ព័ត៌មានអន្ដរជាតិ

គ្រឿងក្នុងបុរសវៀតណាមពិការខួរក្បាលម្នាក់ ជួយជីវិតមនុស្សដល់ទៅ ៤ នាក់

បានផុស

៨ ខែ មុន

នៅ

ថ្ងៃព្រហស្បតិ៍ ២០ កក្កដា ២០២៣

ដោយ

ឪពុកបុរសពិការខួរក្បាលម្នាក់នៅខេត្ត Phu Tho ភាគខាងជើងប្រទេសវៀតណាម បានសម្រេចចិត្តបរិច្ចាគសរីរាង្គរបស់កូនប្រុសដើម្បីជួយជីវិតមនុស្ស ៤ នាក់ផ្សេងទៀត ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បេះដូងរបស់បុរសពិការខួរក្បាល បន្ទាប់ពីជួបគ្រោះថ្នាក់ចរាចរណ៍នោះ បានបរិច្ចាគទៅឲ្យអ្នកជំងឺបេះដូងរីកអស់រយៈពេល ១៣ ឆ្នាំនៅមន្ទីរពេទ្យកណ្តាល Hue ក្នុងខេត្ត Thua Thien-Hue ភាគកណ្តាលប្រទេសវៀតណាមដោយជោគជ័យ ។

ចំណែកឯថ្លើម និង ក្រលៀនទាំងសងខាងរបស់គាត់បានជួយជីវិតអ្នកជំងឺ ៣ នាក់ទៀត ដែលកំពុងទទួលការព្យាបាលនៅមន្ទីរពេទ្យសាកលវិទ្យាល័យ Viet Duc មានមូលដ្ឋាននៅទីក្រុងហាណូយ ។ គ្រូពេទ្យបានឲ្យដឹងថា ពេលនេះសុខភាពអ្នកទាំង ៤ មានស្ថានភាពនឹងនធម្មតាទេ ។

ចំណែកបុរសពិការខួរក្បាលវ័យ ៣២ ឆ្នាំវិញ គាត់មានសុខភាពល្អណាស់ មុនជួបគ្រោះថ្នាក់ចរាចរណ៍ ។ គាត់បានជួបហេតុការណ៍ដ៏សោកសៅនេះ ខណៈត្រឡប់មកពីធ្វើការវិញ ហើយគ្រានោះឪពុករបស់គាត់បានប្រញាប់ប្រញាល់បញ្ជូនគាត់ទៅពេទ្យដែរ ប៉ុន្តែមន្ទីរពេទ្យសាកលវិទ្យាល័យ Viet Duc បានណែនាំឲ្យឪពុកជនរងគ្រោះបរិច្ចាគសរីរាង្គខាងក្នុងរបស់កូនប្រុសទៅ ព្រោះលោកមិនមានសង្ឃឹមឡើយ ។

គួរបញ្ជាក់ថា ក្រុមគ្រួសារជនរងគ្រោះមានតែឪពុកម្នាក់ប៉ុណ្ណោះ ព្រោះបងប្រុសរបស់បុរសពិការខួរក្បាលបានស្លាប់ដោយសារគ្រោះថ្នាក់ចរាចរណ៍មុនគាត់ទៅទៀត សូម្បីម្ដាយពួកគេក៏បានស្លាប់ជាង ១ ឆ្នាំមកហើយដែរ ។ ដូច្នេះការបរិច្ចាគគ្រឿងក្នុងរបស់បុរសខាងលើ ប្រៀបបាននឹងឃើញកូនប្រុសរបស់លោករស់នៅក្នុងរាងកាយមនុស្ស ៤ នាក់ដូចគ្នា ៕

ប្រែសម្រួល៖ វារី

ប្រភព៖ tuoitrenews

ចុចអាន៖ គ្រឿងក្នុងរបស់ Park Soo Ryun នឹងត្រូវបរិច្ចាគ ក្រោយទទួលមរណភាពក្នុងវ័យ ២៩ ឆ្នាំ