អស់រយៈពេលជិត៣ម៉ោងដែលបណ្តាញអគ្គិសនីនៅភូមិអូរអណ្តូង សង្កាត់ព្រែកប្រា ខណ្ឌច្បារអំពៅ ត្រូវបានដាច់ដែលទីបំផុតទើបស្រាវជ្រាវដឹងថា ដោយសារតែសត្វរញី​កម្រមួយក្បាលឡើងលើ​ខ្សែ​អគ្គិសនីបង្កឲ្យទុស្សេដាច់ចរន្តលែងដំណើការ។​

​ប្រជាពលរដ្ឋនៅតំបន់ភូមិអូរអណ្តូងបានឲ្យដឹងថា ការឆ្លងចរន្តអគ្គិសនី​បង្កឱ្យរលត់ភ្លើង​នៅលើកទី១​ ប្រមាណជាម៉ោង៧​យប់ថ្ងៃទី ៣១ ខែមករា អស់រយៈពេលជិតកន្លះម៉ោង​ធ្វើឱ្យប្រជាពលរដ្ឋទូរស័ព្ទ​ទៅមន្ត្រីអគ្គិសនី​សាខាចាក់អង្រែក្រោមឱ្យចុះមកមើលបណ្តាញអគ្គិសនីដើម្បីធ្វើឱ្យដំណើរការ។

​​លុះពេលមន្ត្រីអគ្គិសនីចុះមកបង្គោលភ្លើងដែលឆ្លងដំបូងស្ថិតនៅក្បែរចម្ការមួយសម្បូរទៅដោយដើមឈើធំៗ ប៉ុន្តែពុំឃើញមានស្នាមដាច់ខ្សែបណ្តាញហើយមន្ត្រីជំនាញបានកាច់ឌីសង់ទ័រឱ្យដំណើការវិញប៉ុន្តែពេលកាច់ឌីសង់ទ័រវិញស្រាប់តែ​លោតមិនដំណើការហើយមន្ត្រីអគ្គិសនីបានព្យាយាមតាមមើលខ្សែបណ្តាញដែលលោតទើបបានឃើញសត្វរញី​មួយក្បាលរត់លើខ្សែបណ្តាញទើបប្រជាពលរដ្ឋនាំគ្នាដេញចាប់បានទើបបើកដំណើការអគ្គិសនីបានឡើងវិញ។ ប្រជាពលរដ្ឋបានឱ្យ​ដឹងទៀត​ថា សត្វ​រញីដែលចាប់បានគឺមានទម្ងន់ប្រហែល៣គីឡូក្រាម។

សត្វរញីប្រផេះជាប្រភេទសត្វកម្រ និងស្ថិតនៅក្នុងបញ្ជីឧបសម្ព័ន្ធ ១ នៃអនុសញ្ញាសាយតេសដែលមានរស់នៅក្នុងតំបន់ការពារធម្មជាតិរបស់ព្រះរាជាណាចក្រកម្ពុជា។ សត្វរញីប្រផេះមាននិន្នាការធ្លាក់ចុះនៅលើពិភពលោករួមទាំងនៅកម្ពុជាផងដែរ។

រញីប្រផេះជាទូទៅវាមានពណ៌ផ្សេងៗគ្នាចាប់ពីត្នោត ប្រផេះ ព្រលែត ទៅក្រហម ត្នោត និងមានឆ្នូតពណ៌ ត្នោតចាប់ពីក្បាលរហូតដល់ពាក់កណ្តាលខ្នង ឬដល់គល់កន្ទុយ និងមានលក្ខណៈស្រដៀងគ្នាទៅនឹងរញី ភ្លើងដែរ។ វាមានពណ៌ត្នោតចាស់ពទ្ធ័ជុំវិញរង្វង់ភ្នែកទាំងពីរ និងមានរោមឆ្នូតពណ៌សតាមបណ្តោយខ្ទង់ច្រមុះ៕

អត្ថបទ៖ នរា