អាមេរិក ប្រកាសដកខ្លួនចេញពីអង្គការ​ យូណេស្កូ ​សាជាថ្មី​

ជាថ្មីម្តងទៀត សហរដ្ឋអាមេរិក បានប្រកាសដកខ្លួនចេញពីអង្គការយូណេស្កូ ដោយលើកហេតុផលថា ស្ថាប័នរបស់ UN មួយនេះ មានភាពលម្អៀងនិងប្រឆាំងប្រទេសអ៊ីស្រាអែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការបរទេសអាមេរិក បានប្រកាសកាលពីថ្ងៃអង្គារទី២២ខែកក្កដាឆ្នាំ២០២៥ថា ការសម្រេចចិត្តរបស់លោកប្រធានាធិបតី ដូណាល់ ត្រាំ ក្នុងការចាកចេញពីទីភ្នាក់ងារនេះ គឺបន្ទាប់ពីរកឃើញថា យូណេស្កូ ទទួលស្គាល់រដ្ឋប៉ាឡេស្ទីន និងការរីកសាយនៃវោហាសាស្ត្រប្រឆាំងអ៊ីស្រាអែលនៅក្នុងអង្គការ។

មិនត្រឹមប៉ុណ្ណឹង អាមេរិកក៏ចោទយូណេស្កូផងដែរថា បានធ្វើការដើម្បីជំរុញបុព្វហេតុសង្គមនិងវប្បធម៌ដែលបែកបាក់គ្នា ព្រមទាំងលើកឡើងពីការចំណាយខ្ពស់របស់ទីក្រុងវ៉ាស៊ីនតោន និងតម្រូវការដើម្បីធ្វើកំណែទម្រង់ស៊ីជម្រៅនៅក្នុងអង្គការនេះ។

តាមពិតទៅ លោកត្រាំ បានបញ្ជាឲ្យក្រសួងការបរទេសធ្វើការពិនិត្យឡើងវិញរយៈពេល៩០ថ្ងៃ រួចមកហើយលើការចូលរួមរបស់សហរដ្ឋអាមេរិក នៅក្នុងកម្មវិធីរបស់អង្គការយូណេស្កូ កាលពីខែកុម្ភៈ។

ចំណាត់ការនោះគឺជាផ្នែកមួយនៃការជំរុញដ៏ខ្លាំងក្លា ដើម្បីផ្តាច់ខ្លួនចេញពីស្ថាប័ន UN ដែលក្រុមមន្ត្រីអះអាងថា កំពុងធ្វើសកម្មភាពប្រឆាំងផលប្រយោជន៍របស់អាមេរិក និងធ្វើឲ្យខូចដល់សម្ព័ន្ធមិត្តរបស់ទីក្រុងវ៉ាស៊ីនតោន ព្រោះតែការឃោសនាប្រឆាំងជនជាតិជ្វីហ្វ។

ច្បាស់ណាស់ ការដកខ្លួនរបស់អាមេរិក នឹងបង្កផលប៉ះពាល់ដ៏ធំដល់យូណេស្កូនិងកម្មវិធីនានារបស់ខ្លួន ព្រោះអាមេរិកជាអ្នករួមចំណែកធំបំផុតមួយដល់ថវិការបស់ស្ថាប័ននេះ។ ម្យ៉ាងការចាកចេញនេះ អាចធ្វើឲ្យប្រទេសផ្សេងទៀត ជាពិសេសចិន បង្កើនឥទ្ធិពលរបស់ខ្លួននៅក្នុងអង្គការយូណេស្កូ។

សូមជម្រាបថា ការដកខ្លួននេះកើតឡើងតែប្រមាណ ២ឆ្នាំប៉ុណ្ណោះ បន្ទាប់ពីអតីតរដ្ឋបាលលោក ចូ បៃដិន បានសម្រេចចិត្តចូលយូណេស្កូវិញកាលពីខែកក្កដាឆ្នាំ២០២៣៕

អត្ថបទ៖ សុខ សុវណ្ណ

ចុចអាន៖ ហេតុអ្វី​​ ដូណាល់ ​ត្រាំ ជាសត្រូវ​របស់​​ភ្នាក់ងារ​អន្តរជាតិ​​ចំនួន​៤​​?​