ព័ត៌មានជាតិ
មេធាវី៖ លោក កឹម សុខា មិនពាក់ព័ន្ធគម្រោងបង្កើតរដ្ឋាភិបាលបង្រួបបង្រួមជាតិរបស់លោក សម រង្ស៊ី នោះទេ
សហមេធាវីការពារក្តីឲ្យលោក កឹម សុខា លោក ចាន់ ចេន បានអះអាងថា លោក កឹម សុខា មិនពាក់ព័ន្ធ ហើយក៏មិនចូលរួមនៅក្នុងគម្រោងរដ្ឋាភិបាលបង្រួបបង្រួមជាតិ ដែលបង្កើតដោយទណ្ឌិត សម រង្សី កាលពីពេលថ្មីៗនោះទេ ហើយក៏មិនបានអនុញ្ញាតិឲ្យយកឈ្មោះ ឬភ្ជាប់ឈ្មោះជាមួយក្រុមនោះឡើយ។
ការប្រកាសរបស់លោក ចាន់ ចេន ធ្វើឡើងកាលពីថ្ងៃសៅរ៍ ទី០៧ ខែសីហា ឆ្នាំ២០២១ ម្សិលមិញ។ លោកបញ្ជាក់យ៉ាងដូច្នេះថា “ក្នុងនាមខ្ញុំជាមេធាវី និងជាសហការីរបស់ឯកឧត្តម កឹម សុខា ខ្ញុំសូមបញ្ជាក់ជូនសាធារណជនឲ្យបានជ្រាបថា ឯកឧត្តម កឹម សុខា មិនពាក់ពន្ធ័ មិនគាំទ្រនិងមិនចូលរួមក្នុងការគ្រោង និងការបង្កើតរដ្ឋាភិបាលក្រៅប្រទេស ដែលប្រកាសដោយលោកសម រង្សី កាលពីពេលថ្មីៗនេះទេ។ ជាពិសេសឯកឧត្តម កឹម សុខា ក៏មិនអនុញ្ញាតិឲ្យយកឈ្មោះគាត់ទៅប្រើប្រាស់ និងភ្ជាប់ជាមួយនោះឡើយ”។
សូមបញ្ជាក់ថា កាលពីថ្មីៗនេះ លោក សម រង្ស៊ី អំពាវនាវឲ្យប្រជាពលរដ្ឋ និងកងកម្លាំងប្រដាប់ អាវុទស្នេហាជាតិ ត្រៀមខ្លួនចូលរួមបង្កើតរដ្ឋាភិបាលបង្រួបបង្រួមជាតិនៅកម្ពុជា ដោយយកតម្រាប់តាមការបង្កើតរដ្ឋាភិបាលបង្រួបបង្រួមជាតិនៅប្រទេសភូមា ប៉ុន្តែត្រូវបានលោក មុត ចន្ថា ដែលជាមនុស្សជំនិតរបស់លោក កឹម សុខា បានហៅការអំពាវនានេះថា ជាការដើរបញ្រ្ចាសទិស ឬខុសផ្លូវនយោបាយពីលោក កឹម សុខា ទាំងស្រុង។
លោក មុត ចន្ថា បានបញ្ជាក់យ៉ាងដូច្នេះថា “ខ្ញុំយល់ថា ការអំពាវនាវរបស់លោក សម រង្ស៉ី គឺដើរបញ្រ្ចាសទិស ឬផ្លូវនយោបាយពីលោក កឹម សុខា ដែលជាប្រធាន នៃអតីតគណបក្សសង្រ្គោះជាតិទាំងស្រុង ព្រោះលោក កឹម សុខា កំពុងមានវត្តមាននៅក្នុងប្រទេសកម្ពុជា ដែលលោកនៅតែមានឆន្ទៈនយោបាយសុចរិត និងពិតប្រាកដ ដើម្បីស្វែងរកការបង្រួបបង្រួមជាតិ ជាមួយអ្នកដឹកនាំ និងអ្នកនយោបាយខ្មែរ តាមគោលការណ៍អហិង្សា និងសន្តិវិធី និងផ្លូវប្រជាធិបតេយ្យ។ ដំណោះស្រាយនយោបាយមិនកើតឡើងដោយអំពើហិង្សា ឬការប្រឈមមុខដាក់គ្នានោះទេ។ ដូច្នេះ ខ្ញុំនៅតែជឿថា លោក កឹម សុខា នៅតែជាអ្នកដឹកនាំ នយោបាយម្នាក់ ដែលប្រាថ្នាចង់ឲ្យអ្នកដឹកនាំ និងអ្នកនយោបាយខ្មែររួបរួមគ្នា”។
លោក មុត ចន្ថា អះអាងថា ស្ថានភាពនយោបាយ នៅភូមា និងកម្ពុជាខុសគ្នាស្រឡះ។ ភាពខុសគ្នានោះ គឺយោធាភូមាបានដឹកនាំធ្វើរដ្ឋប្រហារដណ្តើមអំណាចពីរដ្ឋាភិបាលស៊ីវិល ដឹកនាំដោយគណបក្សសម្ព័ន្ធជាតិ ដើម្បីប្រជាធិបតេយ្យ (National League for Democracy, NLD) ដែលមានលោកស្រី អ៊ួង សាន ស៊ូជី ជាប្រធាន និងជាក្រុមប្រឹក្សារដ្ឋផងដែរ។ ដោយឡែក អតីតគណបក្សសង្រ្គោះជាតិ ត្រូវបានរំលាយ ដោយតុលាការកំពូល ដោយហេតុផលនយោបាយ និងដោយអនុលោម តាមច្បាប់វិសោធនកម្មនៃច្បាប់ ស្តីពីគណបក្សនយោបាយ។
លោក មុត ចន្ថា លើកឡើងដែរថា គណបក្សសង្រ្គោះជាតិ ដែលត្រូវបានរំលាយ មិនមែនគណបក្សដឹកនាំរដ្ឋាភិបាល ដូចគណបក្សសម្ព័ន្ធជាតិ ដើម្បីប្រជាធិបតេយ្យរបស់លោកស្រី អ៊ួង សាន ស៊ូជី ឡើយ តែជាគណបក្សប្រឆាំងតែមួយនៅក្នុងរដ្ឋសភា។ លោកបន្តថា ការអំពាវនាវ របស់លោកសម រង្ស៉ី ឲ្យពិចារណាពីលទ្ធភាពបង្កើត “រដ្ឋាភិបាលបង្រួបបង្រួមជាតិ” អាចជាអំពើខុសច្បាប់មួយ មិនស្របតាមបញ្ញត្តិរដ្ឋធម្មនុញ្ញ ដូចដែលគាត់ធ្លាប់បានបង្កើតចលនាសង្រ្គោះជាតិនៅឆ្នាំ២០១៨ ដែលរាជរដ្ឋាភិបាលចាត់ទុកជាក្រមឧទ្ទាមក្រៅច្បាប់ ហើយការអំពាវនាវនេះអាចក្លាយជាអន្ទាក់នយោបាយដាក់អតីតអ្នកនយោបាយ និងសកម្មជន នៃអតីតគណបក្សសង្រ្គោះជាតិ ដូចគ្នានឹងចលនាសង្រ្គោះជាតិដូច្នោះដែរ៕
អត្ថបទ៖ កោះកែវ
-
ព័ត៌មានជាតិ៦ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ៤ ថ្ងៃ ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានជាតិ៤ ថ្ងៃ ago
បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»
-
ចរាចរណ៍១៥ ម៉ោង ago
បឋម៖ រថភ្លើងបុករថយន្ដក្រុងដឹកអ្នកដំណើររបួសច្រើននាក់
-
ព័ត៌មានជាតិ៥ ថ្ងៃ ago
កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា
-
ព័ត៌មានជាតិ៥ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ
-
សេដ្ឋកិច្ច៦ ថ្ងៃ ago
មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ
-
ព័ត៌មានអន្ដរជាតិ៣ ថ្ងៃ ago
លម្អិតហេតុការណ៍រន្ធត់ កប៉ាល់ដឹកកុងតឺន័រ បុកបាក់ស្ពាននៅទីក្រុង Baltimore