អគ្គិភ័យឆេះផ្ទះស្តុកគ្រឿងបន្លាស់រថយន្តបណ្ដាលឲ្យខូចខាតសម្ភារៈមួយចំនួន

ទីតាំងស្តុកទំនិញជាន់ទី១របស់ផ្ទះលក់គ្រឿងបន្លាស់រថយន្តយីហោ ៩៩ ត្រូវបានអគ្គិភ័យឆាបឆេះបណ្តាល​ឱ្យខូចខាតសម្ភារៈមួយចំនួន។ ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង១០និង៤០នាទីព្រឹកថ្ងៃទី​២៦ ខែមករា​ ឆ្នាំ២០២៥​ ស្ថិតនៅតាមផ្លូវលេខ១៥៦ហ្សិត កែង២២៣​ សង្កាត់ផ្សារដេប៉ូទី១ ខណ្ឌទួលគោក​ រាជធានីភ្នំពេញ​។

ប្រភពពីកន្លែងកើតហេតុ បាននិយាយថា មុនពេលកើតហេតុគេឃើញអណ្ដាតភ្លើងបានឆាបចេះចេញពីជាន់ទី១ ផ្នែកចំហៀងខាងក្រោយ នៃផ្ទះលក់គ្រឿងបន្លាស់រថយន្តយីហោ ៩៩ បង្កឲ្យមានការភ្ញាក់ផ្អើលដល់ប្រជាពលរដ្ឋនាំគ្នាជួយអន្តរាគមន៍បាញ់ពន្លត់ និងទាក់ទងរថយន្តពន្លត់អគ្គិភ័យជាច្រើនគ្រឿងទៅអន្តរាគមន៍ហើយភ្លើងបានរលត់ទៅវិញនៅវេលាម៉ោង១១និង១០នាទីថ្ងៃដដែរ។

តាមមន្ត្រីនគរបាលមូលដ្ឋានបានអោយដឹងថា អគ្គិភ័យនេះបណ្ដាលឲ្យសម្ភារៈមួយចំនួននៅជាន់ទី១បានរងការខូចខាត ទោះបីជាយ៉ាងណាពុំបណ្ដាឲ្យឆេះរាលដាលធ្ងន់ធ្ងរឡើយ។ ទាក់ទិននឹងការកើតមានអគ្គិភ័យនេះគេសង្ស័យថា បណ្ដាលមកពីឆ្លងចរន្តអគ្គិសនី ហើយករណីអគ្គិភ័យខាងលើ ប្រើប្រាស់ទឹកចំនួន៣រថយន្ត និងរលត់នៅម៉ោង១១និង៣០ថ្ងៃដដែល៕

អត្ថបទ៖ សំណាង