ព័ត៌មានជាតិ

ផ្លូវក្រវាត់ព្រំដែនប្រវែង ១១ គ.ម តម្លៃ ២,៥ លាន ដុល្លារ ក្រាលបេតុងនៅក្រុងបាវិត សម្ពោធដាក់ឲ្យប្រើប្រាស់

បានផុស

១១ ខែ មុន

នៅ

ថ្ងៃអាទិត្យ ១៥ មិថុនា ២០២៥

ដោយ

ផ្លូវក្រវាត់ព្រំដែនចាក់ក្រាលដោយបេតុងប្រវែង ១១គ.ម ចាប់ពីបង្គោលព្រំដែនលេខ ១៧១ ដល់ ១៧៥ បានសម្ពោធដាក់ឱ្យប្រើប្រាស់ក្រោមវត្តមានលោក ប៉េង ពោធិ៍សា អភិបាលនៃគណៈអភិបាលខេត្តស្វាយរៀង។

លោក ប៉េង ពោធិ៍សា អភិបាលខេត្តស្វាយរៀងបានថ្លែងថា កំណាត់ផ្លូវក្រវ៉ាត់ព្រំដែន ដែលរាជរដ្ឋាភិបាលបានស្ថាបនានៅក្នុងភូមិសាស្ត្រក្នុងក្រុងបាវិតខេត្តស្វាយរៀង លាតសន្ធឹងចាប់ពីបង្គោលព្រំដែនលេខ ១៧១ ក្នុងសង្កាត់បាវិត ដល់បង្គោលព្រំដែនលេខ ១៧៥ ក្នុងសង្កាត់ប្រាសាទ មានប្រវែង ១១គ.ម។

កំណាត់ផ្លូវក្រវាត់ព្រំដែននេះពីមុនជាប្រភេទផ្លូវក្រាលក្រួសក្រហម ប៉ុន្តែបានទទួលរងនូវការខូចខាតមួយចំនួន ដោយសារការប្រើប្រាស់ផង និងកត្តាភ្លៀងនៅរដូវវស្សាផង។ ដោយមើលឃើញពីតម្រូវការចាំបាច់ នៃការប្រើប្រាស់ផ្លូវឆ្លើយតបទៅនឹងកំណើនប្រជាជន កំណើននៃការប្រើប្រាស់ និងបម្រើឲ្យការរីកចម្រើននៅក្នុងមូលដ្ឋាន និងជាពិសេសដោយមានការជួយឧបត្ថម្ភគាំទ្រពីក្រុមហ៊ុន ដឹញូ វីនេទៀន រីហ្សត ទើបបានសម្រេចធ្វើការកែលម្អលើកកម្ពស់គុណភាពផ្លូវពីផ្លូវក្រាលក្រួសក្រហមទៅជាផ្លូវបេតុង ហើយដែលរៀបចំសម្ពោធដាក់ឲ្យប្រើប្រាស់ជាផ្លូវការនាពេលនេះ។

លោកអភិបាលខេត្តបានថ្លែងការអំណរគុណចំពោះក្រុមហ៊ុន ដឹញូ វីនេទៀន រីហ្សត ដែលបានចំណាយថវិកាយ៉ាងច្រើនសន្ធឹកសន្ធាប់សរុបប្រមាណ ២,៥ លានដុល្លារ ក្នុងការជួយឧបត្ថម្ភទាំងស្រុងដល់ការស្ថាបនាផ្លូវមួយខ្សែនេះ រួមជាមួយការបំពាក់អំពូលភ្លើងសូឡាអមសងខាងផ្លូវប្រមាណជាង ៣៦៨ អំពូល។

បើតាមលោកអភិបាលខេត្ត សមិទ្ធផលនេះសបញ្ជាក់ឲ្យឃើញពីវប្បធម៌ នៃការចែករំលែក និងស្មារតីរួបរួមសាមគ្គី និងកិច្ចសហប្រតិបត្តិការយ៉ាងល្អប្រសើររវាងរដ្ឋ និងវិស័យឯកជន ក្នុងកិច្ចគាំទ្រចំពោះគម្រោងអភិវឌ្ឍន៍ផ្សេងៗនៅក្នុងមូលដ្ឋានរបស់យើងជាពិសេសគឺនៅក្នុងផ្នែកហេដ្ឋារចនាសម្ព័ន្ធផ្លូវថ្នល់នេះតែម្ដង៕