វីរុសបំប្លែងថ្មី Delta Archives - Kampuchea Thmey Daily

ប្រៀបធៀបវីរុសបំប្លែងថ្មី Omicron និង Delta៖ យើងត្រូវការវ៉ាក់សាំងថ្មី ឬអត់?

Sonya — Fri, 03 Dec 2021 00:35:00 +0000

ព័ត៌មានវីរុសបំប្លែងថ្មីអូមីក្រុង (Omicron) កំពុងផ្ទុះខ្លាំង ចាប់តាំងពីអង្គការសុខភាពពិភពលោក (WHO) បានកំណត់ថាវាជាវីរុសបំប្លែងមួយនៃវីរុសកូវីដ-១៩គួរឲ្យព្រួយបារម្ភតាំងពីសប្ដាហ៍មុន។ ស្របគ្នានេះ ចម្ងល់មួយក៏លេចឡើងដែរ តើអូមីក្រុង (Omicron) ប្រៀបធៀបទៅនឹងវីរុសបំប្លែង Delta ខុសគ្នាដូចម្ដេច?

វីរុសបំប្លែង Omicron និងវីរុសបំប្លែង Delta

ទាំង វីរុសបំប្លែងថ្មី Omicron និង Delta សុទ្ធតែជាវីរុសបំប្លែងរបស់វីរុសកូរ៉ូណា ដែលជាវីរុសដើមបង្កជំងឺកូវីដ-១៩។ តាមការឲ្យដឹងពីលោក William Schaffner អ្នកឯកទេសជំងឺឆ្លង និងជាសាស្ត្រាចារ្យវេជ្ជសាស្ត្រនៃសកលវិទ្យាល័យ Vanderbilt សហរដ្ឋអាមេរិក រាល់ពេលដែលមេរោគនេះចូលទៅក្នុងខ្លួនមនុស្សថ្មី វានឹងកើនឡើងរាប់លានដង ដែលផ្ដល់ឱកាសឲ្យវីរុសបំប្លែងខ្លួនបាន។

វីរុសបំប្លែង Delta គឺងាយឆ្លងជាងវីរុសកូវីដ-១៩ធម្មតា ច្រើនជាងទ្វេដង ហើយវាអាចបណ្ដាលឲ្យអ្នកឆ្លងធ្លាក់ខ្លួនឈឺធ្ងន់ខ្លាំងជាង ពិសេសមនុស្សដែលមិនទាន់បានចាក់វ៉ាក់សាំង។ នេះបើតាមការឲ្យដឹងពីមជ្ឈមណ្ឌលប្រឆាំងជំងឺឆ្លងសហរដ្ឋអាមេរិក (CDC)។

ចំពោះវីរុសបំប្លែងថ្មី Omicron មានចំនួននៃការផ្លាស់ប្ដូរច្រើន បើយោងតាមអង្គការសុខភាពពិភពលោក ហើយវាហាក់ដូចជាអាចឆ្លងទៅមនុស្សដែលធ្លាប់កើតជំងឺកូវីដ-១៩ពីមុនបានថែមទៀត។ លោកវេជ្ជបណ្ឌិតបន្ថែមថា ការបម្រែបម្រួលទាំងនោះជាច្រើនពាក់ព័ន្ធនឹងប្រូតេអ៊ីន spike ពិតប្រាកដដែលជាផ្នែកសំខាន់នៃមេរោគ ដែលអនុញ្ញាតឲ្យវាចូលទៅក្នុងកោសិកានៃរាងកាយរបស់យើង និងជាហេតុធ្វើឲ្យឈឺ។ អ្វីដែលនៅមិនទាន់ច្បាស់លាស់នៅពេលនេះគឺថាតើវីរុសបំប្លែងថ្មី Omicron ឆ្លងដូចវីរុស Delta ឬខ្លាំងជាងវីរុសបំប្លែងមុន។

តើវ៉ាក់សាំងការពារកូវីដ-១៩ បច្ចុប្បន្នអាចទប់ស្កាត់វីរុសបំប្លែងថ្មី Omicron ឬអត់?

Omicron មានការបំប្លែងស្រដៀងគ្នាទៅនឹងវីរុសបំប្លែង Beta និង Gamma ដែលមានភាពធន់នឹងវ៉ាក់សាំងការពារវីរុសកូវីដ-១៩ធម្មតា។ ទន្ទឹមនឹងនេះ WHO ឲ្យដឹងថា បច្ចុប្បន្នអង្គការកំពុងធ្វើការជាមួយដៃគូបច្ចេកទេសដើម្បីយល់ពីផលប៉ះពាល់នៃវីរុសបំប្លែងថ្មី Omicron ទៅលើវិធានការការពារវីរុសកូវីដ-១៩ ដែលបន្តធ្វើរហូតមកដល់សព្វថ្ងៃ រាប់បញ្ចូលទាំងវ៉ាក់សាំងការពារផងដែរ។ ទោះជាយ៉ាងណាក៏ដោយ ក្រុមហ៊ុនផលិតវ៉ាក់សាំងការពារកូវីដ-១៩ធំៗដូចជា Johnson&Johnson, Moderna, Pfizer បានឲ្យដឹងថា ពួកគេអាចផលិតវ៉ាក់សាំងមួយផ្សេងទៀតដែលផ្ដោតទៅលើការទប់ស្កាត់វីរុសបំប្លែងថ្មី Omicron តែមួយមុខ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ រឿងរ៉ាវសំខាន់ៗ WHO ដឹងពីវីរុសបំប្លែងខ្លួនថ្មី Omicron

ចុចអាន៖ ដំណឹងល្អ! ថ្នាំគ្រាប់ព្យាបាលកូវីដ អាចយកឈ្នះវីរុសបំប្លែងខ្លួន Omicron បាន

The post ប្រៀបធៀបវីរុសបំប្លែងថ្មី Omicron និង Delta៖ យើងត្រូវការវ៉ាក់សាំងថ្មី ឬអត់? appeared first on Kampuchea Thmey Daily.

គួរដឹង! រោគសញ្ញានៃវីរុសបំប្លែងខ្លួន Delta និង Omicron មិនដូចគ្នានោះទេ

Sonya — Tue, 30 Nov 2021 02:17:13 +0000

រោគសញ្ញាវីរុសបំប្លែងខ្លួនកូវីដ-១៩ អាចនៅមិនទាន់បែងចែកឲ្យដាច់ស្រួលបួលពីជំងឺកូវីដទម្រង់ដើមបាននៅឡើយ។ ប៉ុន្តែមានរោគសញ្ញាមួយចំនួនដែលពពួកវីរុសបំប្លែងខ្លួន លេចឡើងពេលឆ្លង អ្នកអាចកំណត់ចំណាំបានដោយខ្លួនឯង។

ជាពិសេស វីរុសបំប្លែងខ្លួនថ្មីប្រភេទ Omicron លេចចេញអាការមិនដូចនឹងវីរុសបំប្លែងខ្លួនដទៃៗទៀតប៉ុន្មាននោះទេ ហើយរោគសញ្ញាខាងក្រោម ជាអ្វីដែលអ្នកគួរដឹង។

វីរុសបំប្លែងខ្លួន ដែលតា (Delta)

វីរុសបំប្លែងថ្មី Delta ត្រូវបានគេកំណត់ដំបូងក្នុងប្រទេសឥណ្ឌា នៅខែធ្នូ ឆ្នាំ២០២០ ហើយរកឃើញជាលើកដំបូងនៅប្រទេសកម្ពុជា ក្នុងខែមិថុនា ឆ្នាំ២០២១ ។ វាមានសភាពឆ្លងលឿន និងមានភាពកាចសាហាវជាងជំងឺកូវីដ-១៩ ធម្មតា បើតាមការសិក្សាកន្លងមកសង្កេតឃើញថា រោគសញ្ញាវីរុសបំប្លែង Delta មានភាពខុសគ្នារវាងអ្នកចាក់វ៉ាក់សាំងរួច និងអ្នកមិនទាន់ចាក់វ៉ាក់សាំងនៅពេលឆ្លងវីរុសបំប្លែងនេះដូចជា៖

អ្នកចាក់វ៉ាក់សាំងរួច៖ ឈឺក្បាល ហៀរសម្បោរ កណ្ដាស់ និងឈឺ ឬរមាស់ក និងមិនសូវមានរោគសញ្ញាកូវីដ-១៩ ធម្មតាកើតឡើងទេរួមមាន ហិតមិនដឹងក្លិន ញ៉ាំមិនដឹងរសជាតិ ក្ដៅខ្លួន និងដង្ហក់។

អ្នកមិនទាន់ចាក់វ៉ាក់សាំង៖ ឈឺក្បាល ហៀរសម្បោរ ក្ដៅខ្លួន ក្អកញឹកញាប់ និងរោគសញ្ញាដូចកូវីដ-១៩ធម្មតាផ្សេងទៀត។

វីរុសបំប្លែងខ្លួន អូមីក្រុង (Omicron)

វីរុសកូវីដបំប្លែងខ្លួនថ្មីប្រភេទ Omicron បានរកឃើញជាលើកដំបូងកាលពីថ្ងៃទី ២៤ ខែវិច្ឆិកា ឆ្នាំ២០២១ នៅអាហ្វ្រិកខាងត្បូង។ វីរុសនេះ កាន់តែមានភាពគ្រោះថ្នាក់ជាងវីរុសបំប្លែងខ្លួនណាៗទាំងអស់ ខណៈអ្នកវិទ្យាសាស្ត្រ កំពុងរកវិធីទប់ស្កាត់យ៉ាងមមាញឹក។

តាមប្រភពពី New York Post ដែលបានដកស្រង់សម្ដីពី វេជ្ជបណ្ឌិត អាហ្វ្រិកខាងត្បូង លោកស្រី Angelique Coetzee បានឱ្យដឹងថា រោគសញ្ញាទូទៅនៃវីរុសបំប្លែងខ្លួន អូមីក្រុង មានដូចជា អស់កម្លាំង ឈឺសាច់ដុំ ក្អក ឡើងកម្ដៅ ជីពចរលោតញាប់ និងពុំមានអាការបាត់បង់ក្លិន ឬរសជាតិឡើយ។

បន្ថែមពីលើនេះ អាការរបស់អ្នកជំងឺអាចវិវត្តធ្ងន់ធ្ងរ ប្រសិនបើពួកគេជាបុគ្គលដែលស្ថិតក្នុងក្រុមមនុស្សវ័យចំណាស់ អ្នកជំងឺទឹកនោមផ្អែម អ្នកជំងឺបេះដូង និងអ្នកមិនបានចាក់វ៉ាក់សាំង៕

អត្ថបទ៖ សន្យា

ចុចអាន៖ ទោះស្រដៀងគ្នា តែរោគសញ្ញាវីរុសបំប្លែងខ្លួន Omicron មានខ្លះខុសពីកូវីដទម្រង់ដើម (មានវីដេអូ)

ចុចអាន៖ មនុស្ស ៤ក្រុម ប្រឈមគ្រោះថ្នាក់បំផុតជាមួយវីរុសបំប្លែងខ្លួន Omicron

The post គួរដឹង! រោគសញ្ញានៃវីរុសបំប្លែងខ្លួន Delta និង Omicron មិនដូចគ្នានោះទេ appeared first on Kampuchea Thmey Daily.

អ្នកឆ្លងវីរុស Delta មានហានិភ័យខ្ពស់ចូលក្នុងបន្ទប់ ICU ខ្លាំងជាងកូវីដទម្រង់ដើមរហូតដល់ ២៣៥ ភាគរយ

Sok Chivon — Sun, 17 Oct 2021 01:06:04 +0000

ការសិក្សានាពេលថ្មីៗនេះបានរកឃើញថា វីរុសបំប្លែងខ្លួនគួរឲ្យព្រួយបារម្ភ ដូចជា Alpha, Beta, Gamma និង Delta សុទ្ធតែបង្កើនហានិភ័យដល់អ្នកឆ្លងចូលសម្រាកព្យាបាលនៅមន្ទីរពេទ្យ ចូលបន្ទប់សង្គ្រោះបន្ទាន់ ICU និងស្លាប់ ច្រើនជាងកូវីដទម្រង់ដើម ។

ទន្ទឹមនោះ អ្នកឆ្លងវីរុសបំប្លែងខ្លួនឥណ្ឌា Delta មានហានិភ័យខ្ពស់ជាងគេ ពោល ១០៨ ភាគរយសម្រាប់ការចូលសម្រាកព្យាបាលនៅមន្ទីរពេទ្យ, ២៣៥ ភាគរយចូលបន្ទប់ ICU និងមានហានិភ័យស្លាប់ ១៣៣ ភាគរយ ខ្ពស់ជាងវីរុសបំប្លែងខ្លួនផ្សេងទៀត ។

លោកសាស្ត្រាចារ្យ William Schaffner អ្នកជំនាញខាងជំងឺឆ្លងនៅមជ្ឈមណ្ឌលវេជ្ជសាស្ត្រសាកលវិទ្យាល័យ Vanderbilt នៅទីក្រុង Nashville រដ្ឋ Tennessee នៃសហរដ្ឋអាមេរិកបាននិយាយថា “ការសិក្សាដ៏សំខាន់នេះគឺមកពីប្រទេសកាណាដា បន្ទាប់ពីបានពិនិត្យលើករណីចំនួន ២១២,៣២៦ ករណីនៅរដ្ឋ Ontario ចាប់ពីថ្ងៃទី ៧ ខែកុម្ភៈដល់ថ្ងៃទី ២៧ ខែមិថុនា ឆ្នាំ ២០២១” ។

ចំណែកលោកវេជ្ជបណ្ឌិត Christopher Coleman ជំនួយការសាស្រ្តាចារ្យផ្នែកប្រព័ន្ធភាពស៊ាំនៃការឆ្លងមេរោគនៅឯសាកលវិទ្យាល័យ Nottingham របស់ចក្រភពអង់គ្លេសបាននិយាយថា “ការសិក្សានៅប្រទេសកាណាដាមានដែនកំណត់មួយចំនួន ប៉ុន្តែវាគឺជាប្រភេទនៃការសិក្សាដែលជួយឲ្យយើងបង្កើនស្មារតីប្រុងប្រយ័ត្ន ។

ថ្លែងទៅកាន់សារព័ត៌មាន Medical News Today លោកវេជ្ជបណ្ឌិតបាននិយាយថា “ប៉ុន្តែយើងក៏មានវិធានការការពារផងដែរ ហើយនោះគឺការចាក់វ៉ាក់សាំងពេញលេញ ។ ការចាក់វ៉ាក់សាំងបានកាត់បន្ថយហានិភ័យនៃជំងឺធ្ងន់ធ្ងរ និងការស្លាប់ពីវីរុសបំប្លែងខ្លួនគួរឲ្យព្រួយបារម្ភទាំងអស់ ។ ក្នុងអំឡុងពេលនៃការសិក្សា នៅពេលដែលចំនួននៃការចាក់វ៉ាក់សាំងកើនឡើង ការចូលសម្រាកព្យាបាលនៅមន្ទីរពេទ្យ ការចូលបន្ទប់ ICU និងការស្លាប់បានថយចុះ ។

លោកបញ្ជាក់ថា “លទ្ធផលពីប្រទេសកាណាដា ក៏បានបន្ថែមទៅលើលទ្ធផលនៃការសិក្សាពីប្រទេសអង់គ្លេស ស្កុតឡេន និងសិង្ហបុរីផងដែរ ដែលទាំងអស់នេះបង្ហាញថា ការឆ្លងវីរុសបំប្លែងខ្លួនឥណ្ឌា Delta បណ្តាលឲ្យមានជំងឺកាន់តែធ្ងន់ធ្ងរ ។ ប៉ុន្តែវ៉ាក់សាំងដែលមាននាពេលបច្ចុប្បន្នបន្តផ្តល់ការការពារដ៏ល្អប្រឆាំងនឹងការឆ្លងវីរុសបំប្លែងខ្លួនឥណ្ឌា Delta ធ្ងន់ធ្ងរ” ។

គួរបញ្ជាក់ថា វីរុសបំប្លែងខ្លួន Delta ដែលឆ្លងលឿន និងរហ័សត្រូវបានរកឃើញជាលើកដំបូងនៅប្រទេសឥណ្ឌាកាលពីចុងឆ្នាំ ២០២០ ហើយបច្ចុប្បន្នវាកំពុងរាលដាលដល់ប្រទេស និងដែនដីប្រមាណ ១៦៣ ហើយ ៕

ប្រែសម្រួលដោយ ៖ ជីវ័ន្ត

ប្រភព ៖ Medical News Today

ចុចអាន ៖ ទីបំផុត ពិភពលោក រកឃើញថ្នាំគ្រាប់ព្យាបាល Delta ហើយ

The post អ្នកឆ្លងវីរុស Delta មានហានិភ័យខ្ពស់ចូលក្នុងបន្ទប់ ICU ខ្លាំងជាងកូវីដទម្រង់ដើមរហូតដល់ ២៣៥ ភាគរយ appeared first on Kampuchea Thmey Daily.

អ្នកជំនាញប្រាប់មូលហេតុដែលវីរុសបំប្លែងខ្លួន Delta ថមថយពីរបីខែមកនេះ

Sonya — Fri, 15 Oct 2021 06:21:55 +0000

ពីរខែមកនេះ កូវីដបំប្លែងខ្លួនប្រភេទ ដែលតា (Delta) ហាក់មានភាពស្ងប់ស្ងាត់បន្តិច ខណៈករណីថ្មីនៃវីរុសបំប្លែងខ្លួនប្រភេទនេះនៅទូទាំងពិភពលោក មិនបានរកឃើញកើនឡើងឡើយ។ នេះជាដំណឹងល្អមួយដែលថាជំងឺរាតត្បាត នឹងត្រូវបញ្ចប់ក្នុងពេលឆាប់ៗខាងមុខ។

លោកវេជ្ជបណ្ឌិត Scott Gottlieb អតីតប្រធានរដ្ឋបាលចំណីអាហារនិងឱសថអាមេរិក (FDA) បានថ្លែងថា ការរីករាលដាលនៃជំងឺរាតត្បាតបានធ្លាក់ចុះ ជាពិសេសកូវីដបំប្លែងខ្លួនប្រភេទ ដែលតា ថមថយករណីថ្មី ក៏ដោសារតែមនុស្សភាគច្រើនបានចាក់វ៉ាក់សាំងពេញលេញ។

ទន្ទឹមនឹងការធ្លាក់ចុះចំនួនអ្នកជំងឺថ្មី វេជ្ជបណ្ឌិត Scott Gottlieb បានព្រមានផងដែរថា អ្នកជំងឺកូវីដអាចកើនឡើងវិញ នៅពេលអាកាសធាតុចុះត្រជាក់ កំលុងចុងឆ្នាំនេះ។

លោកនិយាយក្នុងបទសម្ភាសន៍ជាមួយទូរទស្សន៍ CNN ថា ករណីថ្មីនឹងកើនឡើង នៅបណ្ដាប្រទេសចុះត្រជាក់ ជាពិសេសចំពោះសហគមន៍ណាដែលមានពលរដ្ឋអត់រក្សាគម្លាត និងមិនពាក់ម៉ាសខ្ជាប់ខ្ជួន។ ក្នុងនោះបុគ្គលដែលមិនព្រមទទួលថ្នាំបង្ការកូវីដ-១៩ នឹងប្រឈមហានិភ័យឆ្លងខ្ពស់បំផុត ។

ផ្ទុយទៅវិញ អ្នកចាក់វ៉ាក់សាំងរួចរាល់ នឹងមានអង់ទីគ័តការពារបានល្អ ហើយជំងឺរាតត្បាតច្បាស់ជាបញ្ចប់ទៅក្នុងពេលដ៏ខ្លីខាងមុខនេះ៕

ប្រែសម្រួល៖ សន្យា

ប្រភព៖ DeseretNews

ចុចអាន៖ នេះជាមូលហេតុដែល វ៉ាក់សាំងដូសជំរុញ មានសារសំខាន់ បញ្ឈប់ការឆ្លងកូវីដ

ចុចអាន៖ Delta ជិតក្ស័យហើយ! ពិភពលោកសង្ឃឹមធំធេង បើថ្នាំនេះទទួលការអនុញ្ញាត

The post អ្នកជំនាញប្រាប់មូលហេតុដែលវីរុសបំប្លែងខ្លួន Delta ថមថយពីរបីខែមកនេះ appeared first on Kampuchea Thmey Daily.

ចាក់ Sinovac ជាដូសជំរុញ មិនត្រឹមការពារកូវីដទេ ថែមទាំងអាចប្រឆាំង Delta បានយ៉ាងល្អប្រសើរផងដែរ

Sok Sovann — Sat, 09 Oct 2021 01:59:00 +0000

ក្រុមហ៊ុនចិន Sinovac រកឃើញថា ការចាក់វ៉ាក់សាំងកូវីដ-១៩ របស់ពួកគេជាដូសជំរុញ គឺមានប្រសិទ្ធភាពប្រឆាំងនឹងវីរុសបំប្លែងខ្លួន ស្របពេលដែលទិន្នន័យពីការសិក្សាបន្ថែមទៀត ត្រូវបានបញ្ចេញ។

អ្នកដែលទទួលវ៉ាក់សាំងការពារជំងឺកូវីដ-១៩ របស់ក្រុមហ៊ុន Sinovac Biotech Ltd. ដូសទី៣ បានបង្ហាញពីប្រសិទ្ធភាពប្រឆាំងវីរុសកូវីដ-១៩បំប្លែងខ្លួន Delta ខ្លាំងជាងអ្នកចាក់វ៉ាក់សាំង ២ដូសរហូតដល់ទៅ ២.៥ ដងឯណោះ។

ការរកឃើញនេះ បានកើតឡើងបន្ទាប់ពីការសិក្សានាពេលថ្មីៗស្តីពីប្រសិទ្ធភាពចាក់២ដូស របស់វ៉ាក់សាំងចិននេះ បានបង្ហាញថា វ៉ាក់សាំងបានផ្តល់ការការពារគ្រប់គ្រាន់ ប្រឆាំងនឹងការរីករាលដាលនៃវីរុសកូវីដបំប្លែងខ្លួន Delta។

អ្នកជំនាញវ៉ាក់សាំងនៅក្រុមហ៊ុន Pharmaniaga Berhad លោកវេជ្ជបណ្ឌិត Ajit Pal Singh បាននិយាយថា ការស្រាវជ្រាវដឹកនាំដោយអ្នកជំនាញរោគរាតត្បាតលោក Zhong Nanshan នៃមជ្ឈមណ្ឌលគ្រប់គ្រងនិងបង្ការជំងឺក្វាងចូវ ដោយប្រើវ៉ាក់សាំង CoronoVac របស់ក្រុមហ៊ុន Sinovac Biotech និងវ៉ាក់សាំង SARS-CoV-2 របស់ក្រុមហ៊ុនជីវសាស្រ្តជាតិចិន បានបង្ហាញថា វ៉ាក់សាំងទាំងនេះ មានប្រសិទ្ធភាពប្រឆាំងនឹងអ្នកដែលមានជំងឺកូវីដ-១៩ កម្រិតមធ្យម ក្រោយចាក់បាន២ដូស។

ការស្រាវជ្រាវក៏បានរកឃើញផងដែរថា ការចាក់វ៉ាក់សាំងពីរដូសផ្តល់ប្រសិទ្ធភាព ៥៩ភាគរយ ប្រឆាំងនឹងកូវីដបំប្លែងខ្លួន Delta, ៧០,២ភាគរយ ប្រឆាំងនឹងទម្រង់មធ្យមនៃជំងឺនេះ និង ១០០ភាគរយប្រឆាំងនឹងករណីធ្ងន់ធ្ងរនៃវីរុសកូវីដទម្រង់ដើម៕

ប្រែសម្រួល៖ Vann Vann

ប្រភព៖ Bio World

ចុចអាន៖ ចាក់វ៉ាក់សាំង Sinovac ដូសទី៣បាន លុះត្រាតែគ្រប់លក្ខខណ្ឌទាំង ៤ចំណុចនេះ

The post ចាក់ Sinovac ជាដូសជំរុញ មិនត្រឹមការពារកូវីដទេ ថែមទាំងអាចប្រឆាំង Delta បានយ៉ាងល្អប្រសើរផងដែរ appeared first on Kampuchea Thmey Daily.

ចាក់ Pfizer ២ដូស មានប្រសិទ្ធភាពខ្ពស់ ការពារ Delta បាន ៦ខែ

Sok Sovann — Tue, 05 Oct 2021 02:43:35 +0000

ការចាក់វ៉ាក់សាំង Pfizer ចំនួនពីរដូស មានប្រសិទ្ធភាពខ្ពស់យ៉ាងហោចណាស់៦ខែ ប្រឆាំងនឹងជំងឺកូវីដ-១៩ធ្ងន់ធ្ងររួមទាំងវីរុសបំប្លែងខ្លួន Delta ផងដែរ។ នេះបើតាមការវិភាគលើអ្នកជំងឺអាមេរិកដែលបង្ហាញកាលពីថ្ងៃចន្ទទី៤ខែតុលា។

ក្រុមហ៊ុន Pfizer និងអ្នកផ្តល់សេវាសុខភាព Kaiser Permanente បានពិនិត្យមើលកំណត់ត្រាពីមនុស្សចំនួន ៣.៤ លាននាក់នៅរដ្ឋកាលីហ្វ័រញ៉ាភាគខាងត្បូង ដែលក្នុងនោះ មានមួយភាគបីបានទទួលវ៉ាក់សាំងពេញលេញនៅចន្លោះខែធ្នូឆ្នាំ ២០២០ ដល់ខែសីហាឆ្នាំ ២០២១។

បន្ទាប់ពីរយៈពេលជាមធ្យមពី៣ទៅ៤ខែ អ្នកដែលបានចាក់វ៉ាក់សាំងពេញលេញ ត្រូវបានគេរកឃើញថាមាន ប្រសិទ្ធភាព៧៣ភាគរយការពារការឆ្លងរោគ និង ៩០ភាគរយការពារពីការចូលមន្ទីរពេទ្យ។

ទោះបីជាយ៉ាងណាក៏ដោយ ថ្វីបើការការពារប្រឆាំងនឹងការឆ្លងវីរុសបំប្លែងខ្លួន Delta បានធ្លាក់ចុះ៤០ភាគរយក្នុងរយៈពេល៥ខែក៏ដោយ ការការពារប្រឆាំងនឹងការចូលមន្ទីរពេទ្យ ពាក់ព័ន្ធនឹងករណីពីវីរុសបំប្លែងខ្លួនគ្រប់ប្រភេទទាំងអស់ នៅតែមានកម្រិតខ្ពស់ក្នុងរយៈពេលនៃការស្រាវជ្រាវ។

ការសិក្សាដដែលបានកត់សម្គាល់ថា លទ្ធផលនេះមានភាពស៊ីគ្នានឹងទិន្នន័យបឋម ពីអាជ្ញាធរសុខាភិបាលអាមេរិកនិងអ៊ីស្រាអែល។

អ្នកនិពន្ធបានសន្និដ្ឋានថា ការធ្លាក់ចុះសមត្ថភាពប្រឆាំងការឆ្លងមេរោគ ទំនងជាបណ្តាលមកពីការថយចុះប្រសិទ្ធភាពរបស់វ៉ាក់សាំង មិនមែនដោយសារវីរុសបំប្លែងខ្លួន Delta គេចពីប្រព័ន្ធភាពស៊ាំដែលបង្កឡើងដោយវ៉ាក់សាំងនោះទេ”៕

ប្រែសម្រួល៖ Vann Vann

ប្រភព៖ CNA

ចុចអាន៖ Pfizer ក្លាយជាវ៉ាក់សាំងកូវីដដំបូងគេ ដែលទទួលបានការយល់ព្រមពី FDA

The post ចាក់ Pfizer ២ដូស មានប្រសិទ្ធភាពខ្ពស់ ការពារ Delta បាន ៦ខែ appeared first on Kampuchea Thmey Daily.

ផលប៉ះពាល់ខុសគ្នារវាងកូវីដទម្រង់ដើម និង ដែលតា ក្រោយពេលជាសះស្បើយ

Sonya — Fri, 01 Oct 2021 04:11:49 +0000

កូវីដបំប្លែងខ្លួនប្រភេទ ដែលតា (Delta) និងកូវីដទម្រង់ដើម សុទ្ធសឹងជាវីរុសគួរឱ្យបារម្ភទាំងអស់។ វីរុសទាំងពីរនេះ កំពុងបង្កហានិភ័យចំពោះសហគមន៍កម្ពុជា ខណៈករណីវិជ្ជមានបានបន្តរកឃើញខ្ពស់ឡើងជារៀងរាល់ថ្ងៃ។

ត្បិតតែ កូវីដបំប្លែងខ្លួនប្រភេទ ដែលតា មានករណីវិជ្ជមានតិចជាងអ្នកវិជ្ជមានកូវីដទម្រង់ដើមក៏ពិតមែន ប៉ុន្តែហានិភ័យលើសុខភាពរបស់ ដែលតា គឺប្រឈមខ្លាំងជាងកូវីដ-១៩រហូតដល់១០០ភាគរយ។

ក្នុងនោះ សូម្បីតែអ្នកដែលធ្លាប់ឆ្លង ហើយបានព្យាបាលសះស្បើយ ក៏ប្រឈមផលប៉ះពាល់ខុសគ្នាចំពោះសុខភាព រវាងវីរុសទាំងពីរប្រភេទនេះដែរ។

១. កូវីដ-១៩

– អ្នកជំងឺកូវីដ-១៩ករណីស្រាល នឹងមានអង់ទីគ័រការពារការចម្លងរោគជាថ្មីប្រមាណ ១១ខែ ឬអាចមួយជីវិត បន្ទាប់ពីជាសះស្បើយ។

-ត្រូវចត្តាឡីស័ករយៈពេល ១៤ថ្ងៃ បន្ទាប់ពីតេស្តអវិជ្ជមាន។

២. កូវីដបំប្លែងខ្លួនប្រភេទ ដែលតា

-ភស្តុតាងថ្មីបង្ហាញថា ទោះបីជាអ្នកជំងឺធ្លាប់ឆ្លងវីរុសបំប្លែងខ្លួន Delta ម្ដងរួចហើយ និងបានជាសះស្បើយទាំងស្រុងក៏ដោយ ក៏ពួកគេនៅតែប្រឈមនឹងការឆ្លងឡើងវិញច្រើនដងទៀត។

-ត្រូវចត្តាឡីស័ករយៈពេល ២១ថ្ងៃ បន្ទាប់ពីតេស្តអវិជ្ជមាន។

៣. ចំណុចដូចគ្នា

-ផលប៉ះពាល់សរីរាង្គដូចជា សួត តម្រងនោម ថ្លើម ត្រូវការពេលយ៉ាងហោច ៣-៦ខែ ដើម្បីវិលត្រឡប់រកសភាពដើមវិញ ប៉ុន្តែវាមានកម្រិតស្រាលប៉ុណ្ណោះ។ នេះបើតាមការអះអាងពី អង្គការសុខភាពពិភពលោក។

-អ្នកឆ្លងវីរុសទាំងពីរប្រភេទនេះ សុទ្ធតែបង្កផលរំខានដល់សុខភាពផ្លូវចិត្តរួមមាន ថប់បារម្ភ ស្រ្តេស ឬធ្លាក់ទឹកចិត្ត ប៉ុន្តែវានឹងបាត់ទៅវិញយូរឬឆាប់ អាស្រ័យលើអ្នកជំងឺផ្ទាល់។

-អ្នកចាក់វ៉ាក់សាំងពេញលេញ សរីរាង្គអាចប្រឆាំងនឹងកូវីដទម្រង់ដើម និងកូវីដបំប្លែងខ្លួនគ្រប់ប្រភេទទាំងអស់ ពីរោគសញ្ញាធ្ងន់ធ្ងរ និងបង្ការហានិភ័យស្លាប់។

-មិនថាអ្នកបានជាសះស្បើយពីកូវីដទម្រង់ដើម ឬកូវីដបំប្លែងខ្លួន ដែលតា នោះទេ បន្ទាប់ជាភ្លាមៗ មិនទាន់អាចចាក់វ៉ាក់សាំងដូសជំរុញបានឡើយ ដោយត្រូវរង់ចាំយ៉ាងហោចពី ៦-៨ ខែសិន៕

អត្ថបទ៖ សន្យា

ចុចអាន៖ ក្រោយជា បើមានរោគសញ្ញានេះបញ្ជាក់ថា អ្នកមានកូវីដរយៈពេលវែង ត្រូវជួបពេទ្យបន្ទាន់

ចុចអាន៖ អ្នកឆ្លងកូវីដបំប្លែងខ្លួន Delta អាចឆ្លងម្ដងទៀត ទាំងនេះជាចំណុចសំខាន់ៗត្រូវដឹង

The post ផលប៉ះពាល់ខុសគ្នារវាងកូវីដទម្រង់ដើម និង ដែលតា ក្រោយពេលជាសះស្បើយ appeared first on Kampuchea Thmey Daily.

ទីបំផុត ពិភពលោក រកឃើញថ្នាំគ្រាប់ព្យាបាល Delta ហើយ

Sok Sovann — Thu, 30 Sep 2021 07:40:55 +0000

វាជាដំណឹងល្អសម្រាប់ពិភពលោកទាំងមូល ដែលនៅទីបំផុត ការសិក្សានៅមន្ទីរពិសោធន៍បានបង្ហាញថា ថ្នាំគ្រាប់ Molnupiravir របស់ក្រុមហ៊ុន Merck & Co (MRK.N) ពិតជាមានប្រសិទ្ធភាពប្រឆាំងនឹងវីរុសកូវីដ-១៩បំប្លែងខ្លួននានា រួមទាំង Delta ផងដែរ។ នេះបើតាមការអះអាងពីក្រុមហ៊ុនកាលពីថ្ងៃពុធទី២៩ខែកញ្ញា។

លោក Jay Grobler ប្រធានផ្នែកជំងឺឆ្លងនិងវ៉ាក់សាំង នៅក្រុមហ៊ុន Merck បាននិយាយថា ដោយសារតែថ្នាំ Molnupiravir មិនផ្តោតសំខាន់ទៅលើសរសៃប្រូតេអ៊ីនដែលជាគោលដៅនៃវ៉ាក់សាំងការពារជំងឺកូវីដ-១៩ នាពេលបច្ចុប្បន្ន, ថ្នាំនេះគឺមានប្រសិទ្ធភាពចំពោះវីរុសដែលវិវត្តខ្លួន។

Molnupiravir គឺជាប្រភេទថ្នាំគ្រាប់ ដែលត្រូវបានផលិតឡើងដើម្បីរំខានដល់សមត្ថភាពនៃការឆ្លងរបស់វីរុសកូវីដ-១៩។ ថ្នាំនេះ ត្រូវបានបង្កើតឡើងដំបូង ដើម្បីព្យាបាលជំងឺគ្រុនផ្តាសាយ។

ទិន្នន័យបានបង្ហាញថា ថ្នាំនេះមានប្រសិទ្ធភាពបំផុតនៅពេលដែល ត្រូវបានផ្តល់ឲ្យអ្នកជំងឺនៅដំណាក់កាលដំបូងនៃការឆ្លងមេរោគ។

ក្រសួងសុខាភិបាលនិងសេវាមនុស្សសហរដ្ឋអាមេរិក បានចុះហត្ថលេខាលើកិច្ចព្រមព្រៀងទិញថ្នាំនេះចំនួន ១.៧ លានដូសក្នុងតម្លៃ ១.២ ពាន់លានដុល្លារ ហើយក្រុមហ៊ុន Merck កំពុងរៀបចំផលិត ១០ លានដូសនៅត្រឹមចុងឆ្នាំនេះ៕

ប្រែសម្រួល៖ Vann Vann

ប្រភព៖ The Hill

ចុចអាន៖ ឆ្នាំក្រោយ ពិភពលោក មានថ្នាំព្យាបាលកូវីដហើយ!

The post ទីបំផុត ពិភពលោក រកឃើញថ្នាំគ្រាប់ព្យាបាល Delta ហើយ appeared first on Kampuchea Thmey Daily.

វីរុសបំប្លែងថ្មី Delta Archives - Kampuchea Thmey Daily

ប្រៀបធៀបវីរុសបំប្លែងថ្មី Omicron និង Delta៖ ​យើងត្រូវការវ៉ាក់សាំងថ្មី ឬអត់?

វីរុស​បំប្លែង Omicron និង​វីរុស​បំប្លែង Delta

តើ​វ៉ាក់សាំង​ការពារ​កូវីដ-១៩ បច្ចុប្បន្ន​អាច​ទប់ស្កាត់​វីរុស​បំប្លែង​ថ្មី Omicron ឬអត់?

គួរដឹង! រោគសញ្ញានៃវីរុស​បំប្លែង​ខ្លួន Delta និង Omicron មិនដូចគ្នានោះទេ

អ្នកឆ្លងវីរុស Delta មានហានិភ័យខ្ពស់ចូលក្នុងបន្ទប់ ICU ខ្លាំងជាងកូវីដទម្រង់ដើមរហូតដល់ ២៣៥ ភាគរយ

អ្នកជំនាញប្រាប់មូលហេតុដែលវីរុសបំប្លែងខ្លួន Delta ថមថយពីរបីខែមកនេះ

ចាក់ Sinovac ជាដូសជំរុញ មិនត្រឹមការពារកូវីដទេ ថែមទាំងអាចប្រឆាំង Delta បានយ៉ាងល្អប្រសើរផងដែរ

ចាក់ Pfizer ២ដូស មានប្រសិទ្ធភាពខ្ពស់ ការពារ Delta បាន ៦ខែ

ផលប៉ះពាល់ខុសគ្នារវាងកូវីដទម្រង់ដើម និង ដែលតា ក្រោយពេលជាសះស្បើយ

ទីបំផុត ពិភពលោក រកឃើញថ្នាំគ្រាប់ព្យាបាល Delta ហើយ

ប្រៀបធៀបវីរុសបំប្លែងថ្មី Omicron និង Delta៖ យើងត្រូវការវ៉ាក់សាំងថ្មី ឬអត់?

វីរុសបំប្លែង Omicron និងវីរុសបំប្លែង Delta

តើវ៉ាក់សាំងការពារកូវីដ-១៩ បច្ចុប្បន្នអាចទប់ស្កាត់វីរុសបំប្លែងថ្មី Omicron ឬអត់?

គួរដឹង! រោគសញ្ញានៃវីរុសបំប្លែងខ្លួន Delta និង Omicron មិនដូចគ្នានោះទេ