កីឡា

អតីតអ្នកប្រដាល់៥រូបកំពុងលេចធ្លោក្នុងអាជីពគ្រូបង្ហាត់

បានផុស

៣ years មុន

នៅ

ថ្ងៃអង្គារ ២០ មិថុនា ២០២៣

ដោយ

អតីតកីឡាករប្រដាល់ល្បីឈ្មោះកាលពី១០ឆ្នាំមុនមួយចំនួនបានក្លាយជាគ្រូបង្ហាត់ ចៅក្រម និងអាជ្ញាកណ្តាលលេចធ្លោនាពេលបច្ចុប្បន្ននេះ បន្ទាប់ពីពួកគាត់បានឈប់ពីអាជីពប្រដាល់។ អ្នកខ្លះបានក្លាយជាគ្រូបង្ហាត់ជម្រើសជាតិទាំងផ្នែកគុនខ្មែរ និងឃីកបុកស៊ីងថែមទៀតផង។

ថ្ងៃនេះ សូមបង្ហាញអតីកីឡាករប្រដាល់គុនខ្មែរ៥រូបដែលកំពុងទទួលបានជោគជ័យ និងលេចធ្លោក្នុងនាមជាគ្រូបង្ហាត់ និងជាចៅក្រម អាជ្ញាកណ្តាលរបស់សហព័ន្ធកីឡាប្រដាល់គុនខ្មែរថែមទៀត។

លោក អេ ភូថង

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អេ ភូថង បានក្លាយជាគ្រូបង្ហាត់ប្រដាល់គុនខ្មែរជាង១០ឆ្នាំមកហើយ បន្ទាប់ពីលោកបានឈប់ប្រដាល់។ ការតស៊ូប្រឹងប្រែងពីដៃទទេ អតីតជើងខ្លាំងរូបនេះបានបើកក្លិបប្រដាល់ផ្ទាល់ខ្លួនឈ្មោះ«ក្លិបប្រដាល់គុនខ្មែរ អេ ភូថង»ដែលមានសិស្សប្រហែលជា២០នាក់។ កូនសិស្សរបស់លោកដែលល្បីៗមានដូចជា ធឿន ធារ៉ា, យ៉េន ឌីណា, អេ ណារ័ត្ន និងជាពិសេសកូនប្រុសរបស់លោកគឺ អេ អាំម៉ារីនភូថង និង ម៉ឺន មេឃា ជាដើម។ ក្រៅពីអាជីពគ្រូបង្ហាត់ លោកក៏ជាអាជ្ញាកណ្តាល និងចៅក្រមមួយរូបរបស់សហព័ន្ធកីឡាប្រដាល់គុនខ្មែរដែ។

លោក ធន់ សុភា

កូនសិស្សរបស់លោកគ្រូ ឈិត សារឹម រូបនេះបានឈប់ពីប្រដាល់កាលពីឆ្នាំ២០១២ដើម្បីក្លាយជាគ្រូបង្ហាត់ម្នាក់។ ស្ថិតក្នុងវ័យ៤៤ឆ្នាំ លោក ធន់ សុភា ជាគ្រូបង្ហាត់នៅក្លិបប្រដាល់របស់សមាគមកីឡាប្រដាល់កងយោធពលខេមរភូមិន្ទដែលមានកូនសិស្សជាច្រើនរូបនេះ។ សិស្សល្បីៗរបស់លោកមានដូចជា ធន់ ផានិត, ធន់ រិទ្ធី, ធន់ មករា, ធន់ ចាន់តាក់ជាដើម។ លោកក៏ជាអាជ្ញាកណ្តាលដ៏មានប្រជាប្រិយភាពប្រចាំសង្វៀនបាយ័ន។

លោក ពេជ្រ សុផាន់

លោក ពេជ្រ សុផាន់ អាចត្រូវបានគេចាត់ទុកអាជីពគ្រូបង្ហាត់ទទួលបានជោគជ័យជាងអាជីពជាកីឡាករថែមទៀត។ លោកជាគ្រូបង្ហាត់នៅក្លិប«ចលនាយុវជន១៥៧គុនខ្មែរ» ដែលមានកូនសិស្សល្បីៗជាច្រើនដូចជា ពេជ្រ សម្បត្តិ, ពេជ្រ ប៊ុនសិទ្ធ, ពេជ្រ សុខឃីមជាដើម។ លោកក៏ជាចៅក្រម និងអាជ្ញាកណ្តាលប្រចាំសហព័ន្ធកីឡាប្រដាល់គុនខ្មែរ១រូបផងដែរ។

លោក សាន សៅយ៉ាន់

បុរសភ្នែកលិចតិចៗនេះកំពុងជោគជ័យជាគ្រូបង្ហាត់ទាំងនៅក្លិប និងជម្រើសជាតិ។ លោកជាគ្រូប្រចាំក្លិបសៅយ៉ាន់នាគគា ក្នុងខេត្តបន្ទាយមានជ័យ ប៉ុន្តែពីរឆ្នាំចុងក្រោយនេះលោកបានក្លាយជាគ្រូបង្ហាត់ឃីកបុកស៊ីងជម្រើសជាតិកម្ពុជាដែលជួយឲ្យកម្ពុជាទទួលបានមេដាយមាស៦គ្រឿងពីកីឡាស៊ីហ្គេម។

លោក សេន ប៊ុនថេន

បច្ចុប្បន្ននេះ សេន ប៊ុនថេន ជាគ្រូបង្ហាត់ប្រចាំក្លិប្រដាល់ប៉ែនកាក់គុនខ្មែរដែលមានសិស្សល្បីៗជាច្រើន និងជាគ្រូបង្ហាត់ប្រដាល់គុនខ្មែរជម្រើសជាតិកម្ពុជាដែលទើបតែជួយក្រុមជម្រើសជាតិបានឈ្នះមេដាយមាស១៤គ្រឿងពីកីឡាស៊ីហ្គេម ឆ្នាំ២០២៣នៅកម្ពុជា៕