Pfizer ក្លាយជាវ៉ាក់សាំងកូវីដដំបូងគេ ដែលទទួលបានការយល់ព្រមពី FDA

រដ្ឋបាលចំណីអាហារនិងឱសថអាមេរិកកាលពីថ្ងៃចន្ទ (ថ្ងៃអង្គារនៅកម្ពុជា) បានអនុម័តទាំងស្រុងចំពោះវ៉ាក់សាំង Pfizer-BioNTech ដែលនេះជាការសម្រេចចិត្តមួយ ត្រូវបានគេរំពឹងថា នឹងបង្កឲ្យមានរលកថ្មីនៃអាណត្តិវ៉ាក់សាំង ខណៈវីរុសបំប្លែងខ្លួន Delta កំពុងវាយលុកប្រទេសនេះ។

ប្រហែល ៥២ ភាគរយនៃប្រជាជនអាមេរិក ត្រូវបានចាក់វ៉ាក់សាំងពេញលេញ ប៉ុន្តែអាជ្ញាធរសុខាភិបាលកំពុងលំបាកជាមួយមនុស្សស្ទាក់ស្ទើរចាក់វ៉ាក់សាំង ដែលរារាំងដល់យុទ្ធនាការជាតិ។

លោកស្រី Janet Woodcock ស្នងការស្តីទីរបស់ FDA បាននិយាយនៅក្នុងសេចក្តីថ្លែងការណ៍មួយថា “ការអនុម័តរបស់ FDA លើវ៉ាក់សាំងនេះ គឺជាព្រឹត្តិការណ៍សំខាន់មួយ នៅពេលដែលយើងបន្តប្រយុទ្ធប្រឆាំងនឹងជំងឺរាតត្បាត កូវីដ-១៩”។

វ៉ាក់សាំងនេះ ដែលបច្ចុប្បន្ននឹងត្រូវបានដាក់លក់នៅលើទីផ្សារក្រោមឈ្មោះ Comirnaty គឺជាថ្នាំបង្ការដំបូង ដែលទទួលបានការយល់ព្រមពេញលេញ។

គួរបញ្ជាក់ថា វ៉ាក់សាំងជាង ២០០ លានដូស ត្រូវបានចាក់រួចទៅហើយ ក្រោមការអនុញ្ញាតឲ្យប្រើប្រាស់គ្រាអាសន្ន (EUA) ដែលត្រូវបានផ្តល់ឲ្យកាលពីថ្ងៃទី ១១ ខែធ្នូឆ្នាំ ២០២០៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ មេ ដឹក នាំ តៃវ៉ាន់ ចាក់ វ៉ាក់សាំង ផលិតក្នុងស្រុក លើក ដំបូង បើកផ្លូវមុនគេ