តើប្រជាជនថៃ ប្រតិកម្មយ៉ាងណា ក្រោយឥណ្ឌាពហិការឈប់ប្រើផលិតផល និងទៅលេងថៃ?

ការធ្វើពហិការចំពោះប្រទេសថៃ ពីសំណាក់អ្នកកាន់សាសនាហិណ្ឌូរាប់ពាន់លាននាក់ កំពុងក្លាយជាប្រធានបទនៃការជជែកវែកញែកយ៉ាងក្តៅគគុកនិងដាក់សម្ពាធយ៉ាងធ្ងន់លើរដ្ឋាភិបាលទីក្រុងបាងកក។

ការដែលកងទ័ពថៃ គឃ្លើនហ៊ានកម្ទេចរូបសំណាកព្រះវិស្ណុនៅតំបន់អានសេះ ក្នុងទឹកដីកម្ពុជា បានបញ្ឆេះកំហឹងពីសំណាក់ប្រជាជនឥណ្ឌាក៏ដូចជាអ្នកកាន់សាសនាហិណ្ឌូផ្សេងទៀតនៅលើពិភពលោក ឈានដល់ការប្រកាសធ្វើពហិការប្រើប្រាស់ទំនិញនិងទៅលេងកម្សាន្តប្រទេសថៃ។

កុំគិតថារឿងតូចឲ្យសោះ សម្រាប់ប្រជាជនឥណ្ឌាជាង ១ពាន់លាននាក់ដែលកាន់សាសនាហិណ្ឌូ ព្រះវិស្ណុមិនមែនគ្រាន់តែជារូបសំណាកទេ ប៉ុន្តែគឺស្មើនឹង «ដង្ហើមនិងជីវិត»។ ការកម្ទេចរូបសំណាកត្រូវបានគេចាត់ទុកថាជាការប្រមាថមើលងាយយ៉ាងធ្ងន់ធ្ងរដល់អាទិទេពខ្ពស់បំផុតរបស់ពួកគេ។

ពាក់ព័ន្ធបញ្ហានេះ សូម្បីអ្នកកាសែតជើងចាស់ថៃ ក៏ស្តីបន្ទោសរដ្ឋាភិបាលទីក្រុងបាងកកផងដែរ ថាកំពុ​ង «ស្រវឹងសង្គ្រាម» ដែលធ្វើសកម្មភាពមិនចេះគិត បំផ្លាញកេរ្តិ៍ឈ្មោះប្រទេសថៃលើឆាកអន្តរជាតិ។

យ៉ាងណា មានប្រជាជនថៃខ្លះក៏នៅតែបោះពាក្យសម្តីយ៉ាងឡូយទៅកាន់អ្នកគោរពសាសនាហិណ្ឌូ ដោយអ្នកលេងបណ្តាញសង្គមខ្លះ ឌឺដងផ្លែផ្កាថា បើជនជាតិឥណ្ឌាមិនមកទេសចរស្រុកគេ ក៏មិនអីដែរ ព្រោះនៅមានភ្ញៀវទេសចរមកពីអឺរ៉ុប ចិន ឬរុស្ស៊ី ដែលអាចជំនួសកន្លែងឥណ្ឌាបាន។

ទោះបែបនេះ ក្នុងករណីបាត់ភ្លៀងទេសចរឥណ្ឌាមែន ច្បាស់ណាស់វានឹងដាក់សម្ពាធខ្លាំងលើវិស័យទេសចរណ៍របស់ថៃ ព្រោះថា ទេសចរឥណ្ឌា ក៏ជះលុយខ្លាំងទៅលើថ្លៃហូបចុកនិងស្នាក់នៅតាមសណ្ឋាគារផងដែរ។ ម្យ៉ាងឥណ្ឌា គឺជាផ្សារដ៏ធំមហិមារបស់ថៃ ដូច្នេះបើឥណ្ឌាពហិកាឈប់ប្រើផលិតផលថៃ ថៃនឹងធ្លាក់ចុះនូវប្រាក់ចំណូលជាក់ជាមិនខានឡើយ។

ផ្អែកលើទិន្នន័យស្ថិតិទេសចរណ៍ផ្លូវការរបស់ក្រសួងទេសចរណ៍និងកីឡាថៃ ទីផ្សារទេសចរឥណ្ឌាបានក្លាយជា «ឆ្អឹងខ្នង» ដ៏សំខាន់បំផុតមួយសម្រាប់សេដ្ឋកិច្ចថៃ ជាពិសេសបន្ទាប់ពីវិបត្តិជំងឺកូវីដ-១៩។ គិតត្រឹមដំណាច់ឆ្នាំ២០២៤ ចំនួនទេសចរឥណ្ឌាទៅកម្សាន្តនៅប្រទេសថៃ មានចន្លោះពី ១.៩ លាន ដល់ ២.១ លាននាក់៕

អត្ថបទ៖ សុខ សុវណ្ណ