កីឡា

ក្រាក់ សម្ភស្ស នឹងទិញដី ធ្វើផ្ទះ បន្ទាប់ពីទទួលបានប្រាក់ឧបត្ថម្ភពីសម្តេចតេជោ

បានផុស

៤ years មុន

នៅ

ថ្ងៃចន្ទ ១៥ សីហា ២០២២

ដោយ

អតីតកីឡាករប្រដាល់ជើងខ្លាំង ក្រាក់ សម្ភស្ស នឹងទិញដី និងធ្វើផ្ទះសម្រាប់រស់នៅសមរម្យ ព្រមទាំងធ្វើជាដើមទុនដើម្បីរកស៊ី បន្ទាប់ពីទទួលបានថវិកាជាអំណោយដ៏ថ្លៃថ្លារបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចំនួន ២ម៉ឺន ដុល្លារអាមេរិក។

កាលពីថ្ងៃសៅរ៍ ទី១៣ ខែសីហា ចុងសប្តាហ៍កន្លងទៅនេះ លោក ផេង វណ្ណៈ បានយកថវិកាឧបត្ថម្ភរបស់សម្តេចតេជោ និងសម្ដេចកិត្តិព្រឹទ្ធបណ្ឌិតទៅប្រគល់ជូនផ្ទាល់ដល់ដៃរបស់អតីតអ្នកលេងគុនខ្មែរ ក្រាក់ សម្ភស្ស និងភរិយា នៅភូមិ ព្រៃធំ ឃុំកំពង់ល្ពៅ ស្រុក សំឡូត ខេត្តបាត់ដំបង។ យ៉ាងណា ប្រាក់នឹងផ្ទេរជូនតាមរយៈគណនីធនាគារ នៅពេលអតីតកីឡាកររូបនេះបើកគណនីនៅធនាគាររួចរាល់ ប្រហែលជាថ្ងៃចន្ទនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការគ្រោងទុក ក្រាក់ សម្ភស្ស និងភរិយា នឹងទិញដីមួយកន្លែងសម្រាប់សង់ផ្ទះសមរម្យមួយដើម្បីរស់នៅ។ ចំណែកថវិកាសល់ប៉ុន្មានទៀតទុកធ្វើជាដើមទុនសម្រាប់រកស៊ី។

តាំងពីឃ្លាតឆ្ងាយពីសង្វៀនប្រដាល់គុនខ្មែរមក ក្រាក់ សម្ភស្ស បានបាត់ឈឹងមិនថាឡើងសង្វៀន ធ្វើជាគ្រូបង្ហាត់ ឬកិច្ចការអ្វីពាក់ព័ន្ធនឹងប្រដាល់ឡើយ។ ទើបតែថ្មីៗក៏លេចមុខ ក្រាក់ សម្ភស្ស បង្ហាញពីជីវភាពខ្វះខាតយ៉ាងខ្លាំង។ សូម្បីតែផ្ទះក៏គ្មានរស់នៅសមរម្យនឹងគេពោលគឺរស់នៅក្នុងខ្ទមកម្សត់តូចមួយនេះ។

ក្រោយមានការលំបាកខ្វះខាតយ៉ាងខ្លាំងបែបនេះក៏មានសប្បុរសជនមួយចំនួនឧបត្ថម្ភថវិកា និងគ្រឿងបរិភោគផ្សេង។ ជាពិសេស សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានឧបត្ថម្ភចំនួន ២ម៉ឺន ដុល្លារអាមេរិក។

ប្រសិនបើ ក្រាក់ សម្ភស្ស គ្រប់គ្រងក្នុងការចាយវាយថវិកាបានល្អ ហើយមានទីលំនៅសមរម្យា នាពេលខាងមុខ រូបគេអាចឈានជើងចូលក្នុងវិស័យប្រដាល់គុនខ្មែរវិញដូចជាបើកក្លឹបប្រដាល់ ធ្វើជាគ្រូបង្វឹក ឬក៏អាជ្ញាកណ្តាល ចៅក្រមជាដើម៕

អត្ថបទ៖ វីរបុត្រ