ថ្ងៃទី១៧កក្កដា សមត្ថកិច្ចខេត្តឧត្តរមានជ័យ បង្ក្រាបទីតាំងបទល្មើសOnline Scams ចំនួន​៩កន្លែង ឃាត់ខ្លួនជនសង្ស័យ១០៣នាក់

កាលពីថ្ងៃទី១៧កក្កដា ម្សិលមិញនេះ កម្លាំងគណៈបញ្ជាការឯកភាពរដ្ឋបាលខេត្តឧត្តរមានជ័យ បានបើកប្រតិបត្តិការចុះបង្ក្រាបទីតាំងសង្ស័យមានការលួចលាក់បង្កប់បទល្មើស Online Scams ចំនួន០៩កន្លែងផ្សេងគ្នា និងឃាត់ខ្លួនជនសង្ស័យជាជនបរទេសសរុបចំនួន១០៣នាក់។ ក្នុងចំណោមជនសង្ស័យទាំងនេះ មានជនជាតិចិនចំនួន ៧៨នាក់ ស្រ្តី ១៧នាក់, ជនជាតិវៀតណាម ១៩នាក់ ស្ត្រី ១៦នាក់, ជនជាតិថៃ ០១នាក់, និងជនជាតិឡាវ ០៥នាក់ ស្ត្រី ០៥នាក់។

ប្រតិបត្តិការនេះបានធ្វើឡើងនៅទីតាំងចំនួន៩ផ្សេងគ្នា នៅក្នុងភូមិសាស្ត្រភូមិសាស្ត្រខេត្តឧត្តរមានជ័យ រួមមាន អូរស្មាច់ ក្រុងសំរោង និងភូមិសាស្ត្រជប់គគីរ និងស្រុកបន្ទាយអំពិល។ ទីតាំងដែលចុះបង្ក្រាបមាន ទីតាំងផ្ទះសំណាក់ សណ្ឋាគារ ផ្ទះជួល រីសត។

ក្នុងប្រតិបត្តិការបង្រ្កាបការឆបោកតាមប្រព័ន្ធបច្ចេកវិទ្យា (Online Scams) កម្លាំងសមត្ថកិច្ចបានដកហូតសម្ភារៈរួមមានកុំព្យូទ័រ, ម៉ាទឹកកក, អាវុធ, កាំបិតស្នៀត និងវត្ថុតាងផ្សេងទៀត ត្រូវបានក្រុមសមត្ថកិច្ចប្រមូលទុកជាវត្ថុតាង។ បច្ចុប្បន្ន ជនដែលត្រូវបានឃាត់ខ្លួន និងវត្ថុតាងទាំងអស់ត្រូវបានប្រគល់ជូនស្នងការដ្ឋាននគរបាលខេត្ត ដើម្បីបន្តអនុវត្តនីតិវិធី ខណៈទីតាំងបង្រ្កាបទាំងអស់ត្រូវបានបិទទាំងស្រុង ជាមួយនឹងការយាមកាម ២៤ម៉ោង៕