​មក​ដល់​ពេលនេះ រដ្ឋាភិបាលដាក់​ចេញវិធានការ និង​​ជួយ​គាំទ្រអ្វី​ខ្លះ​ ​រុញ​​​ឲ្យ​​វិស័យ​អចលទ្រព្យងើបស្ទុះ​ឡើង​​វិញ?

រដ្ឋាភិបាល​បាន​ដាក់​ចេញ​វិធានការ​ជាច្រើន ដើម្បី​ដោះស្រាយ​ការ​ជាប់​គាំងលើ​វិស័យ​អចលទ្រព្យ​ឲ្យ​មាន​សន្ទុះនិង​ងើប​ឡើង​វិញ តាម​រយៈ​ការ​សម្របសម្រួល​នីតិវិធី និង​ការ​លើក​ទឹកចិត្ត​ជាពិសេស​ការ​បន្ធូរបន្ថយ​ពន្ធដារ។

តើមកដល់ពេលនេះ ​រដ្ឋាភិបាល​បានដាក់ចេញ​វិធានការ​ និង​បាន​ជួយ​គាំទ្រអ្វី​ខ្លះ​ ដើម្បី​​ជំរុញ​ឲ្យ​​វិស័យ​អចលទ្រព្យក្នុងប្រទេសកម្ពុជា​មានសកម្មភាព និង​អាច​​ស្តារ​ឡើង​វិញបាន?

>លើកលែង និងអនុគ្រោះពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធកាន់កាប់អចលនទ្រព្យ

កាលពីថ្ងៃ ៣១ ខែធ្នូ ឆ្នាំ ២០២៤ ក្រសួងសេដ្ឋកិច្ច និងហិរញ្ញវត្ថុ បានចេញសេចក្ដីជូនដំណឹងពីការលើកលែងនិងអនុគ្រោះ​ពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធកាន់កាប់អចលនទ្រព្យសម្រាប់អ្នកទិញលំនៅឋាន និង/ឬ ផ្ទេរកម្មសិទ្ធិជាលើកដំបូង ដោយត្រូវអនុវត្តចាប់ពីថ្ងៃទី១ ខែមករា រហូតដល់ថ្ងៃទី៣១ ខែធ្នូ ឆ្នាំ២០២៥។

ការលើកលែងនិងអនុគ្រោះពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ សម្រាប់អ្នកទិញលំនៅឋាន និង/ឬ ផ្ទេរកម្មសិទ្ធិជាលើកដំបូង (First-Time Home Buyer) ដូចខាងក្រោម៖

ក. ចំពោះបុគ្គលទាំងឡាយណា ដែលទិញលំនៅឋានមានលក្ខណៈជាបុរី ឬខុនដូមុនឆ្នាំ២០២៥ ហើយធ្វើការផ្ទេរកម្មសិទ្ធិ ឬសិទ្ធិកាន់កាប់លំនៅឋានជាលើកដំបូងនៅរដ្ឋបាលសារពើពន្ធក្នុងឆ្នាំ ២០២៥ ត្រូវទទួលបានលើកលែងពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ សម្រាប់លំនៅឋានដែលមានតម្លៃក្រោម ឬស្មើ ២១ ម៉ឺនដុល្លារអាមេរិក និងអនុគ្រោះចំពោះលំនៅឋានដែលមានតម្លៃលើស ២១ ម៉ឺនដុល្លារអាមេរិក ដោយអនុញ្ញាតឱ្យដកចេញពីមូលដ្ឋានគិតពន្ធប្រថាប់ត្រាចំនួន ២១ ម៉ឺនដុល្លារអាមេរិក។

ការលើកលែងនិងអនុគ្រោះពន្ធនេះសម្រាប់លំនៅឋានតែមួយប៉ុណ្ណោះ។ ដោយឡែក លំនៅឋានទី២ ឬបន្តបន្ទាប់ត្រូវទទួល​បានការអនុញ្ញាតឱ្យដកចេញពីមូលដ្ឋានគិតពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យចំនួន ៧ ម៉ឺនដុល្លារអាមេរិក។ ការលើកលែងនិងអនុគ្រោះពន្ធនេះត្រូវអនុវត្តរហូតដល់ដំណាច់ឆ្នាំ២០២៥។

ខ. ចំពោះបុគ្គលទាំងឡាយណា ដែលទិញលំនៅឋានមានលក្ខណៈជាបុរី ឬ ខុនដូ ក្នុងឆ្នាំ២០២៥ ដែលមិនទាន់ទទួលបាន​ការលើកលែងនិងអនុគ្រោះពន្ធដូចក្នុងចំណុច (ក) ត្រូវទទួលបានការលើកលែងពន្ធប្រថាប់ត្រាលើ ការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ សម្រាប់លំនៅឋានដែលមានតម្លៃក្រោម ឬស្មើ ២១ ម៉ឺនដុល្លារ អាមេរិក, និងអនុគ្រោះចំពោះ​លំនៅឋានដែលមានតម្លៃលើស ២១ ម៉ឺនដុល្លារអាមេរិក ដោយអនុញ្ញាតឱ្យដកចេញពីមូលដ្ឋានគិតពន្ធប្រថាប់ត្រា ចំនួន ២១ ម៉ឺនដុល្លារអាមេរិក។ ការលើកលែងនិងអនុគ្រោះពន្ធនេះ សម្រាប់លំនៅឋានតែមួយប៉ុណ្ណោះ។

ដោយឡែក លំនៅឋានទី២ ឬបន្តបន្ទាប់ត្រូវទទួលបានការអនុញ្ញាតឱ្យដកចេញ ពីមូលដ្ឋានគិតពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យចំនួន ៧ ម៉ឺនដុល្លារអាមេរិក។ ការលើកលែងនិងអនុគ្រោះពន្ធនេះ ត្រូវអនុវត្តនៅពេលធ្វើការផ្ទេរកម្មសិទ្ធិ ឬសិទ្ធិកាន់កាប់លំនៅឋាននោះ។

គ. ការទិញលំនៅឋានមានលក្ខណៈជាបុរី ឬ ខុនដូ ដូចមានចែងក្នុងចំណុច (ក) និង (ខ) ត្រូវទិញពីក្រុមហ៊ុន អភិវឌ្ឍន៍លំនៅឋាន ដែលបានចុះបញ្ជីនៅនិយ័តករអាជីវកម្មអចលនវត្ថុនិងបញ្ចាំ ឬនៅមន្ទីរសេដ្ឋកិច្ចនិងហិរញ្ញវត្ថុខេត្ត ទោះបីជានៅលើបណ្ណកម្មសិទ្ធិជាឈ្មោះក្រុមហ៊ុន ឬឈ្មោះរូបវន្តបុគ្គលដែលជាម្ចាស់គម្រោងឬ ជាអ្នកតំណាងក្រុមហ៊ុន​ឬ​ម្ចាស់​គម្រោងក៏ដោយ

ឃ. ក្រុមហ៊ុនអភិវឌ្ឍន៍លំនៅឋានទាំងអស់ ត្រូវធ្វើកិច្ចសន្យាទិញ-លក់ឱ្យបានត្រឹមត្រូវ ដោយផ្អែកលើតម្លៃទីផ្សារជាក់ស្តែង និងត្រូវបញ្ជូនកិច្ចសន្យាទិញ-លក់ មករដ្ឋបាលសារពើពន្ធមុន ឬនៅពេលធ្វើការផ្ទេរកម្មសិទ្ធិ ឬសិទ្ធិ កាន់កាប់លំនៅឋាន​។

ចំពោះការទិញលំនៅឋានដូចខាងលើ ពីក្រុមហ៊ុនអភិវឌ្ឍន៍លំនៅឋាន ដែលពុំមានអាជ្ញាប័ណ្ណអាជីវកម្មអភិវឌ្ឍន៍ លំនៅឋាន​ដែលម្ចាស់គម្រោងមានបញ្ហា ឬក្ស័យធន ហើយត្រូវបានអនុញ្ញាតឱ្យផ្ទេរកម្មសិទ្ធិ ឬសិទ្ធិកាន់កាប់លំនៅឋានតាមរយៈយន្តការដោះស្រាយរបស់ក្រសួង ឬស្ថាប័នមានសមត្ថកិច្ចពាក់ព័ន្ធ ក៏ត្រូវបានទទួលការលើកលែងនិងការអនុគ្រោះពន្ធ ប្រថាប់ត្រាដូចខាងលើនេះដែរ។

>ដាក់ចេញវិធានការឱ្យធនាគារ និងគ្រឹះស្ថានមីក្រូហិរញ្ញវត្ថុ បន្ធូរបន្ថយ​លក្ខខណ្ឌ និង​សម្រួលដល់ការរៀបចំឥណទានឡើងវិញ (Refinance)

ថ្លែងការណ៍ពិសេសពី «សមិទ្ធផល ១ ឆ្នាំ របស់រាជរដ្ឋាភិបាល កាលពី​ថ្ងៃទី២២ ខែសីហា ឆ្នាំ២០២៤ នាយករដ្ឋមន្រ្តីកម្ពុជា​​​បាន​ស្នើ​ឱ្យធនាគារ និងគ្រឹះស្ថានមីក្រូហិរញ្ញវត្ថុ បន្ធូរបន្ថយលក្ខខណ្ឌ និងសម្រួល​ដល់ការរៀបចំឥណទានឡើងវិញ ដើម្បីជួយសម្រាលបន្ទុកចំណាយ​របស់​អតិថិជន ដែលមានបំណងស្នើសុំឥណទានរៀបចំឡើងវិញ។

ការរៀបចំឥណទានឡើងវិញ ក៏​ឈរលើគោលការណ៍បន្ធូរបន្ថយប្រាក់ពិន័យ ការលុបចោលប្រាក់ពិន័យ មិនយកកម្រៃសេវា​ផ្សេងៗ មិនបញ្ចូលការប្រាក់យឺតយ៉ាវដែលអតិថិជនមិនទាន់បានសងទៅជាប្រាក់ដើម ប៉ុន្តែអតិថិជននៅមានកាតព្វកិច្ច​សងការប្រាក់ទៅតាមវិធានការនៃការរៀបចំឥណទានឡើងវិញ ។

ក្នុងករណីដែលអតិថិជនបង់យឺតយ៉ាវ ឬចង់ផ្តាច់ឥណទានមិនដំណើរការ គ្រឹះស្ថានធនាគារ និងមីក្រូហិញ្ញវត្ថុ នឹង​លុប​ចោល​ប្រាក់ពិន័យ។ ដោយឡែកចំពោះការប្រាក់ គ្រឹះស្ថានធនាគារ និងមីក្រូហិរញ្ញវត្ថុ អាចពិចារណាលើកលែងមួយផ្នែក​ឬ​ទាំងស្រុង ទៅតាមស្ថានភាពជាក់ស្តែងរបស់គ្រឹះស្ថាន ឬគោលការណ៍របស់គ្រឹះស្ថាននីមួយៗ

>ផ្ទេរ​ពីការ​បង់​រំលស់ដោយផ្ទាល់​ជាមួយ​ម្ចាស់បុរីដែល​យក​ការប្រាក់ខ្ពស់ មក​បង់​តាមគ្រឹះស្ថានធនាគារ​

​តាមរយៈក្រសួង​រៀបចំដែនដី បានបើកកិច្ចប្រជុំជាមួយអ្នកធ្វើការពាក់ព័ន្ធ​លើវិស័យអចលនទ្រព្យ និងស្ថាប័នហិរញ្ញវត្ថុ ដើម្បី​​សម្របសម្រួលជាមួយភាគីអតិថិជន ដែលបង់ផ្ទះរំលស់​ជាមួយម្ចាស់បុរីដែល​មាន​អាត្រាការប្រាក់ខ្ពស់ អាចផ្ទេរបំណុល​ទៅបង់ជាមួយគ្រឹះស្ថានធនាគារ ក្នុងអាត្រាការប្រាក់ទាប។

តាមរយៈការសម្របសម្រួលនេះ ក៏​នឹង​ជួយដល់​ម្ចាស់អភិវឌ្ឍ​គម្រោង​ដែលជាប់គាំងទុនបង្វិល បានលុយដុំមកបន្តអភិវឌ្ឍគម្រោង​​របស់ខ្លួន ហើយក៏នឹងជួយអតិថិជន​ទទួលបានឥណទានពីគ្រឹះស្ថានធនាគារ ដែលជាទូទៅមានការប្រាក់ទាបជាងលើការ​បង់ទិញ​អចលទ្រព្យ។

>បន្ធូរបន្ថយការប្រាក់កម្ចីសម្រាប់ការអភិវឌ្ឍលំនៅឋាន និងទិញអចលនទ្រព្យ

តាមរយៈជំនួបពិភាក្សាការងារនៅ​ក្នុងវេទិការាជរដ្ឋាភិបាល-ផ្នែកឯកជន រវាងក្រសួងរៀបចំដែនដី នគរូបនីយកម្ម និងសំណង់ និង​គ្រឹះស្ថានធនាគារ និងហិរញ្ញវត្ថុ និងភាគីពាក់ព័ន្ធមួយចំនួនទៀត បានឯកភាពគាំទ្រគំនិតផ្តួចផ្តើមក្នុងការបន្ធូរបន្ថយការប្រាក់លើកម្ចីសម្រាប់ការអភិវឌ្ឍលំនៅឋាន និងទិញអចលនទ្រព្យមកនៅត្រឹម ៨% ក្នុង ១ ឆ្នាំ ជាការរួមចំណែក​ក្នុងការជួយសម្រួល និងជំរុញឱ្យវិស័យអចលនទ្រព្យនៅកម្ពុជាមានភាពល្អ​ប្រសើរ និងស្ទុះ​​ងើបឡើងវិញ។

ដ្បិតកន្លងមកអត្រាការប្រាក់កម្ចីសម្រាប់វិស័យអចលនទ្រព្យចន្លោះពី ១២% ទៅ១៨% ក្នុង ១ ឆ្នាំ ហើយ​ការបន្ធូរបន្ថយការ​ប្រាក់លើកម្ចីសម្រាប់ការអភិវឌ្ឍលំនៅឋាន និងទិញអចលនទ្រព្យមកត្រឹម ៨% ក្នុងមួយឆ្នាំ ​នឹងផ្តល់​លទ្ធភាពឲ្យពលរដ្ឋ​​អាច​ទិញលំនៅឋាន រួមទាំង​ការ​​អនុវត្តកាតព្វកិច្ចសងត្រឡប់កាន់តែមានភាពងាយស្រួល។

ដោយឡែក កាលពីថ្ងៃទី ៨ ខែ​ឧសភាព ឆ្នាំ ២០២៥ មានកិច្ចប្រជុំមួយ ដែល​មានការ​ចូលរួមពី​ក្រុមការងារក្រសួងរៀបចំដែនដី នគរូបនីយកម្ម និងសំណង់ ដឹកនាំ​ដោយ​លោក សាយ សំអាល់ និងវិស័យឯកជន ដែលមានតំណាងធនាគារជាតិ សមាគមអ្នកអភិវឌ្ឍន៍លំនៅឋាន សមាគមធនាគារនៅកម្ពុជា សមាគមមីក្រូហិរញ្ញវត្ថុ សមាគមអ្នកសាងសង់កម្ពុជា និង​ធនាគារចិន (Bank Of China)។

ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ បានគូសបញ្ចាក់ថា កិច្ចប្រជុំនេះធ្វើឡើង​ដើម្បីពិភាក្សា​លើការប្រើប្រាស់ឥណទានពីក្រៅប្រទេស ដើម្បីស្ដារវិស័យអចលនទ្រព្យនៅកម្ពុជា ខណៈ​ដែល​ធនាគារចិន (Bank of China) បានលើកនូវជម្រើសថ្មីជូនអ្នកអភិវឌ្ឍលំនៅឋាន និងអ្នកដែលបានទិញផ្ទះ និងមានបំណងទិញផ្ទះ ដោយធនាគារនឹងផ្តល់នូវអត្រាការប្រាក់ដែលមានភាពប្រកួតប្រជែងពី ៦,២% ទៅ ៦,៥%។

បើតាមលោករដ្ឋមន្រ្តី ការ​ចូលរួមវិនិយោគក្នុងវិស័យប្រាក់កម្ចី ដែលមានអត្រាការប្រាក់ទាបសម្រាប់អតិថិជនក្នុងប្រទេស​កម្ពុជា ជាកត្តាល្អមួយសម្រាប់ប្រជាពលរដ្ឋ ដែលមានបំណងចង់ទិញលំនៅឋានសម្រាប់រស់នៅ ហើយមិនទាន់មានលទ្ធភាពគ្រប់គ្រាន់ គឺអាចមានឱកាសទិញលំនៅឋានបានតាមរយៈប្រាក់កម្ចី ដែលមានអត្រាការប្រាក់ទាបសមស្របតាមលទ្ធភាពដែលខ្លួនមាន ហើយនេះក៏ជាកត្តាល្អមួយដែលជំរុញឱ្យវិស័យអចលនទ្រព្យនៅក្នុងប្រទេសកម្ពុជា មានដំណើរការល្អឡើងវិញ ដោយសារប្រជាពលរដ្ឋមានលទ្ធភាពទិញផ្ទះ ហើយសំណង់លំនៅឋានដែលនៅសេសសល់នោះក៏អាចលក់អស់និងមិនជាប់គាំងផងដែរ។

>ដោះស្រាយ​គម្រោង​ជាប់គាំងតាមបុរី

បញ្ហាវិវាទរវាងអតិថិជនជាមួយម្ចាស់គម្រោង​អភិវឌ្ឍ​តាម​បុរី​មួយ​ចំនួន ទទួលបានផលវិជ្ជមានច្រើន ក្រោយ​ស្ថាប័នជំនាញរបស់​រដ្ឋាភិបាល​ បាន​បន្តរកដំណោះស្រាយ​ឆ្លើយតប​តាមសំណូមពររបស់ពលរដ្ឋ។

បញ្ហាវិវាទរវាងអតិថិជនជាមួយម្ចាស់គម្រោង​អភិវឌ្ឍបុរី បានកើតឡើងអស់រយៈពេលជាច្រើនឆ្នាំមកហើយ ដោយសារតែភាគីអតិថិជនដែលទិញ​គម្រោង​បុរីរបស់ម្ចាស់​គម្រោង​អភិវឌ្ឍ មិនទទួលបានបណ្ណបំបែកក្បាលដីពីភាគីម្ចាស់បុរី ក្រោយដែល​ម្ចាស់បុរី ជាប់ពាក្យបណ្តឹង និងការ​ចាប់ខ្លួន​ពី​តុលាការ។

តាមរយៈ​ក្រសួងរៀបចំដែនដី នគរូបនីយកម្ម និងសំណង់ បាន​​សម្របសម្រួល​ដល់​ពលរដ្ឋ​ រៀបចំ​នីតិវិធី​ដើម្បី​អាច​ស្នើសុំប្លង់កម្មសិទ្ធិកាន់អចលនទ្រព្យពី​គម្រោង​អភិវឌ្ឍ។

>បន្តលើកទឹកចិត្ត​ពន្ធលើអចលនទ្រព្យ សម្រាប់គម្រោងអគារជាប់គាំងនៅក្នុងខេត្តព្រះសីហនុ​រហូត​ដល់ឆ្នាំ ២០២៨

តាមរយៈសេចក្តីប្រកាស​របស់​ក្រសួងសេដ្ឋកិច្ច និងហិរញ្ញវត្ថុ ​រាជរដ្ឋាភិបាលសម្រេចបន្តការលើកទឹកចិត្តបន្ថែម​លើការ​លើកលែងពន្ធ​លើអចលនទ្រព្យ​សម្រាប់​ «កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤» ​ដែលផុតកំណត់​នៅដំណាច់ឆ្នាំ ២០២៥ ដែល​នឹង​ត្រូវ​បន្ត​​រហូតដល់ដំណាច់ឆ្នាំ២០២៨។

ការសម្រេច​​បន្តលើកទឹកចិត្តនេះ ​សម្រាប់គម្រោងអគារជាប់គាំងនៅក្នុងខេត្តព្រះសីហនុ ដែលបានសាងសង់ចាប់ពីឆ្នាំ​២០១៦ ទោះបីជាបានឬមិនទាន់បានបញ្ចប់ការសាងសង់នៅក្នុងឆ្នាំ២០២៥ក្តី។

ការផ្តល់ជូននេះមានវិសាលភាព គ្របដណ្តប់ចំពោះគម្រោងអគារជាប់គាំងនៅក្នុងខេត្តព្រះសីហនុ ដែលស្ថិតឬមិនស្ថិតក្នុង​ក្របខ័ណ្ឌនៃ «កម្មវិធីពិសេស ជំរុញការវិនិយោគក្នុងខេត្តព្រះសីហនុ ឆ្នាំ២០២៤»។

>បន្ថែមពីនេះ ការ​លើកលែងពន្ធក៏ជា​​យុទ្ធសាស្ត្រ ក្នុងការបង្កើតបរិយាកាសជំរុញ​ការវិនិយោគលើអចលនទ្រព្យ ដែលកន្លងទៅរដ្ឋាភិបាលក៏បានប្រកាស​​ការលើកទឹកចិត្តពន្ធដារលើអចលនទ្រព្យសំខាន់ៗមួយ​ចំនួនដូចជា៖

-ការលើកលែងពន្ធប្រថាប់ត្រាលើការផ្ទេរអចលនទ្រព្យមួយចំនួន ជាពិសេសនៅក្នុងគម្រោងបុរី (ការអភិវឌ្ឍលំនៅដ្ឋាន) ដែលមានតម្លៃ ឬក្រោម ៧០,០០០ ដុល្លារ គឺត្រូវបានលើកលែងពីការបង់ពន្ធប្រថាប់ត្រាលើការផ្ទេរកម្មសិទ្ធិ។ វិធានការនេះ មានគោលបំណងលើកទឹកចិត្តក្នុងចំណោមគ្រួសារដែលមានប្រាក់ចំណូលទាប។ ពន្ធផ្ទេរអចលនទ្រព្យស្តង់ដារគឺ៤ ភាគរយ នៃតម្លៃអចលនទ្រព្យ។

-ការពន្យារពេលលើពន្ធចំណេញមូលធន ត្រូវបានពន្យារពេលរហូតដល់ថ្ងៃទី៣១ ខែធ្នូ ឆ្នាំ២០២៥ សំដៅបន្ធូរបន្ថយសម្ពាធហិរញ្ញវត្ថុលើម្ចាស់អចលនទ្រព្យ និងអ្នកអភិវឌ្ឍក្នុងអំឡុងពេលជួបវិបត្តិសេដ្ឋកិច្ច។

-ការលើកលែងពន្ធលើដីធ្លីដែលមិនបានប្រើប្រាស់ ទំហំដីក្រោម៥ហិកតា​ ដែល​ត្រូវបានលើកលែងពន្ធដែលមានប្រសិទ្ធភាពចាប់ពីថ្ងៃទី១ ខែមករា ឆ្នាំ២០២៥។

-ពន្ធលើអចលនទ្រព្យត្រូវបានកំណត់ក្នុងអត្រា ០.១% លើតម្លៃអចលនទ្រព្យលើសពី ១០០ លានរៀល (ប្រហែល ២៥,០០០ ដុល្លារអាមេរិក) ក្នុងមួយឆ្នាំ។ អចលនទ្រព្យនៅកម្ពុជាដែលមានតម្លៃទាបជាងនេះ ត្រូវបានលើកលែងយោងតាមប្រកាសលេខ ៥៧៦ ដែលមានប្រសិទ្ធភាពចាប់ពីខែមករា ឆ្នាំ២០២៥។

-ការបង់ពន្ធសរុប (Lump-sum payment)៖ ការដាក់ចេញការបង់ពន្ធសរុបសម្រាប់អ្នកអភិវឌ្ឍអចលនទ្រព្យជួយសម្រួលដល់ការអនុលោមតាមពន្ធ និងអាចជួយគ្រប់គ្រងលំហូរសាច់ប្រាក់បានល្អប្រសើរ។ វិធីសាស្រ្តនេះកាត់បន្ថយបន្ទុករដ្ឋបាល និងផ្តល់ភាពច្បាស់លាស់ទាក់ទងនឹងកាតព្វកិច្ចពន្ធ។

-ការអនុគ្រោះសម្រាប់ការមិនប្រកាសពន្ធ៖ អ្នកអភិវឌ្ឍដែលមិនបានប្រកាសពន្ធលើអចលនទ្រព្យអាចទាញយកអត្ថប្រយោជន៍ពីការអនុគ្រោះទាំងនេះ ប្រសិនបើពួកគេចុះឈ្មោះ និងបង់ពន្ធចំនួនត្រឹមត្រូវត្រឹមខែមិថុនា ឆ្នាំ២០២៥។ នេះលើកទឹកចិត្តឱ្យមានការអនុលោមតាម និង ការកែតម្រូវការប្រកាសពន្ធពីមុនដោយគ្មានផលប៉ះពាល់ផ្នែកហិរញ្ញវត្ថុធ្ងន់ធ្ងរ៕