គ្រោះថ្នាក់ចរាចរណ៍បង្កដោយលោកសក្តិ៥៖ នាយករដ្ឋមន្ត្រី ធានាអះអាងមិនឱ្យបុគ្គលនេះរួចពីសំណាញ់ច្បាប់ឡើយ

នៅព្រឹកថ្ងៃសៅនេះ សម្ដេចធិបតី ហ៊ុន ម៉ាណែត បានថ្លែងថា នឹងតាមដានចំពោះករណីគ្រោះថ្នាក់ចរាចរណ៍ ដែលបង្កឡើងដោយមន្ត្រីនគរបាលសក្តិ៥ម្នាក់ ដោយសម្ដេចធានាអះអាងថា មិនឱ្យបុគ្គលដែលបុកគេស្លាប់នេះ រួចពីសំណាញ់ច្បាប់ឡើយ។

កាលពីរសៀលថ្ងៃទី១៥ ខែឧសភា ឆ្នាំ២០២៥ មានករណីគ្រោះថ្នាក់ចរាចរណ៍ បង្កឡើងដោយវរសេនីយ៍ឯក ហ៊ុន ហេង នាយការិយាល័យគណនេយ្យ នៃស្នងការដ្ឋាននគរបាលរាជធានីភ្នំពេញ ដោយបានបើករថយន្ដបុករះនៅលើកំណាត់ផ្លូវព្រះនរោត្ដម មុខក្រសួងមហាផ្ទៃ ក្នុងសង្កាត់ទន្លេបាសាក់ ខណ្ឌចំការមន ដែលបណ្ដាលឱ្យបុរសអ្នកបើកម៉ូតូកង់បីឥណ្ឌាម្នាក់ស្លាប់ភ្លាមៗនៅកន្លែងកើតហេតុ និងរបួសធ្ងន់ស្រាល៥នាក់។

ជុំវិញករណីនេះ ក៏មានការជជែកវែកញែកច្រើនតាមបណ្ដាញសង្គម ដោយសារជនបង្កជាមន្ត្រីនគរបាលជាតិនៅស្នងការដ្ឋាននគរបាលរាជធានីភ្នំពេញ ហើយសាធារណៈមតិសម្ដែងការព្រួយបារម្ភចំពោះការអនុវត្តច្បាប់អាចមិនមានតម្លាភាព។

ជម្រះការព្រួយបារម្ភនេះ ថ្លែងក្នុងពេលអញ្ជើញសម្ពោធដាក់ឱ្យប្រើប្រាស់សមិទ្ធផលនានានៅក្នុងវិទ្យាល័យ ហ៊ុន សែន ប្រម៉ោយ ស្ថិតក្នុងស្រុកវាលវែង ខេត្តពោធិ៍សាត់ នាព្រឹកថ្ងៃទី១៧ ខែឧសភា ឆ្នាំ២០២៥ សម្ដេចធិបតី ហ៊ុន ម៉ាណែត នាយករដ្ឋមន្រ្តី ចេញមុខធានាតាមដានករណីមន្រ្ដីនគរបាលបង្កគ្រោះថ្នាក់ចរាចរណ៍បុកគេស្លាប់ក្នុងស្ថានភាពស្រវឹងនេះ មិនឱ្យរួចខ្លួនឡើយ។

សម្ដេចធិបតី ថា «រាល់ការបុកមនុស្សស្លាប់ ដែលមានភាពស្រវឹង គឺយើងត្រូវអនុវត្តច្បាប់ម៉ឺងម៉ាត់ មិនមែនត្រឹមតែដោះស្រាយ តាមគោលការណ៍សងលុយហើយ រួចខ្លួនទេ ចំពោះអ្នកបុកគេស្លាប់ ហើយមានជាតិស្រវឹងក្នុងខ្លួន មិនថាអ្នកនោះ ជាអ្នកណាទេ»។

ករណីស្រវឹងបុកគេស្លាប់ សម្ដេចធិបតី បានដាស់តឿនម្ដងទៀតថា ត្រូវតែអនុវត្តច្បាប់ បន្ថែមពីការសងសំណង ទោះជនបង្កហេតុ ជានរណាក៏ដោយ ហើយភ្ជាប់គ្នានេះ សម្ដេច នាយករដ្ឋមន្ត្រី ក៏បានអំពាវនាវឱ្យពលរដ្ឋជឿទុកចិត្ដទៅលើប្រព័ន្ធច្បាប់។

បើតាមឧត្ដមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ នៅព្រឹកថ្ងៃទី១៧ ឧសភានេះ ជនបង្កឈ្មោះ ហ៊ុន ហេង បានបញ្ជូនខ្លួនតុលាការហើយ ដើម្បីអនុវត្តនីតិវិធីច្បាប់ ខណៈលោកក៏បានទម្លាយឱ្យដឹងថា លោក ហ៊ុន ហេង ថែមទាំងត្រូវបានបណ្ដេញចេញពីក្របខណ្ឌនគរបាលជាតិផងដែរ៕

ដោយ៖ ធឿន វ៉ាន់សុង