មហាសំណាង! មនុស្សម្នាក់គត់នៅរស់ពីការធ្លាក់យន្តហោះឥណ្ឌា ដោយសារលោតចុះតាមច្រកចេញអាសន្ន

សំណាងមួយក្នុងមួយលានគ្រោះថ្នាក់ ដែលបុរសម្នាក់អាចរួចផុតពីចង្កូមមច្ចុរាជ ក្នុងហេតុការណ៍ធ្លាក់យន្តហោះនៅប្រទេសឥណ្ឌា សម្លាប់មនុស្ស២៤១នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុរសមហាសំណាងម្នាក់នេះមានឈ្មោះ Ramesh Viswashkumar ជាជនជាតិអង់គ្លេសដើមកំណើតឥណ្ឌា​អាយុ៤០ឆ្នាំ។ តាមការបញ្ជាក់ពីប៉ូលិស មូលហេតុដែល Viswashkumar នៅរស់គឺដោយសារគាត់អង្គុយនៅកៅអី 11A ជាប់ច្រកគ្រាអាសន្ន ហើយគាត់បានលោតចុះតាមទ្វារនោះ ពេលយន្តហោះរៀបនឹងធ្លាក់ដល់ដី។

តាមរយៈវីដេអូថតបាននៅកន្លែងកើតហេតុ គឺឃើញថាគាត់រងរបួសនិងជាំមុខ ប៉ុន្តែអាចដើរបាន។ ក្រោយមកគាត់ក៏ត្រូវគេបញ្ជូនទៅកាន់មន្ទីរពេទ្យក្នុងតំបន់ដើម្បីព្យាបាល។

ទោះបីជាយ៉ាងណាក៏ដោយ គេនៅតែមិនទាន់ហ៊ានបញ្ជាក់លម្អិតថាតើ គាត់អាចលោតចុះនិងគេចផុតពីសេចក្តីស្លាប់ដោយរបៀបណា?

​សូមជម្រាបថា ក្រុម​​​ហ៊ុន​អាកាស​ច​​រណ៍​ឥណ្ឌា​ (Air India) ដឹកមនុស្ស​​​​​​២៤២​នាក់ ក្នុងដំណើរឆ្ពោះ​ទៅ​​​​ព្រលាន​យន្តហោះ Gatwick ​នៃ​ទីក្រុង​ឡុង​ដ៍​ចក្រភព​អង់គ្លេស​ ​​បាន​ធ្លាក់​​​​ភ្លាម​ៗ​ ក្រោយ​​ហោះ​​ហើរ​ឡើង​​​​​​​​ក្នុង​ទីក្រុង Ahmedabad ​ភាគខាងលិច​​ប្រទេសឥណ្ឌា។

​យន្តហោះនេះជា​ប្រភេទ​​ 787-8 Dreamliner របស់​ក្រុមហ៊ុន​ផលិត​យន្តហោះ ​Beoing ដែល​ជា​​ក្រុមហ៊ុន​​ផលិត​​​យន្តហោះ​​ឈានមុខ​របស់​​ពិភពលោក របស់​សហរដ្ឋ​អាមេរិក។

មកទល់ពេលនេះ គេនៅតែមិនទាន់ដឹងអំពីមូលហេតុដែលបណ្តាលឲ្យជើងហោះហើរ AI171 មួយនេះធ្លាក់ចូលតំបន់ស៊ីវិល៕

អត្ថបទ៖ សុខ សុវណ្ណ

ចុចអាន៖ ​៤ប្រទេស ​មាន​​​ប្រជាជន​ជិះយន្តហោះ​ដែលធ្លាក់​នៅ​ឥណ្ឌាថ្ងៃ​នេះ​​