ថ្ងៃទី២៣ មេសានេះ នាយករដ្ឋមន្រ្តីថៃ​​ ផ្តើមទស្សនកិច្ចផ្លូវការនៅកម្ពុជា ដើម្បីពង្រឹងទំនាក់ទំនង

ដូចការគ្រោងទុក តបតាមការអញ្ជើញរបស់សមភាគីកម្ពុជា, លោកស្រី ផែថងថាន ស៊ីណាវ៉ាត្រ នាយករដ្ឋមន្ត្រីថៃ បានដឹកនាំគណៈប្រតិភូមកបំពេញទស្សនកិច្ចផ្លូវការ​​នៅ​​កម្ពុជា នាព្រឹកថ្ងៃពុធនេះ។ ដំណើរទស្សនកិច្ចរបស់នាយករដ្ឋមន្ត្រីថៃ កើតមាន​ឡើងស្របពេលដែល​ព្រះ​រាជាណាចក្រទាំងពីរ ប្រារព្ធខួប ៧៥ឆ្នាំនៃទំនាក់ទំនងការទូត ដែលនឹងពង្រឹងបន្ថែមទៀតនូវចំណងមិត្តភាពជាប្រពៃណីរវាងប្រជាជនទាំងពីរ។

អញ្ជើញទទួលដំណើរមកដល់របស់លោកស្រី នាយករដ្ឋមន្ត្រីថៃ នាអាកាសយានដ្ឋានអន្តរជាតិភ្នំពេញ នាព្រឹកថ្ងៃទី២៣ ខែមេសានេះ មានវត្តមានលោកស្រី ចម និម្មល រដ្ឋមន្ត្រីក្រសួងពាណិជ្ជកម្ម​ លោក ឈិន កេតនា អនុប្រធានអចិន្ត្រៃយ៍ និងជាអគ្គលេខាធិការគណៈកម្មាធិការជាតិរៀបចំបុណ្យជាតិ និងអន្តរជាតិ លោក អ៊ឹង រចនា រដ្ឋលេខាធិការក្រសួងការបរទេស លោក ហ៊ុន សារឿន ឯកអគ្គរាជទូតកម្ពុជាប្រចាំប្រទេសថៃ រួមទាំងលោក ទុន ត្រៃសូរ៉ាត់ (Tull Traisorat) ឯកអគ្គរាជទូតថៃប្រចាំកម្ពុជា។

នៅព្រឹកថ្ងៃដដែល​ លោកស្រី ផែថងថាន ស៊ីណាវ៉ាត្រ នាយករដ្ឋមន្ត្រីថៃ ក៏បានបន្តចូលជួបប្រជុំចង្អៀត និងជំនួបទ្វេភាគីជាមួយសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដោយមានពិធីបដិសណ្ឋារកិច្ចផ្លូវការ ​បានប្រារព្ធឡើងនៅវិមានសន្តិភាព ដើម្បីពិភាក្សាពីការកំណត់ទិសដៅសកម្មភាពក្នុងការធ្វើឱ្យ​កាន់តែស៊ីជម្រៅ និងពង្រីកបន្ថែមទៀតនូវកិច្ចសហ​ប្រតិបត្តិ​ការដែលមានផលប្រយោជន៍ទៅវិញទៅមក។ បន្ទាប់មក នាយករដ្ឋមន្ត្រីទាំងពីរ ​ក៏នឹងធ្វើជាសាក្សី​នៅក្នុងពិធី​ចុះ​ហត្ថលេខាលើឯកសារស្តីពីកិច្ចសហប្រតិបត្តិការទ្វេភាគីលើវិស័យផ្សេងៗ និងពិធីសម្ពោធ​និមិត្តសញ្ញាខួបអនុស្សាវរីយ៍លើកទី៧៥ នៃការភ្ជាប់ទំនាក់ទំនង ការទូតកម្ពុជា-ថៃ។

តាមកម្មវិធីគ្រោងទុក នៅពេលរសៀលថ្ងៃទី២៣ ខែមេសា លោកស្រី នាយករដ្ឋមន្ត្រីថៃ នឹងមានជំនួបសម្តែងការគួរសមជាមួយសម្ដេចតេជោ ហ៊ុន សែន ប្រធានព្រឹទ្ធសភា និងសម្ដេចធិការធិបតី ឃួន សុដារី ប្រធានរដ្ឋសភា។ ដោយឡែក នាព្រឹកថ្ងៃទី២៤ ខែមេសា លោកស្រី ផែថងថាន ស៊ីណាវ៉ាត្រ នឹងមានព្រះរាជសវនាការជាមួយព្រះករុណា ព្រះបាទសម្តេច ព្រះបរមនាថ នរោត្ដម សីហមុនី ព្រះមហាក្សត្រកម្ពុជា មុនធ្វើដំណើរនិវត្តន៍នៅរសៀលថ្ងៃទី២៤ ខែមេសា ឆ្នាំ២០២៥៕