អាមេរិក និងអ៊ីស្រាអែល បង្ហាញផែនការនៅតំបន់ហ្គាហ្សា ក្រោយបញ្ចប់​សង្គ្រាមជាមួយក្រុមហាម៉ាស់

សហរដ្ឋអាមេរិក និងអ៊ីស្រាអែលកំពុងស្វែងរកជម្រើស ក៏ដូចជាយុទ្ធវិធីផ្សេងៗទុកសម្រាប់ដោះស្រាយបញ្ហានៅតំបន់ហ្គាហ្សា បន្ទាប់ពីបញ្ចប់សង្គ្រាមជាមួយក្រុមហាម៉ាស់ ហើយក្នុងនោះអាចរួមបញ្ចូលផែនការដាក់តំបន់ក្រោមការគ្រប់គ្រងបណ្តោះអាសន្នរបស់អង្គការសហប្រជាជាតិ ឬការដាក់ពង្រាយកងកម្លាំងចម្រុះជាតិសាសន៍ដើម្បីរក្សាសន្តិសុខនៅទីនោះជាដើម ។

ទីភ្នាក់ងារព័ត៌មាន Bloomberg បានរាយការណ៍ដោយដកស្រង់ប្រភពសម្ងាត់មួយថា វត្តមានចម្រុះជាតិសាសន៍នៅក្នុងតំបន់ហ្គាហ្សា អាចរួមបញ្ចូលកងកម្លាំងប្រដាប់អាវុធមកពីសហរដ្ឋអាមេរិក ចក្រភពអង់គ្លេស អាល្លឺម៉ង់ បារាំង អារ៉ាប៊ីសាអូឌីត និងអារ៉ាប់រួម ប៉ុន្តែលោកប្រធានាធិបតី ចូ បៃដិន គិតថា ការចល័តទាហានអាមេរិកមួយក្រុមទៅកាន់តំបន់ហ្គាហ្សា ក៏អាចជាហានិភ័យនយោបាយផងដែរ ។

ទោះបីជាយ៉ាងណាក៏ដោយ របាយការណ៍នោះបញ្ជាក់ថា បច្ចុប្បន្នសហរដ្ឋអាមេរិកកំពុងនៅឆ្ងាយពីសេចក្ដីសម្រេចចិត្តថាតើនឹងគាំទ្រការបញ្ជូនទាហានអាមេរិកទៅកាន់តំបន់ហ្គាហ្សាដើម្បីជួយរក្សាសន្តិសុខនៅក្នុងបរិបទ ក្រោយកម្ចាត់ក្រុមហាម៉ាស់ឬក៏យ៉ាងណានោះទេ ។

ស្របពេលជាមួយគ្នានេះ កិច្ចពិភាក្សាអំពីផែនការសម្រាប់តំបន់ហ្គាហ្សា ក្នុងលក្ខខណ្ឌប្រសិនបើអ៊ីស្រាអែលទទួលជោគជ័យក្នុងការកម្ចាត់ក្រុមហាម៉ាស់ គឺស្ថិតក្នុងដំណាក់កាលដំបូងប៉ុណ្ណោះ ខណៈមន្ត្រីអាមេរិកជឿជាក់ថា ជម្រើសទាំងនេះគឺលឿនពេកហើយ ហើយវាក៏ទំនងជាមិនកើតមានឡើងផងដែរ ។

ពាក់ព័ន្ធនឹងបញ្ហានេះដែរ រដ្ឋមន្ត្រីការបរទេសអាមេរិក លោក Antony Blinken បាននិយាយថា អាជ្ញាធរប៉ាឡេស្ទីនដែលកំពុងកាន់កាប់អភិបាលកិច្ច និងសន្តិសុខនៅតំបន់ហ្គាហ្សា គឺជារឿងសមហេតុផលបំផុតហើយ បន្ទាប់ពីជម្លោះបច្ចុប្បន្នជាមួយអ៊ីស្រាអែលបានបញ្ចប់ ប៉ុន្តែការបន្ត​មានសកម្មភាពរបស់​ក្រុមហាម៉ាស់ ឬ​អ៊ីស្រាអែល​​លើ​តំបន់ហ្គាហ្សា មិន​មែន​ជា​ជម្រើសដ៏ល្អនោះ​ទេ ។

ជាងនេះទៅទៀត អ្នកការទូតកំពូលអាមេរិករូបនេះបញ្ជាក់ថា ប្រសិនបើអាជ្ញាធរប៉ាឡេស្ទីនមិនមានលទ្ធភាពគ្រប់គ្រងតំបន់ហ្គាហ្សានោះទេ លោកសូមស្នើថា គួរតែអាចមានអភិបាលកិច្ច និងការរៀបចំសន្តិសុខបណ្តោះអាសន្ន ដែលដឹកនាំដោយប្រទេសផ្សេងទៀតក្នុងតំបន់ ឬទីភ្នាក់ងារអន្តរជាតិ ប៉ុន្តែចុងក្រោយចាំបាច់ត្រូវតែមានដំណោះស្រាយរដ្ឋពីរ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ មកដឹងពីទម្ងន់គ្រាប់បែកសរុបដែល អ៊ីស្រាអែល ទម្លាក់លើតំបន់ហ្គាហ្សា