យូណេស្កូ បន្តពង្រឹងកិច្ចសហការជាមួយក្រសួងអប់រំ ដើម្បីឱ្យគ្រូ និងសិស្សមានសមត្ថភាពគ្រប់គ្រាន់ប្រើ AI និងបច្ចេកវិទ្យា

អង្គការយូណេស្កូ នឹងបន្តពង្រឹងកិច្ចសហប្រតិបត្តិការជាមួយក្រសួងអប់រំ យុវជន និងកីឡា ក្នុងការគាំទ្រដល់ចក្ខុវិស័យរបស់ក្រសួងអប់រំ ដើម្បីជំរុញដល់ការអភិវឌ្ឍផ្នែកបច្ចេកវិទ្យា និងការប្រើប្រាស់ AI របស់គ្រូបង្រៀន និងសិស្ស មានភាពពេញលេញក្នុងសម័យឌីជីថល។ នេះបើតាមជំនួបរវាងភាគីទាំង២ នៅថ្ងៃទី១២ ខែមីនា ឆ្នាំ២០២៥ នៅទីស្តីការក្រសួង។

បើតាមក្រសួងអប់រំ ក្នុងជំនួបនេះ តំណាងអង្គការយូណេស្កូ លោក Sardar Umar Alam បានបង្ហាញពីចំណាប់អារម្មណ៍របស់អង្គការយូណេស្កូក្នុងការបន្តកិច្ចសហប្រតិបត្តិការជាមួយក្រសួងអប់រំ យុវជន និងកីឡា ដើម្បីជំរុញការអភិវឌ្ឍបច្ចេកវិទ្យា និងប្រើប្រាស់បញ្ញាសិប្បនិម្មិត(AI) ក្នុងវិស័យអប់រំ។ លោកក៏បានលើកឡើងពីសក្តានុពលរបស់អង្គការយូណេស្កូ ដើម្បីជួយគាំទ្រវិស័យអប់រំលើចក្ខុវិស័យនេះ ក្នុងគោលដៅឱ្យគ្រូបង្រៀន និងសិស្សានុសិស្ស មានជំនាញ និងសមត្ថភាពឌីជីថលពេញលេញ ជាពិសេស អាចប្រើប្រាស់បច្ចេកវិទ្យា និង(AI) ឱ្យស្របតាមសីលធម៌នៃការប្រើប្រាស់ និងបង្កើនប្រសិទ្ធភាពក្នុងវិស័យអប់រំ សម្រាប់សម័យឌីជីថលនេះ។

ក្នុងឱកាសនេះ បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ បានលើកឡើងពីចក្ខុវិស័យរបស់ក្រសួងអប់រំ ដែលបានប្រើប្រាស់(AI) ដើម្បីលើកកម្ពស់វិស័យអប់រំ ដូចជា ការបណ្តុះបណ្តាលគ្រូ ដោយប្រើប្រាស់ AI ជួយគាំទ្រដល់ កញ្ចប់គណិតដំបូង អំណានដំបូង, បង្រៀនសិស្សឱ្យចេះគិត និងចេញស្រមើលស្រមៃ, ពង្រឹងអក្ខរកម្មឌីជីថល ដោយប្រើប្រាស់បច្ចេកវិទ្យា, បង្កើតមាតិកា និងខ្លឹមសារមេរៀន ក៏ដូចជាពង្រឹងការអនុវត្តមុខវិជ្ជាថ្នាក់វិទ្យាសាស្ត្រ (STEM) ឱ្យកាន់មានភាពទូលំទូលាយ។

ជាមួយគ្នានេះ រដ្ឋមន្ត្រីក្រសួងអប់រំ បានលើកទឹកចិត្តដល់អង្គការយូណេស្កូ ឱ្យជួយគាំទ្រ និងចាប់ផ្តើមពង្រឹងពីចំណុចមួយចំនួនក្នុងវិស័យអប់រំ ដូចជាការបង្កើត និងត្រៀមរៀបចំបណ្ណាល័យឌីជីថល, ប្រើប្រាស់បច្ចេកវិទ្យាដើម្បីលើកកម្ពស់តេស្ត(PISA)បន្ថែម ជាពិសេស សិក្សាពីតំបន់ ក៏ដូចជាកំណត់ក្របខ័ណ្ឌឱ្យបានច្បាស់លាស់ ដែលចាប់ផ្តើមពីការប្រើប្រាស់ AI ដើម្បីជួយគាំទ្រលើការបណ្តុះបណ្តាលគ្រូបង្រៀននៅប្រទេសកម្ពុជា។ លោកបញ្ជាក់ថា ដើម្បីអភិវឌ្ឍវិស័យអប់រំ និងបញ្ញាសិប្បនិម្មិត(AI) ឱ្យមានប្រសិទ្ធភាព គ្រូបង្រៀនដែលចេញថ្មី ត្រូវតែមានសមត្ថភាពឌីជីថល ដូចជាការបង្កើតខ្លឹមសារមេរៀនឱ្យមានភាពទាក់ទាញ និងគុណភាពក្នុងរយៈពេលខ្លីជាដើម។ លោករដ្ឋមន្ត្រី ក៏បានថ្លែងអំណរគុណដល់អង្គការយូណេស្កូ ដែលបានជួយគាំទ្រលើវិស័យអប់រំនាពេលកន្លងមក ជាពិសេសចំពោះការគាំទ្រលើការប្រើប្រាស់ AI ក្នុងវិស័យអប់រំនាពេលបច្ចុប្បន្ននេះ ដើម្បីឆ្លើយតបនឹងយុគសម័យឌីជីថល។

បណ្ឌិត ហង់ជួន ណារ៉ុន បានលើកឡើងពីសារៈសំខាន់ក្នុងការចាប់យកប្រព័ន្ធ AI លើការរៀន និងបង្រៀន ជាពិសេសនៅក្នុងកម្មវិធីសិក្សា និងមុខជំនាញនានា ដោយលោកយល់ថា AI នឹងធ្វើឱ្យពិភពលោកមានការប្រែប្រួល ជាពិសេសលើវិស័យអប់រំផ្ទាល់ ដូចនេះវិស័យអប់រំ ត្រូវតែត្រៀមខ្លួនរួចរាល់ចំពោះការផ្លាស់ប្តូរដ៏ធំនេះ៕