សម្ដេចនាយករដ្ឋមន្ត្រី ណែនាំក្រសួងរៀបចំដែនដី បន្តរៀបចំប្លង់គោលប្រើប្រាស់ដីសម្រាប់តំបន់រុនតាឯក និងពាក់ស្នែង

ប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត បានណែនាំដល់ក្រសួងរៀបចំដែនដី នគរូបនីយកម្ម និងសំណង់ ត្រូវបន្តរៀបចំប្លង់គោលប្រើប្រាស់ដីសម្រាប់តំបន់រុនតាឯក និងតំបន់ពាក់ស្នែង ឱ្យបានឆាប់រហ័ស ដើម្បីធានាការប្រើប្រាស់ធនធានដីធ្លីឱ្យអស់សក្តានុពល។

ការណែនាំរបស់សម្ដេចធិបតីបែបនេះ ធ្វើឡើងក្នុងឱកាសសម្ដេចអញ្ជើញជួបសំណេះសំណាលជាមួយប្រជាពលរដ្ឋរស់នៅក្នុងតំបន់រុនតាឯក ស្ថិតនៅក្នុងស្រុកបន្ទាយស្រី ខេត្តសៀមរាប នៅព្រឹកថ្ងៃទី៨​ ខែធ្នូ ឆ្នាំ២០២៣នេះ។

សម្ដេចធិបតី ហ៊ុន ម៉ាណែត បានណែនាំដល់ក្រសួងរៀបចំដែនដី ត្រូវបន្តរៀបចំប្លង់គោលប្រើប្រាស់ដីសម្រាប់តំបន់រុនតាឯក និងពាក់ស្នែង ដើម្បីប្រើប្រាស់ធនធានដីធ្លីឱ្យអស់សក្តានុពល ឱ្យស្របតាមប្រភេទដីសម្រាប់កសិកម្ម ការចិញ្ចឹមសត្វ និងសកម្មភាពសេដ្ឋកិច្ចផ្សេងៗ ដែលតភ្ជាប់សេដ្ឋកិច្ចរវាងទីក្រុង និងជនបទ។

ជាមួយគ្នានេះ សម្ដេចធិបតី ក៏បានណែនាំឱ្យក្រសួងរៀបចំដែនដី ត្រូវគិតគូរលើកិច្ចការសំខាន់ៗមួយចំនួនទៀត ជាពិសេសបន្តរៀបចំលើប្លង់គោលប្រើប្រាស់ដីធ្លីជាយុទ្ធសាស្ត្រនៅតំបន់នានាទូទាំងប្រទេសឱ្យស្របតាមស្ថានភាពសេដ្ឋកិច្ច និងទីតាំង ផងដែរ៕