ព័ត៌មានជាតិ

កសិផលសំខាន់ៗ ៥ ប្រភេទ ដាំដុះក្នុងខេត្តឧត្តរមានជ័យ

បានផុស

២ ម៉ោង មុន

នៅ

ថ្ងៃសុក្រ ១៨ កក្កដា ២០២៥

ដោយ

លោក សូត្រ ស៊ីសុខឃាង ប្រធានមន្ទីរកសិកម្មខេត្តឧត្តរមានជ័យ នៅថ្ងៃទី១៧ ខែកក្កដា ឆ្នាំ២០២៥ នេះ បានមានប្រសាសន៍ថា ដំណាំកសិកម្មសំខាន់ៗក្នុងខេត្តឧត្តរមានជ័យមានប្រមាណ ៥ ប្រភេទសំខាន់ៗ ដូចជា ស្រូវ ដំឡូងមី ស្វាយចន្ទី ស្វាយកែវរមៀត និងដំណាំកៅស៊ូជាដើម ដែលប្រជាពលរដ្ឋដាំដុះនាពេលបច្ចុប្បន្ន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រាប់ «កម្ពុជាថ្មី» លោក សូត្រ ស៊ីសុខឃាង បានមានប្រសាសន៍ថា ដំណាំដាំដុះនៅក្នុងខេត្តទី១ គឺជាដំណាំស្រូវ ក្រៅពីនេះក៏នៅមានដំណាំកសិកម្មមួយចំនួនទៀត ព្រមទាំងដំណាំបន្ទាប់បន្សំដែលពលរដ្ឋបានដាំដុះ។

ក្នុងនោះដំណាំស្រូវ ខេត្តមានផ្ទៃដីដាំដុះស្រូវប្រមាណ ១៣ម៉ឺនហិតា ដែលបច្ចុប្បន្នកសិករបានកំពុងដាំដុះ ហើយអាចប្រមូលផលនៅកំឡុងខែវិច្ឆិកាខាងមុខ។

ក្រៅពីស្រូវជាដំណាំយុទ្ធសាស្ត្រ ដំណាំកសិ-ឧស្សាហកម្មផ្សេងទៀត ក៏មានការកើនឡើងជាលំដាប់គួរឱ្យកត់សម្គាល់ផងដែរ ក្នុងនោះ ដំឡូងមីកសិករកំពុងដាំដុះនៅលើផ្ទៃដីជាង ៧ម៉ឺនហិតា, ដំណាំស្វាយចន្ទី ដាំដុះលើផ្ទៃដី ១ ម៉ឺន ៨ ពាន់ ៥០០ ហិតា ហើយអាចប្រមូលផលបានប្រមាណ ៧០% ទៅ ៨០% ទៅលើផ្ទៃដីដាំដុះសរុប។

ក្រៅពីនេះ ក៏នៅមានដំណាំស្វាយកែវរមៀត ដាំដុះលើផ្ទៃដីជាង ១ ម៉ឺន ៤ ពាន់ហិតា ដែលសុទ្ធសឹងតែជាដំណាំសក្ដានុពលធំៗដែលកសិករបានដាំដុះនៅក្នុងចម្ការ។

ប្រធានមន្ទីររូបនេះ បានឱ្យដឹងដែរថា ក្រៅពីដំណាំខាងលើ ខេត្តក៏មានដំណាំកៅស៊ូ ដែលមានផ្ទៃដីដុះសរុបជាង ១ម៉ឺន ៨ ពាន់ហិតា ចែកចេញជាពីរ គឺកៅស៊ូគ្រួសារ និងកៅស៊ូក្រុមហ៊ុន។

ជុំវិញដំណាំកៅស៊ូនេះដែរ បច្ចុប្បន្នមានស្ថានភាពល្អប្រសើរដោយកៅស៊ូគ្រួសារបាននិងកំពុងនាំគ្នាបង្កើនផ្ទៃដីដាំដុះបន្ថែមទៀត ដោយសារតែមានរោងចក្រកែច្នៃកៅស៊ូកង់ឡាននៅក្នុងប្រទេស ជាពិសេសនៅតំបន់សេដ្ឋកិច្ចពិសេស ហើយសព្វថ្ងៃគម្រោងនៃការកែប្រែជាចម្ការកៅស៊ូ ក៏កំពុងកើតមានជាបន្តបន្ទាប់ដូចគ្នាដែរ។

លោក សូត្រ ស៊ីសុខឃាង បានអះអាងថា ក្រៅពីនេះ ក៏នៅមានផ្ទៃដីដាំបន្លែបន្ទាប់បន្សំផ្សេងទៀតហើយប្រសិនបើកសិករអាចដាំដុះបានល្អប្រសើរដូចជាឪឡឹក និងពូជត្រសក់ផ្អែម គឺមានកិច្ចសន្យាអាចនាំចេញទៅលក់នៅក្រៅប្រទេសផងដែរ។

យ៉ាងណាមិញ លោកប្រធានមន្ទីរបានលើកឡើងថា ដំណាំរួមសំខាន់ៗទាំងអស់នេះ ទាំងស្រូវ ដំឡូងមី កៅស៊ូ សុទ្ធសឹងតែមានរោងចក្រកែច្នៃនៅក្នុងស្រុក ធ្វើជាផលិតសម្រេច និងពាក់កណ្តាលសម្រេចដើម្បីធ្វើការនាំចេញលក់ទាំងទីផ្សារក្នុងស្រុក និងសម្រាប់នាំចេញទៅលក់នៅក្រៅប្រទេស។

ទន្ទឹមនេះ ជុំវិញការបិទព្រំដែនគោកកម្ពុជា-ថៃ លោកយល់ឃើញថានេះជាឱកាសមួយសម្រាប់កសិករព្រោះកន្លងមកយើងពឹងផ្អែកទៅលើទីផ្សាររបស់គេមួយចំនួនពាក់ព័ន្ធបន្លែ ត្រី សាច់ ជាដើម ប៉ុន្តែនៅពេលបិទព្រំដែន កសិករ ក៏ដូចជាសហគមន៍បានខិតខំផលិតដើម្បីផ្គត់ផ្គង់លើទីផ្សារ ដូច្នេះជួយឱ្យអ្នកផលិតកាន់តែទទួលបានប្រាក់ចំណូលកាន់តែល្អប្រសើរជាងមុន និងអាចឱ្យការហូបចុកតាមមូលដ្ឋានកាន់តែមានសុវត្ថិភាពជាងមុនផងដែរ៕

ដោយ៖ ឌិន ថារី