កីឡា

ព្រះខ័នរាជស្វាយរៀងជាក្រុមលេងពាន AFC Challenge និង AFF Club

បានផុស

២ years មុន

នៅ

ថ្ងៃចន្ទ ៦ ឧសភា ២០២៤

ដោយ

អ្នកគាំទ្រ និងផេកខ្លះនៅតែយល់ច្រឡំពីក្លិបបាល់ទាត់ភ្នំពេញក្រោនជាក្រុមតំណាងកម្ពុជាចូលរួមប្រកួតជើងឯកក្លិបអាស៊ាន (ASEAN Club Championship) សម្រាប់រដូវកាល២០២៤-២៥ ប៉ុន្តែក្លិបព្រះខ័នរាជស្វាយរៀងជាក្រុមត្រូវប្រកួតក្នុងរដូវកាលខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Christonpher Grant អគ្គលេខាធិការក្លិបបាល់ទាត់ព្រះខ័នរាជស្វាយរៀងបានប្រាប់សារព័ត៌មាន«កម្ពុជាថ្មី»ថា ព្រះខ័នរាជស្វាយរៀង ក្នុងនាមជាជើងឯកលីគកំពូលកម្ពុជា ជាក្រុមតំណាងកម្ពុជាចូលរួមប្រកួតជើងឯកក្លិបអាស៊ាន (ASEAN Club Championship) នៅរដូវកាលក្រោយ គឺមិនមែនភ្នំពេញក្រោនទេ។

មិនត្រឹមតែប៉ុណ្ណោះ ព្រះខ័នរាជស្វាយរៀង ជាក្លិបតំណាងកម្ពុជាលេងក្នុងពានរង្វាន់អាស៊ីលំដាប់ទី៣ AFC Challenge League រដូវកាលក្រោយ។ លោក Christonpher Grant បានបញ្ជាក់ថា ព្រះខ័នរាជស្វាយរៀងត្រូវបានប្រកួតជម្រុះ (Playoff Round) សម្រាប់ពានរង្វាន់ទាំងពីរនេះពោលគឺមិនឡើងទៅវគ្គចែកពូលស្វ័យប្រវត្តិនោះទេ។

លោក ខៀវ សាម៉េត ប្រធានសហព័ន្ធកីឡាបាល់ទាត់អាស៊ានបាននិយាយមុនព្រះខ័នរាជស្វាយរៀងក្លាយជាជើងឯកថា ក្លិបជើងឯកលីគកំពូលកម្ពុជារដូវកាលនេះនឹងតំណាងឲ្យក្លិបកម្ពុជាចូលរួមប្រកួតពានរង្វាន់ AFF Club Championship។ ព្រះខ័នរាជស្វាយរៀងជាជើងឯក លោកនឹងព្យាយាមពិនិត្យពីលទ្ធភាពដែលអាចដាក់វីដេអូជំនួយអាជ្ញាកណ្តាល (VAR) នៅកីឡដ្ឋានខេត្តស្វាយរៀងសម្រាប់ការប្រកួតពានរង្វាន់ក្លិបអាស៊ានមួយនេះ។

ព្រះខ័នរាជស្វាយរៀង បានក្លាយជាក្រុមដំបូងគេក្នុងរយៈពេល១៦ឆ្នាំចុងក្រោយសម្រាប់ការឈ្នះជើងឯក២ក្នុង១រដូវកាល បន្ទាប់ពីឈ្នះពានរង្វាន់សម្តេចតេជោ ហ៊ុន សែន លើកទី១៧ កាលពីថ្ងៃទី២៨ ខែមេសា និងឈ្នះជើងឯកលីគកំពូលកម្ពុជាកាលពីថ្ងៃទី៤ ខែឧសភា ឆ្នាំ២០២៤។ ភ្នំពេញក្រោនជាក្រុមដំបូងគេបង្អស់ដែលបានឈ្នះជើងឯក២ក្នុង១រដូវកាលកាលពីឆ្នាំ២០០៨។

ពានរង្វាន់ ASEAN Club Championship នឹងចាប់ឆ្នោតនៅថ្ងៃទី៩ ខែឧសភា ឆ្នាំ២០២៤ នៅប្រទេសវៀតណាម៕