អធិការខណ្ឌកំបូល ព្រមានផ្អាកអាជីវកម្មបុគ្គល ណាមិនស្តាប់តាមការណែនាំពីការរំលោភចំណីផ្លូវសាធារណៈ

លោកវរសេនីយ៍ឯក ហុង​ ពិសិដ្ឋ​ អធិការនៃអធិការដ្ឋាននគរបាលខណ្ឌកំបូល បានព្រមានថានឹងផ្អាកអាជីវកម្មលើម្ចាស់ទីតាំងណាដែលមិនស្ដាប់តាមការណែនាំលើករណីរំលោភចំណីផ្លូវសាធារណៈ ដែលធ្វើឲ្យប៉ះពាល់ដល់ការធ្វើដំណើររបស់ប្រជាពលរដ្ឋ។

ការព្រមានចាត់វិធានការក្ដៅនេះ ធ្វើឡើងនៅពេលលោកដឹកនាំកម្លាំងចុះរៀបចំសណ្ដាប់ធ្នាប់នៅតាមបណ្ដោយផ្លូវជាតិលេខ៤ កាលពីថ្ងៃទី២២ ខែឧសភា ឆ្នាំ២០២៥ ដែលអាជីវករមួយចំនួនយកចំណីផ្លូវធ្វើជាអាជីវកម្មជាកន្លែងជួសជុលម៉ូតូធ្វេីឲ្យកកស្ទះចរាចរណ៍ស្ទេីររាល់ថ្ងៃ។

លោក​អធិការសង្កត់ធ្ងន់ថា​ សមត្ថកិច្ចនឹងអញ្ជេីញបុគ្គលណាដែលមិនសហការមកអធិការខណ្ឌដេីម្បីអប់រំ​ ហើយក្នុងករណីអប់រំជាលេីកទី៣នៅតែមិនសហការ​ លោកនឹងស្នេីសុំគោលការណ៍គណៈបញ្ជាការឯកភាពផ្អាកទីតាំងអាជីវកម្មតែម្តង។ លោកអធិការបន្តទៀតថា​ ការចុះរៀបចំសណ្តាប់ធ្នាប់នេះធ្វេីចាប់ពីបុរីសែនមនោរម្យរហូតដល់តំបន់សេដ្ឋកិច្ចពិសេស។ សមត្ថកិច្ចសង្ឃឹមថា បងប្អូនអាជីវកម្មទាំងអស់នឹងសហការដេីម្បីសណ្តាប់ធ្នាប់ល្អបញ្ចៀសការកកស្ទះ៕

អត្ថបទ៖ សុខា