រុស្ស៊ី បិទព្រលានយន្តហោះធំទាំងអស់នៅមូស្គូ ក្រោយអ៊ុយក្រែន បញ្ជូនដ្រូនវាយប្រហារទ្រង់ទ្រាយធំ ២យប់ជាប់គ្នា

ទីក្រុងមូស្គូត្រូវបង្ខំចិត្តបិទអាកាសយានដ្ឋានធំទាំង៤របស់ខ្លួនជាបណ្តោះអាសន្នសិនដើម្បីសុវត្ថិភាព បន្ទាប់ពីអ៊ុយក្រែន បើកប្រតិបត្តិការវាយប្រហារដោយដ្រូនទ្រង់ទ្រាយធំ២យប់ជាប់គ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC នៅថ្ងៃអង្គារទី៦ខែឧសភាឆ្នាំ២០២៥, អាកាសយានដ្ឋានអន្តរជាតិធំទាំងបួននៅក្នុងទីក្រុងមូស្គូមានដូចជា Sheremetyevo, Domodedovo, Vnukovo និង Zhukovsky។

ការបិទនេះបង្កផលប៉ះពាល់និងរំខានដល់ជើងហោះហើររាប់រយជើង ជាពិសេសចំពោះក្រុមហ៊ុនអាកាសចរណ៍ Aeroflot, SkyTeam, S7, Oneworld, Star Alliance, Turkish Airlines និង Wizz Air Abu Dhabi។

ពាក់ព័ន្ធការវាយប្រហារនៅរដ្ឋធានីនៃប្រទេសរុស្ស៊ីនេះដែរ បើតាមការចុះផ្សាយរបស់ RT, ដ្រូនអ៊ុយក្រែនចំនួន១៩គ្រឿងត្រូវស្ទាក់ចាប់បាន ខណៈអភិបាលក្រុងមូស្គូលោក Sergey Sobyanin បញ្ជាក់ថា គ្មានជនស៊ីវិលណាម្នាក់បាត់បង់ជីវិតឬរងរបួសក្នុងហេតុការណ៍នេះទេ។

ស្របពេលជាមួយគ្នានោះ លោកនិយាយថា សេវាសង្គ្រោះបន្ទាន់កំពុងធ្វើការនៅកន្លែងកើតហេតុដើម្បីវាយតម្លៃការខូចខាត និងចាត់វិធានការចាំបាច់គ្រប់បែបយ៉ាង។

ការវាយប្រហារនេះកើតឡើង ចំពេលរុស្ស៊ី កំពុងត្រៀមរៀបចំប្រារព្ធខួបលើកទី៨០នៃបរាជ័យរបស់ណាស៊ីអាល្លឺម៉ង់ ក្នុងសង្គ្រាមលោកលើកទីពីរ។

ប្រធានាធិបតីរុស្ស៊ី វ្ល៉ាឌីមៀរ ពូទីន បានបញ្ជាឲ្យមានបទឈប់បាញ់ជាឯកតោភាគីរយៈពេលបីថ្ងៃ ដើម្បីប្រារព្ធពិធីនេះ ប៉ុន្តែមេដឹកនាំអ៊ុយក្រែន វ៉ូឡូឌីមៀរ ហ្សេលេនស្គី បដិសេធ ដោយនិយាយថា ទីក្រុងកៀវទទួលយកតែបទឈប់បាញ់រយៈពេលវែងប៉ុណ្ណោះ៕

អត្ថបទ៖ សុខ សុវណ្ណ

ចុចអាន៖ ពូទីន៖ ខ្ញុំ​សង្ឃឹម​ថា អាវុធ​នុយក្លេអ៊ែរ​នឹង​មិន​ត្រូវ​បាន​ប្រើ​ក្នុង​ជម្លោះ​អ៊ុយក្រែ​ន