កីឡា

ឱកាសលេងខ្សែក្រវាត់លើកទី២ ក្នុងអាជីពប្រដាល់ សៅយ៉ាន់ វិសាល មានផលចំណេញអ្វីខ្លះ…

បានផុស

១១ ខែ មុន

នៅ

ថ្ងៃអង្គារ ១៥ កក្កដា ២០២៥

ដោយ

កីឡាករវ័យក្មេង សៅយ៉ាន់ វិសាល ទទួលបានឱកាសលេងខ្សែក្រវាត់ជាលើកទី២ ខណៈឪពុករបស់គេថាចំណេញទាំងបទពិសោធ កេរ្តិ៍ឈ្មោះ និងជាការពង្រឹងសមត្ថភាពឲ្យកាន់តែល្អឆ្ពោះទៅរកភាពជោគជ័យលើវិថីគុនខ្មែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សាន សៅយ៉ាន់ និងកូនៗ

លោក សាន សៅយ៉ាន់ ឪពុករបស់ សៅយ៉ាន់ វិសាល បានឲ្យដឹងថា កូនប្រុសរបស់លោកធ្លាប់លេងខ្សែក្រវាត់បាន១ដងដែរកាលពីឆ្នាំ២០២៣ ក្នុងប្រភេទទម្ងន់ ៤៨គីឡូក្រាម។ កាលនោះ វិសាល ទទួលបានចំណាត់ថ្នាក់លេខ៣។

នេះជាឱកាសលើកទី២ ហើយដែលកូនប្រុសរបស់លោកបានលេងខ្សែក្រវាត់។ ដោយឡែកលើកនេះលេងលើប្រភេទទម្ងន់ ៥៤គីឡូក្រាមវិញម្ដង និងលេងជាមួយកីឡាករល្អៗមានបទពិសោធច្រើនប្រឡូកគុនខ្មែរយូរជាងកូនប្រុសរបស់លោក។

រូបភាពហ្វេសបុកលោក សាន សៅយ៉ាន់

គ្រូជម្រើសជាតិផ្នែកឃីកបុកស៊ីងរូបនេះបន្ថែមទៀតថា សម្រាប់ វិសាល គឺមានគ្រប់គ្រឿងអស់ហើយសព្វថ្ងៃ ដូច្នេះអាចលេងខ្សែក្រវាត់នេះជាមួយគេបាន។ ពោលបន្ថែមតែចិត្តឲ្យលះបន្តិចគឺអាចតតាំងជាមួយបេក្ខភាពផ្សេងៗនៃកម្មវិធីខ្សែក្រវាត់នេះបានហើយ។

រូបភាពហ្វេសបុកលោក សាន សៅយ៉ាន់

លោក សាន សៅយ៉ាន់ បន្ថែមទៀតថា ការអនុញ្ញាតឲ្យកូនលេងខ្សែក្រវាត់នេះគឺមានផលចំណេញសម្រាប់ វិសាល ខ្លាំងដូចជាប្រកួតច្រើនទទួលបានបទពិសោធលើសង្វៀនកាន់តែច្រើន និងធ្វើឲ្យរាងកាយកាន់តែរឹងឡើងៗ។ មួយវិញទៀតនេះជាឱកាសសាងកេរ្តិ៍ឈ្មោះជាបណ្ដើរៗផង និងបានថវិកាផ្ទាល់ខ្លួនសម្រាប់រូបគេចំណាយលើការសិក្សាបន្ថែមទៀតផងដែរ។

សៅយ៉ាន់ វិសាល និងឪពុក

បញ្ជាក់ដែរថា សៅយ៉ាន់ វិសាល ជាកូនទី២ របស់លោក សាន សៅយ៉ាន់ មានវ័យ ១៦ឆ្នាំកំពុងសិក្សាថ្នាក់ទី១០ នៅវិទ្យាល័យឥន្ទ្រទេវី រាជធានីភ្នំពេញ។ រូបគេក៏ចាប់អាជីពប្រដាល់បន្តពីឪពុកផងដែរក្រៅពីការសិក្សា។ ឥលូវនេះ វិសាល កំពុងលេងខ្សែក្រវាត់ Mas Fight ទម្ងន់ ៥៤គីឡូក្រាមនៅសង្វៀនថោន។ កូនប្រុសលោក សាន់ សៅយ៉ាន់ រូបនេះស្ថិតនៅក្នុងពូល A និងត្រូវប្រកួតសន្សំពិន្ទុក្នុងពូលដើម្បីឡើងទៅជុំទី២ ឬឆ្ពោះទៅវគ្គផ្ដាច់ព្រ័ត្រជាដើម៕