អាជ្ញាធរខណ្ឌ៧មករា ទុក​ឱសានវាទ​៣ថ្ងៃ ដល់​ក្រុម​អាជីវករ​លក់​ទុរេន នៅផ្លូវព្រះសីហនុ បង្ក​ភាព​អនាធិបតេយ្យ

ភ្នំពេញ ៖ កម្លាំង​គណៈបញ្ជាការ​ឯកភាពខណ្ឌ៧មករា ចុះ​អប់រំណែនាំ និង ធ្វើ​កិច្ច​សន្យា​ដល់​អាជីវករ​លក់ធុរេន នៅ​កំណាត់វិថីព្រះសីហនុ ដោយ​ទុក​ឱសានវាទ រយៈពេល ៣ថ្ងៃ​ឱ្យ​បញ្ឈប់​ការ​ធ្វើ​អាជីវកម្ម​យ៉ាងអាណាធិបតេយ្យ បង្កភាព​រញ៉េរញ៉ៃ ធ្វើ​ឱ្យខូចសណ្តាប់ធ្នាប់សាធារណៈ និង​ប៉ះពាល់​ដល់​សោភ័ណភាព​ទីតាំង​អគារ​ទូរគមនាគមន៍កម្ពុជា។

ទីតាំង​ដែលក្រុមអាជីវកលក់ទុរេននោះ ស្ថិត​នៅ​មុខ​អគារ​ទូរគមនាគមន៍កម្ពុជា ជា​សហគ្រាស​សាធារណៈ​របស់​រដ្ឋ មានអាសយដ្ឋានលេខ ៩៥-៩៧ វិថីព្រះសីហនុ កែងផ្លូវ១០៥ ភូមិ០១ សង្កាត់បឹងព្រលឹត ខណ្ឌ៧មករា រាជធានីភ្នំពេញ។

ការ​ចុះអប់រំនិងធ្វើកិច្ចសន្យានេះ បានធ្វើឡើងនៅវេលាម៉ោង៦និង៣០នាទីល្ងាចថ្ងៃទី០៧ ខែឧសភា ឆ្នាំ២០២៥ ដោយមានការណែនាំនិងដាក់បទបញ្ជាពីសំណាក់ លោក ថេង សុថុល អភិបាលខណ្ឌ៧មករា អនុញ្ញាត​ឱ្យ លោក គ្រួច សុធន នាយករង​រដ្ឋបាល ដឹកនាំ​កម្លាំងគណៈបញ្ជាការឯកភាពខណ្ឌ ចុះអប់រំណែនាំ និងធ្វើកិច្ចសន្យា ទុក​ឱសានវាទ​រយៈពេល០៣ថ្ងៃ ឱ្យបញ្ឈប់ការធ្វើអាជីវកម្មលក់នៅកំណាត់វិថីព្រះសីហនុនេះ។

លោក គ្រួច សុធន នាយករងរដ្ឋបាលបានបញ្ជាក់ថា ក្រោយ​មាន​ការ​អនុញ្ញាត​ពី លោក​អភិបាលខណ្ឌ៧មករា និង​មាន​ការ​សំណូមពរ​ពី ទូរគមនាគមន៍​កម្ពុជា ដល់អាជ្ញាធរមូលដ្ឋាន ពី​បញ្ហា​ក្រុមអាជីវកលក់ធុរេន ធ្វើអាជីវកម្មការចតរថយន្ត ឬ​រទេះ និង​តាំង​លក់​ដូរ យ៉ាងអាណាធិបតេយ្យ បង្កភាព​រញ៉េរញ៉ៃ ធ្វើឱ្យខូចសណ្តាប់ធ្នាប់សាធារណៈ និងប៉ះពាល់ដល់សោភ័ណភាពទីតាំងអគារ សុំ​ឱ្យ​បញ្ឈប់​ការ​លក់ដូរ​បែប​នេះ និង​សំណូមពរ​ឱ្យ​ទៅ​រក​ទីតាំង​ផ្សេង។

ក្នុងនោះលោកនាយករងរដ្ឋបាលបានធ្វើកិច្ចសន្យាណែនាំ ដល់ក្រុមអាជីវករ តែ​មាន​ក្រុមអាជីវករមួយចំនួនមិន​បាន​ចូលរួម​សហការជាមួយអាជ្ញាធរនោះ ប៉ុន្តែ​ទោះ​ជា​យ៉ាងណារដ្ឋបាលខណ្ឌបានជូនដំណឹង ដោយទុក​ឱសានវាទ​រយៈពេល៣ សម្រាប់រកទីតាំងថ្មី ដោយគិតចាប់ពីថ្ងៃទី០៧ដល់ ថ្ងៃទី០៩ ខែឧសភា ឆ្នាំ២០២៥ជាកំណត់។

ក្នុង​ករណី​ម្ចាស់​ទីតាំង​អាជីវករ មិន​គោរព​តាមការ​ណែនាំរបស់អាជ្ញាធរ រដ្ឋបាលខណ្ឌ​នឹង​ចាត់​វិធាន​រុះរើ ដកហូត យកមករក្សាទុកនៅសាលាខណ្ឌ៧មករា ដោយ​មិន​ទទួល​ខុស​ត្រូវ​លើការ​ខូចខាត ឬ​បាត់​បង់​ឡើយ៕

អត្ថបទ ៖ ម៉េង