នៅពេលលឺថាថៃចង់ប្រើទ័ពការពារអធិបតេយ្យភាពខ្លួន អតីតប្រមុខការទូតកម្ពុជាសួរថា តើអធិបតេយ្យភាពថៃនៅឯណា?

ឧត្តមប្រឹក្សាផ្ទាល់ព្រះមហាក្សត្រ និងជាអតីតប្រមុខការទូតកម្ពុជា សម្តេចឥស្សរវិទេសបញ្ញា ហោ​ ណាំហុង នៅព្រឹកថ្ងៃអាទិត្យនេះ បានអញ្ជើញសួរសុខទុក្ខ និងលើកទឹកចិត្តនាយទាហាន ពលទាហាន និងកងកម្លាំងប្រដាប់អាវុធ ដែលកំពុងឈរជើងតាមបណ្ដោយព្រំដែនកម្ពុជា-ថៃ ក្នុងខេត្តឧត្តរមានជ័យ។ នៅចំពោះមុខកងទ័ពដ៏អង់អាចក្លាហានរបស់កម្ពុជា សម្តេចឥស្សរវិទេសបញ្ញា ហោ​ ណាំហុង បានប្រតិកម្មទៅសម្តីរបស់រដ្ឋមន្រ្តីការពារជាតិថៃដែលចង់ប្រើកម្លាំងទ័ពការពារអធិបតេយ្យរបស់ថៃ។ សម្តេច ហោ ណាំហុង បានចោទសួរថា តើសព្វថ្ងៃនេះអធិបតេយ្យភាពថៃនៅឯណា?

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Phumtham Wechayachai រដ្ឋមន្ត្រីក្រសួងការពារជាតិថៃថ្មីៗនេះ បានអះអាងថា រដ្ឋាភិបាល និងយោធាថៃចង់ចរចាជាមួយកម្ពុជា ដើម្បីកំណត់ព្រំដែនរវាងប្រទេសទាំង២ ប៉ុន្តែ ប្រមុខការពារជាតិថៃរូបនេះ ក៏បានបន្ថែមថា កងទ័ពថៃបានត្រៀមខ្លួនរួចជាស្រេច ដើម្បីការពារអធិបតេយ្យភាព និងទឹកដីរបស់ប្រទេសថៃ។ ត្រង់ពាក្យថា អធិបតេយ្យភាពរបស់ថៃនេះ ដែលធ្វើអតីតប្រមុខការទូតកម្ពុជា អត់ទ្រាំពុំបាន ក៏បានប្រតិកម្មតបទៅវិញនៅចំពោះមុខកងទ័ពកម្ពុជា។

សម្តេចឥស្សរវិទេសបញ្ញា ហោ​ ណាំហុង បានប្រតិកម្មដោយចោទសួរទៅលោក Phumtham Wechayachai យ៉ាងដូច្នេះថា៖ «តើសព្វថ្ងៃនេះ អធិបតេយ្យភាពថៃនៅឯណា? អធិបតេយ្យភាពថៃ នៅតំបន់មុំបី មានប្រាសាទតាមាន់ធំ ប្រាសាទតាមាន់តូច និងប្រាសាទតាក្របី ឬយ៉ាងម៉េច? ព្រោះថៃចង់បានប្រាសាទនេះយូរយារណាស់មកហើយ»។

ជាមួយនឹងការលើកឡើងបែបនេះ សម្តេចឥស្សរវិទេសបញ្ញា ហោ​ ណាំហុង ក៏បានអះអាងឱ្យដឹងថា សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា និងសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ចង់ដោះស្រាយបញ្ហាព្រំដែនជាមួយថៃនេះដោយសន្តិវិធី គឺតាមរយៈការចរចា និងប្តឹងទៅតុលាការយុត្តិធម៌អន្តរជាតិ (ICJ)។ ក៏ប៉ុន្តែ រាជរដ្ឋាភិបាលកម្ពុជា ក៏បានត្រៀមប្រើកម្លាំងយោធាផងដែរ បើមានការឈ្លានពានណាមួយមកលើដែនអធិបតេយ្យរបស់កម្ពុជា។

សូមបញ្ជាក់ថា សម្តេចឥស្សរវិទេសបញ្ញា ហោ​ ណាំហុង គឺជាប្រមុខការទូតកម្ពុជាដ៏ឆ្នើម និងជាឥស្សរជនកម្ពុជាដែលបានដឹកនាំការតតាំងយកឈ្នះក្តីថៃក្នុងសំណុំរឿងប្រាសាទព្រះវិហារនៅតុលាការយុត្តិធម៌អន្តរជាតិ(ICJ)ក្រោមការចង្អុលបង្ហាញដោយសម្តេចតេជោ ហ៊ុន សែន ដែលកាលណោះជានាយករដ្ឋមន្រ្តីនៃព្រះរាជាណាចក្រកម្ពុជា៕