រៀន និងប្រកបដោយគុណភាព ព្រមទាំងកៀរគរផ្តល់ធនធានបន្ថែមទៀតសម្រាប់គាំទ្រដល់ការអភិវឌ្ឍសមត្ថភាពគ្រូបង្រៀន។ ដើម្បីលើកទឹកចិត្ត និងយកចិត្តទុកដាក់លើកិច្ចការដ៏មានសារៈសំខាន់នេះ នាយករដ្ឋមន្ត្រី សម្តេចធិបតី ហ៊ុន ម៉ាណែត បានផ្តល់អនុសាសន៍ ឱ្យបន្តកែទម្រង់គ្រឹះស្ថានបណ្តុះបណ្តាលគ្រូ ដោយត្រូវបង្កើនគុណវុឌ្ឍិគ្រូបង្រៀនចេញថ្មី និងធ្វើវិក្រឹតការគ្រូបង្រៀនដែលបានចេញបង្រៀនរួចហើយ ឱ្យឆ្លើយតបទៅនឹងការអប់រំសតវត្សរ៍ទី២១ និងការរីកចំរើនបច្ចេកវិជ្ជាឌីជីថល រួមទាំងបញ្ញាសិប្បនិម្មិត (AI) និងដើម្បីបំពេញតាម «ស្តង់ដាវិជ្ជាជីវៈគ្រូបង្រៀន» និង «ស្តង់ដាសាលាគរុកោសល្យគំរូ»។

សូមជម្រាបថា គ្រូបង្រៀនជាប់កិច្ចសន្យា សំដៅដល់គ្រូបង្រៀនមិនមែនជាគ្រូក្របខណ្ឌ ដែលត្រូវបានជ្រើសរើសក្នុងចំណោមគ្រូបង្រៀនចូលនិវត្តន៍ យុវជន និងជនពិការដែលមានទីលំនៅក្នុងមូលដ្ឋានដែលខ្វះគ្រូ ឬ មូលដ្ឋានក្បែរនោះនៅក្បែរនោះ ឱ្យបង្រៀននៅកម្រិតថ្នាក់ណាមួយនៅគ្រឹះស្ថានបឋមសិក្សាសាធារណៈដែលខ្វះគ្រូក្របខណ្ឌ៕