កីឡា

ស៊ន រ៉ាគីម បុកហាត់ខ្លាំង៣សប្ដាហ៍ត្រៀមប្រកួតជាថ្មីក្រោយសម្រាកព្យាបាលរបួសអស់៩ខែ

បានផុស

១០ ខែ មុន

នៅ

ថ្ងៃព្រហស្បតិ៍ ១១ កញ្ញា ២០២៥

ដោយ

អ្នកលេងគុនខ្មែរ ស៊ន រ៉ាគីម ថារូបគេបុកហ្វឹកហាត់ខ្លាំងប្រហែល ៣សប្ដាហ៍ហើយដើម្បីត្រៀមលក្ខណៈឲ្យបានល្អគ្រប់គ្រាន់វិលមកកាន់ការប្រកួតស្អែកនេះក្រោយសម្រាកព្យាបាលរបួសជើងអស់រយៈពេល ៩ខែមកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ ស៊ន រ៉ាគីម

កីឡាករ ស៊ន រ៉ាគីម បានឲ្យដឹងមកថា ចំពោះបញ្ហារបួសកន្លងទៅនោះគឺបានជាសះស្បើយ និងបានហ្វឹកហាត់ខ្លាំងដូចដើមវិញហើយ។ ការហ្វឹកហាត់ទាត់ធ្ងន់ៗ និងស្នៀតវាយដៃគឺខ្លួនបានសាកល្បងរួចរាល់ហើយមិនមានអ្វីជាបញ្ហានោះឡើយ ប៉ុន្តែក៏រងចាំមើលការប្រកួតជាក់ស្ដែងលើសង្វៀនសិន។

រ៉ាគីម និង វណ្ណថង

អ្នកប្រដាល់ដើមកំណើតពីខេត្តបាត់ដំបងរូបនេះបន្ថែមទៀតថា រូបគេនឹងខំប្រឹងប្រែងប្រកួតឲ្យបានល្អជូនអ្នកគាំទ្រ។ ដោយសារខ្លួនអាក់ខានឡើងសង្វៀនជិត១ឆ្នាំមកហើយ ដូច្នេះបើការប្រកួតនេះល្អ ឬមិនល្អដល់កម្រិតណានោះសូមប្រិយមិត្តកុំប្រកាន់។

កម្មវិធីប្រកួត

បញ្ជាក់ដែរថា កីឡាករ ស៊ន រ៉ាគីម បាត់មុខពីសង្វៀនគុនខ្មែរប្រហែល ៩ខែមកហើយដោយសារបួសដៃ និងរបួសជើង។ នៅថ្ងៃទី១២ ខែកញ្ញា ឆ្នាំ២០២៥ ស្អែកនេះរូបគេនឹងត្រូវប្រកួតមិត្តភាពអន្តរជាតិជាមួយកីឡាករឡាវនៅសង្វៀនថោន ចាប់ពីម៉ោង ៧យប់តទៅ៕

អត្ថបទដោយ៖ នួន ស៊ីណា