ដាក់ពាក្យចូលរៀននៅ TVET បង្កើតឱកាសការងារ សាងក្តីសង្ឃឹមជំរុញលើកកម្ពស់ជីវភាព

លោក សួន ដានី ប្រធានមន្ទីរការងារបណ្តុះបណ្តាលវិជ្ជាជីវៈខេត្តក្រចេះ បាន​ឲ្យដឹង​ថា យុវជនដែល​បាន​បោះបង់ការសិក្សា ហើយពុំមានលទ្ធផលអាច​មកដាក់ពាក្យចូលរៀននៅ TVET ដើម្បីបង្កើតឱកាសការងារ និងសាងក្តីសង្ឃឹម ជំរុញ​លើកកម្ពស់ជីវភាព និងអភិវឌ្ឍសេដ្ឋកិច្ចសង្គមកាន់តែប្រសើរឡើង តាមរយៈរៀនជាប់សាលារកការងារឱ្យធ្វើ ទៅ​តាមតម្រូវការរបស់ក្រុមហ៊ុនដៃគូ។

លោកបានលើកឡើងបែបនេះ ក្នុងឱកាសដែល​រដ្ឋបាលខេត្តក្រចេះបាន​ប្រារព្ធទិវាជាតិ អប់រំបណ្តុះបណ្តាលបច្ចេកទេស និងវិជ្ជាជីវៈលើកទី ៨ ឆ្នាំ២០២៥ ក្រោមប្រធានបទ “TVET បង្កើតឱកាសការងារ និងសាងក្តីសង្ឃឹមដល់យុវជន” នាព្រឹកថ្ងៃទី១៥ ខែមិថុនា ឆ្នាំ២០២៥។

ប្រធានមន្ទីរការងារបណ្តុះបណ្តាលវិជ្ជាជីវៈខេត្តក្រចេះបានបញ្ជាក់ថា គោលនយោបាយរបស់រាជរដ្ឋាភិបាល ជំរុញ​ដល់យុវជន យុវនារី ដែលពុំទាន់មានជំនាញវិជ្ជាជីវៈឱ្យមកចូលរៀន​​ជំនាញ​ច្ចេកទេស និងវិជ្ជាជីវៈដោយឥតបង់ថ្លៃ។

បន្ថែម​ពីនេះ ការ​​ប្រារព្ធទិវាជាតិ អប់រំបណ្តុះបណ្តាលបច្ចេកទេស និងវិជ្ជាជីវៈលើកទី ៨ ឆ្នាំ២០២៥ ក៏​ដើម្បី​ផ្សព្វផ្សាយ​ដល់សហគ្រាស គ្រឹះស្ថានទាំងអស់ឱ្យមានការគាំទ្រ​ដល់ដំណើរការ​បណ្តុះបណ្តាល​លើផ្នែកហ្វឹកហាត់កូនជាង នៅពេលកំពុងសិក្សា និង​នៅពេលបញ្ចប់​ការ​សិក្សា​​ទទួល​បាន​ការងារតាម​ក្រុមហ៊ុន រោងចក្រ សហគ្រាស ស្របពេល​​មាន​ជំនាញ​ស្រាប់។

ប្រធានមន្ទីរការងារបណ្តុះបណ្តាលវិជ្ជាជីវៈខេត្តក្រចេះ បច្ចុប្បន្ននេះ​នៅតាមក្រុមហ៊ុន គ្រឹះស្ថាន រោងចក្រសហគ្រាស វិនិយោគលើគ្រប់វិស័យផ្សេងៗជាច្រើននៅក្នុងខេត្តក្រចេះ ត្រូវការកម្លាំងពលករចំនួន ៦២៧៦ កន្លែង ដោយទទួលបានប្រាក់ខែចាប់ពី ៣០០ ដុល្លារឡើងទៅ៕

អត្ថបទ៖ ប្រុញ វិធិន