រដ្ឋមន្ត្រីអប់រំ ផ្តាំទៅសិស្សឱ្យខំរៀន និងថែរក្សាសុខភាពឱ្យបានល្អដើម្បីត្រៀមខ្លួនប្រឡងបាក់ឌុបខាងមុខ  

បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានផ្តាំផ្ញើដល់សិស្សានុសិស្សគ្រប់រូបខិតខំរៀនសូត្រ បំពេញចន្លោះខ្វះខាតរបស់ខ្លួន សម្រាកឱ្យបានគ្រប់គ្រាន់ និងថែរក្សាសុខភាពឱ្យបានល្អ ដើម្បីត្រៀមខ្លួនប្រឡងសញ្ញាបត្រមធ្យមសិក្សាទុតិយភូមិ នៅថ្ងៃទី១៨ ខែសីហា ឆ្នាំ២០២៥ខាងមុខទទួលបានជោគជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការផ្តាំផ្ញើនេះ ធ្វើឡើងនៅថ្ងៃទី២៣ ខែកក្កដា ឆ្នាំ២០២៥ ក្នុងឱកាសបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាប្រធានក្រុមការងារថ្នាក់ជាតិចុះជួយស្រុកកងមាស​ បានដឹកនាំប្រតិភូចុះជួបសំណេះសំណាលជាមួយសិស្សថ្នាក់ទី១២ ដែលត្រៀមប្រឡងសញ្ញាបត្រមធ្យមសិក្សាទុតិយភូមិ នៅវិទ្យាល័យហ៊ុន សែន​ពាមជីកង ខេត្តកំពង់ចាម។

ក្រសួងអប់រំ បញ្ជាក់ថា៖ “បណ្ឌិតសភាចារ្យ ឧបនាយករដ្ឋមន្ត្រី បានផ្ដាំផ្ញើ និងលើកទឹកចិត្តដល់ក្មួយៗសិស្សានុសិស្សឱ្យបន្តខិតខំប្រឹងប្រែងបន្ថែម និងបំពេញចន្លោះខ្វះខាតផ្សេងៗ ដេីម្បីពង្រឹងជំនាញផ្ទាល់ខ្លួនសម្រាប់ជ្រេីសរេីសជំនាញ​នាពេលអនាគត​ ជាពិសេសត្រូវថែទាំសុខភាព សម្រាក និងហូបចុកឱ្យបានគ្រប់គ្រាន់ ដើម្បីរក្សាបាននូវកម្លាំងកាយចិត្តល្អប្រសើរ ត្រៀមរួចរាល់សម្រាប់ការប្រឡងសញ្ញាបត្រប្រកបដោយភាពជោគជ័យនាពេលខាងមុខនេះ”។

បន្ថែមពីនេះ បន្ទាប់ពីប្រឡងចប់បាក់ឌុប លោក ហង់ជួន ណារ៉ុន ក៏ផ្តាំដល់សិស្សគ្រប់រូប ឱ្យចិត្តទុកដាក់លើការជ្រើសរើសជំនាញ ឱ្យបានសមស្របតាមសមត្ថភាព និងចំណង់ចំណូលចិត្តរបស់ខ្លួន ដើម្បីបន្តការសិក្សានៅថ្នាក់ឧត្តមសិក្សា ចៀសវាងការសម្រេចចិត្តខុសមួយគ្រា នាំឱ្យខាតបង់ទាំងពេលវេលា និងធនធាន។ លោកបន្តថា សិស្សត្រូវក្តោបឱកាសក្នុងការយកចិត្តទុកដាក់ក្រេបយកចំណេះដឹង​ថ្មីៗបន្ថែមទៀត ដេីម្បីទទួលបាននូវអាហារូបករណ៍ទាំងក្នុងប្រទេស​ និងក្រៅប្រទេសផងដែរ។

ជាមួយគ្នានេះ លោកបណ្ឌិត បានថ្លែងអំណរគុណដល់គណៈគ្រប់គ្រង លោកគ្រូ អ្នកគ្រូ ដែលបានខិតខំប្រឹងប្រែងអស់ពីកំលាំងកាយចិត្ត ក្នុងការដឹកនាំបង្ហាត់បង្រៀនសិស្សានុសិស្សនាពេលកន្លងមក។ ជាពិសេសបានប្រែក្លាយសាលាទៅជាសាលារៀនគំរូ បន្ថែមទៅដោយទេសភាពសាលាដែលស្រស់ស្អាត ដោយលោកបានគូសបញ្ជាក់ថា ការខិតខំប្រឹងប្រែងនេះមិនត្រឹមតែបានបណ្ដុះបណ្ដាលចំណេះដឹងដល់សិស្សានុសិស្សប៉ុណ្ណោះទេ ប៉ុន្តែថែមទាំងបានបង្កើតបរិយាកាសសិក្សាប្រកបដោយផាសុកភាព និងទាក់ទាញ ដែលជាផ្នែកមួយដ៏សំខាន់ក្នុងការលើកកម្ពស់គុណភាពអប់រំនៅកម្ពុជា។

ក្រសួងអប់រំ បានរម្លឹកឱ្យដឹងថា របាយការណ៍ប្រឡងសញ្ញាបត្រមធ្យមសិក្សាទុតិយភូមិឆ្នាំ២០២៤ អត្រាជាប់របស់សិស្សានុសិស្សវិទ្យាល័យហ៊ុន សែន​ ពាមជីកង​ កើនឡើងដល់ ៨៤,៣៦% ក្នុងនោះសិស្សទទួលបាន​និទ្ទេស​ A មានចំនួន៤នាក់​ ស្រី​ ២នាក់។​ សមិទ្ធផលនេះ បានបង្ហាញអំពីការខិតខំប្រឹងប្រែងរបស់គណៈគ្រប់គ្រង លោកគ្រូ អ្នកគ្រូ អាណាព្យាបាល សហគមន៍ និងសិស្សានុសិស្សទាំងអស់ដែលបានសហការគ្នាយ៉ាងល្អក្នុងការជួយជំរុញដល់ការសិក្សារបស់សិស្សឱ្យសម្រេចបាននូវលទ្ធផលមួយដល់ល្អប្រសើរ៕