កីឡា

ផ្ការីកគ្រប់រដូវ សុះ ស៊ូហាណា ជាប់ជម្រើសជាតិយូរជាងគេក្នុងបញ្ជីលើកនេះ

បានផុស

១ year មុន

នៅ

ថ្ងៃពុធ ១២ មីនា ២០២៥

ដោយ

សហព័ន្ធកីឡាបាល់ទាត់កម្ពុជាបានកោះហៅសមាជិកណាហ្គាវើលដ៍ សុះ ស៊ូហាណា ដើម្បីជំនួសកីឡាករវ័យក្មេង ជូ ស៊ីនទិ ដែលមានបញ្ហារបួសដើម្បីប្រមូលផ្តុំហ្វឹកហាត់សម្រាប់ការប្រកួត២លើកនាពេលខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខ្សែបម្រើ សុះ ស៊ូហាណា ដែលត្រូវបានអ្នកគាំទ្រដាក់រហស្សនាម«ផ្ការីកគ្រប់រដូវ»ជាកីឡាករបានជាប់ជម្រើសជាតិកម្ពុជាយូរជាងគេក្នុងចំណោមកីឡាករ២៣នាក់ដែលត្រូវបានកោះហៅចូលជម្រើសជាតិសម្រាប់ការប្រកួតមិត្តភាពអន្តរជាតិថ្ងៃ FIFA Days ជាមួយជម្រើសជាតិ វៀតណាម និង អារូបា នាពេលខាងមុខ។

មិនត្រឹមតែបានជាប់ជម្រើសជាតិយូរជាងគេប៉ុណ្ណោះទេ ប៉ុន្តែជាកីឡាករដែលមានអាយុច្រើនជាងគេថែមទៀតក្នុងបញ្ជីឈ្មោះលើកនេះ។ សុះ ស៊ូហាណា កើតនៅទី៤ ខែមេសា ឆ្នាំ១៩៩២ ដែលរហូតដល់ពេលនេះអាយុ៣២ឆ្នាំ។ ចំណែកប្រធាន កាន់ ម៉ូ ក៏អាយុ៣២ឆ្នាំដែរ ប៉ុន្តែកើតនៅថ្ងៃទី២៤ ខែកញ្ញា ឆ្នាំ១៩៩២ ដែលអាយុតិចជាង ស៊ូហាណា ប្រមាណ៤ខែ។

ខ្សែបម្រើកណ្តាល សុះ ស៊ូហាណា បានជាប់ជម្រើសជាតិកម្ពុជាតាំងពីឆ្នាំ២០១២ដោយបានបង្ហាញខ្លួនបានចំនួន៧៧ប្រកួត និងរកបាន៤គ្រាប់។

កីឡាករសម័យដំណាលគ្នានឹង សុះ ស៊ូហាណា មានមិនច្រើនទេដែលនៅបន្តលេងលក្ខណៈអាជីពឲ្យក្លិបក្នុងលីគ ហើយរឹតតែមានមិនច្រើនទៀតដែលត្រូវបានកោះហៅចូលជម្រើសជាតិ។

សុះ ស៊ូហាណា ជាកីឡាករបាល់ទាត់អាជីពម្នាក់ដែលមានភាពស្ងប់ស្ងាត់នៅលើបណ្តាញទំនាក់ទំនងសង្គម ហើយក៏ជាកីឡាករម្នាក់មិនសូវមានកេរ្តិ៍ឈ្មោះបោះសំឡេងខ្ទរខ្ទារខ្លាំង ប៉ុន្តែរក្សាបាននូវកម្រិតសមត្ថភាពមិនថមថយឡើយក្នុងរយៈពេលប្រមាណជាង១០ឆ្នាំចុងក្រោយ៕