សេដ្ឋវិទូ៖ សេដ្ឋកិច្ចថៃប្រឈមហានិភ័យធ្លាក់ចូល​ក្នុងវិបត្តិបរិត្តផរណា

សេដ្ឋវិទូថៃបានព្រមាន​ថា សេដ្ឋកិច្ចថៃកំពុងប្រឈមហានិភ័យនៃការធ្លាក់ចូលទៅក្នុងវិបត្តិបរិត្តផរណា ដែលសំដៅលើការធ្លាក់ចុះនៃតម្លៃទំនិញ និងសេវាកម្ម ​ក្រោមសញ្ញាសំខាន់ៗមួយចំនួន រួមទាំងការធ្លាក់ចុះនៃអតិផរណា។ នេះបើតាមការចុះផ្សាយរបស់កាសែត The Nation ។

​អតិផរណារបស់ប្រទេសថៃនៅតែបន្តធ្លាក់ចុះ ០,៥៧ ភាគរយ កាលពីខែឧសភា (អត្រាប្រចាំឆ្នាំ) ​ដែលជាការធ្លាក់ចុះ ២ ខែជាប់ៗគ្នា ខណៈអតិផរណាស្នូលឈរនៅត្រឹម ១,០៩ ភាគរយ។

ប្រធានសេដ្ឋវិទូនៃក្រុមហ៊ុន Kiatnakin Phatra Financial Group លោក Pipat Leungnaruemitchai ​ បានពន្យល់ថា ការធ្លាក់ចុះនៃអតិផរណា​ដែលកំពុងបន្ត​ក្នុងប្រទេសថៃ មិនមែនគ្រាន់តែដោយសារតែការធ្លាក់ចុះនៃតម្លៃផលិតផលនោះទេ។ វាបង្ហាញពីកង្វះ​នៃ «សម្ពាធអតិផរណា» រយៈពេលវែង​ និងជ្រាលជ្រៅនៅក្នុងសេដ្ឋកិច្ច។

សេដ្ឋវិទូដដែល​បាន​បន្តថា ការធ្លាក់ចុះនៃអតិផរណាបច្ចុប្បន្ន ​មិនមែនជាការកើតឡើងថ្មីៗនេះទេ ដោយ​អតិផរណាថៃបាន​ចុះខ្សោយយឺតយ៉ាវក្នុងរយៈពេលមួយទសវត្សរ៍កន្លងមកនេះ ​ខណៈអតិផរណាស្នូលនៅតែបន្តជាប់គាំងក្រោមអត្រាគោលដៅរបស់ធនាគារកណ្ដាល។ លោកថា នេះមិនមែនជាបញ្ហារយៈពេលខ្លីទេ ប៉ុន្តែជាសញ្ញានៃ «បញ្ហារចនាសម្ព័ន្ធកាន់តែស៊ីជម្រៅ» នៅក្នុងសេដ្ឋកិច្ចរបស់ថៃ។

លោក Pipat បាន​និយាយថា៖ «យើងគ្មាន​អតិផរណាដោយសារតែតម្រូវការ។ ​គ្មាន​សម្ពាធតម្លៃ ដែល​នេះ​ឆ្លុះបញ្ចាំងពីអសមត្ថភាពនៃអាជីវកម្ម ក្នុងការបញ្ជូន​​ថ្លៃ​តទៅអ្នកប្រើប្រាស់។ និយាយឱ្យសាមញ្ញ គឺគ្មាននរណាម្នាក់ហ៊ានដំឡើងថ្លៃ(ទំនិញ)ទេ ព្រោះអ្នកប្រើប្រាស់គ្មានលុយគ្រប់គ្រាន់ ដើម្បីទប់ទល់នឹងតម្លៃខ្ពស់»។

​អ្នកជំនាញដដែលបន្តថា កម្សោយនៃអតិផរណាក្រោមអត្រាគោលដៅ ប៉ះពាល់មិនត្រឹមតែតួលេខសេដ្ឋកិច្ចប៉ុណ្ណោះទេ ថែមទាំងទំនុកចិត្តរបស់អ្នកប្រើប្រាស់ អាជីវកម្ម និងអ្នកវិនិយោគផងដែរ។ វានាំឱ្យមានការថយចុះនូវទំនុកចិត្តលើវិស័យផ្សេងៗ។

លោកពន្យល់ថា អតិផរណាខ្សោយមានន័យថា អាជីវកម្មគ្មានអំណាចក្នុងការកំណត់តម្លៃទំនិញ​ ឬសេវាកម្ម ឬម្ចាស់ផ្ទះជួញមិនអាច​បង្កើនតម្លៃជួល។ ​ក្នុង​ការវិនិយោគ វាអាចនឹងមានការធ្លាក់ចុះ នៅពេលដែលតម្លៃផលិតផលមិនកើនឡើង ដែលធ្វើឱ្យ​វិនិយោគិនគ្មានទឹកចិត្តក្នុងការបណ្ដាក់ទុនបន្ថែមដើម្បីរកប្រាក់ចំណេញ ដែលនេះជះឥទ្ធិពលដល់ «ប្រាក់ឈ្នួល»។ ​ប្រាក់ចំណូលការងារនៅទ្រឹង ដែល​កាត់បន្ថយអំណាចទិញរបស់អ្នកប្រើប្រាស់ និងបញ្ឈប់ចរាចរប្រាក់​ក្នុងសេដ្ឋកិច្ច។ ទីបំផុត បញ្ហាទាំងនេះ បណ្តាលឱ្យមានការថយចុះបន្ថែមទៀត​លើ​ទំនុកចិត្តផ្នែកសេដ្ឋកិច្ច ​ដោយ​ទាំងអ្នកប្រើប្រាស់ និងអាជីវកម្ម ពន្យារពេលការសម្រេចចិត្តលើការចំណាយ និងការវិនិយោគ។

សេដ្ឋវិទូផ្សេងៗទៀតក៏យល់ឃើញពីសញ្ញាដូចគ្នា។ តួយ៉ាងលោក Amonthep Chawla ​ជំនួយការនាយកគ្រប់គ្រង និងជាប្រធានផ្នែកស្រាវជ្រាវនៅធនាគារ CIMB Thai បាន​លើកលើងថា កម្សោយអតិផរណាបច្ចុប្បន្ន គឺជាកម្សោយមិនសូវស្រួល​ ដែល​ឆ្លុះបញ្ចាំងពីរចនាសម្ព័ន្ធសេដ្ឋកិច្ចទន់ខ្សោយ ជាពិសេសការងើបឡើងវិញយឺតនៃអំណាចទិញក្នុងស្រុក។ ​លំហូរទំនិញថោកៗពីចិន ក៏រួមចំណែកធ្វើឱ្យបញ្ហា​នេះ កាន់តែអាក្រក់ទៅៗផងដែរ ដោយ​ក្រុមហ៊ុនក្នុងស្រុកមិនហ៊ានដំឡើងថ្លៃ ដោយ​ក្លាយបាត់បង់ការប្រកួតប្រជែងជាមួយ​ទំនិញ​ចិន។ ​

លោកបានបន្ថែមថា៖ «ទាំងនេះគឺជាបញ្ហារចនាសម្ព័ន្ធ ដែលទាមទារវិធានការរបស់រដ្ឋាភិបាលដោយផ្ទាល់ ដូចជាពន្ធនាំចូល ឬការត្រួតពិនិត្យ​ការលក់បង្ខូចថ្លៃពីប្រទេសចិន»។ លោកថា ការពឹងផ្អែកខ្លាំងទៅលើគោលនយោបាយអត្រាការប្រាក់របស់ធនាគារកណ្ដាល មិនមែនជាជម្រើសល្អនោះទេ។

ជាមួយ​គ្នានោះ ការថយចុះនៃអតិផរណាក៏ឆ្លុះបញ្ចាំងពីការស្ទុះងើបឡើងវិញយឺតនៃប្រាក់ចំណូលគ្រួសារ​ក្នុងប្រទេសថៃ ដោយសារប្រជាជន​នៅតែប្រឈមមុខនឹង​អសន្តិសុខផ្នែកហិរញ្ញវត្ថុ ដោយសារតែបំណុលខ្ពស់ និងប្រាក់ចំណូលនៅទ្រឹង។

លើសពីនេះ បច្ចុប្បន្ន​នេះ សេដ្ឋកិច្ច​​​ថៃ​ប្រឈម​មុខ​នឹង​​បញ្ហាទាំងក្នុង និងក្រៅប្រទេស រួមទាំងបំណុលគ្រួសារ ការប្រកួតប្រជែងពីចិន និងសង្រ្គាមពាណិជ្ជកម្មដែលកំពុងបន្តជាដើម៕ ​