ករណីជំងឺកញ្ជ្រឹលបន្តកើនឡើង​នៅ​វៀតណាម

ចាប់តាំងពីដើមខែធ្នូ​​ ករណីជំងឺកញ្ជ្រឹលនៅក្នុងខេត្ត និងទីក្រុងភាគខាងត្បូងប្រទេសវៀតណាមមានការកើនឡើង ហើយកំណើននេះត្រូវបានគេរំពឹងថានឹងបន្តរហូតដល់ដើមឆ្នាំក្រោយ។ នេះបើយោងតាមវិទ្យាស្ថានប៉ាស្ទ័រទីក្រុង ហូជីមិញ ។

លោកវេជ្ជបណ្ឌិត Du Tuan Quy ប្រធានផ្នែកជំងឺឆ្លង និងសរសៃប្រសាទនៅមន្ទីរពេទ្យកុមារទីក្រុង ហូជីមិញលេខ១ បាននិយាយថា ចំនួនករណីជំងឺកញ្ជ្រឹលបានកើនឡើងយ៉ាងខ្លាំងក្នុងប៉ុន្មានសប្តាហ៍ថ្មីៗនេះ ពី ៨០ ករណីដល់ជាង ១០០ករណីក្នុងមួយសប្តាហ៍ ដែលភាគច្រើនត្រូវបានផ្ទេរពីខេត្តផ្សេងៗ។

កុមារដែលមានប្រព័ន្ធការពាររាងកាយធម្មតាកើតជំងឺនេះស្រាល ប៉ុន្តែចំពោះកុមារដែលមានជំងឺមូលដ្ឋានដូចជា ជំងឺ​បេះដូង​ពីកំណើត ជំងឺសរសៃប្រសាទ ឬមហារីក ការ​កើត​​ជំងឺ​កញ្ជ្រឹលនឹង​បង្កភាព​ធ្ងន់ធ្ងរ ហើយអាចឈានទៅដល់ការ​ស្លាប់ ប្រសិនបើមិនបានព្យាបាលទាន់ពេលវេលា។

តាមលោក Quy មិនត្រឹមតែកុមារប៉ុណ្ណោះទេ ប៉ុន្តែមនុស្សធំក៏អាចកើតជំងឺកញ្ជ្រឹលផងដែរ ប្រសិនបើពួកគេមិនបានទទួលថ្នាំបង្ការ។ ជាពិសេស ស្ត្រីមានផ្ទៃពោះដែលមិនបានចាក់វ៉ាក់សាំង គឺមានហានិភ័យនៃផលវិបាកធ្ងន់ធ្ងរ ដូចជាការរលូតកូន ឬការសម្រាលកូនមិនទាន់រួច ដោយមន្ទីរពេទ្យពិតជាបានកត់ត្រាម្តាយដែលទើបតែសម្រាលកូន ប៉ុន្តែមិនទាន់បានចាក់វ៉ាក់សាំង និងបានឆ្លងមេរោគដោយចៃដន្យនៅមន្ទីរពេទ្យ។

យោងតាមមន្ទីរពេទ្យទីក្រុង ហូជីមិញ បន្ថែមពីលើការកើនឡើងនៃចំនួនកុមារដែលមានជំងឺកញ្ជ្រឹល មន្ទីរពេទ្យក៏បានកត់ត្រាការកើនឡើងនៃចំនួនអ្នកជំងឺពេញវ័យដែលមានជំងឺកញ្ជ្រឹលផងដែរ។ ចាប់តាំងពីខែសីហាមក មន្ទីរពេទ្យបានព្យា​បាល​ជំងឺកញ្ជ្រឹលជាង ៩០០ ករណីដែលក្នុងនោះ៦៥-៧០ ភាគរយជាមនុស្សពេញវ័យ។

បច្ចុប្បន្ននេះ មានករណីជំងឺកញ្ជ្រឹលលើមនុស្សពេញវ័យចំនួន ២៣​ករណី ដែលក្នុងនោះ ៤នាក់មានសភាពធ្ងន់ធ្ងរ និងត្រូវការការព្យាបាលដោយអុកស៊ីសែន ហើយពួកគេខ្លះត្រូវការការព្យាបាលដោយអុកស៊ីសែនរយៈពេល៥​ថ្ងៃ។

លោកវេជ្ជបណ្ឌិត Quy បាននិយាយថា បញ្ហាដែលគួរឱ្យព្រួយបារម្ភនោះគឺថា កុមារភាគច្រើនដែលចូលមន្ទីរពេទ្យមិនបានចាក់វ៉ាក់សាំង ឬមិនបានទទួលថ្នាំចំនួនពីរដែលត្រូវបានណែនាំ។ ឪពុកម្តាយមួយចំនួន ជាពិសេសនៅតាមជនបទ នៅតែមានការយល់ខុសថា កញ្ជ្រឹលជាជំងឺស្រាល ហើយមិនទាមទារការចាក់វ៉ាក់សាំងទេ។

ឪពុកម្តាយប្រហែល ១០ ទៅ ១២ភាគរយនៅតែប្រកាន់ខ្ជាប់នូវទស្សនៈប្រឆាំងនឹងការចាក់វ៉ាក់សាំង។ អ្នកជំនាញបានបន្ថែមថា អ្នកខ្លះជឿថា វ៉ាក់សាំងការពារជំងឺកញ្ជ្រឹលអាចបង្កឱ្យមានជំងឺអូទីសឹម ខណៈដែលការពិត វ៉ាក់សាំងជំងឺកញ្ជ្រឹលគឺជាវ៉ាក់សាំងដែលមានសុវត្ថិភាពបំផុត ដោយស្ទើរតែគ្មានផលប៉ះពាល់ដែលបានកត់ត្រាទុក។

គួរបញ្ជាក់ថាស្ថិតិពីវិទ្យាស្ថានប៉ាស្ទ័រទីក្រុងហូជីមិញ បានបង្ហាញថា ចាប់តាំងពីដើមឆ្នាំមក ខេត្ត និងក្រុងចំនួន ២០ នៅតំបន់ភាគខាងត្បូងបានកត់ត្រាករណីជំងឺកញ្ជ្រឹលចំនួន១៩០០០។

ក្រុម​មនុស្សដែល​មាន​ករណី​ឆ្លង​ច្រើន​ជាង​គេ​គឺ​កុមារ​អាយុ​ពី​មួយ​ឆ្នាំ​ដល់​ដប់​ឆ្នាំ ដែល​មាន​ប្រហែល​៦០​ភាគរយ​នៃ​ចំនួន​សរុប។ ជំងឺនេះកំពុងកើនឡើងយ៉ាងឆាប់រហ័សនៅក្នុងតំបន់ជាច្រើន ជាមួយនឹងការផ្ទុះសកម្មចំនួន ៤៦​ដែលមានចំនួនខ្ពស់បំផុតនៅក្នុងទីក្រុង Dong Nai, Binh Duong  និងទីក្រុងហូជីមិញ៕

អត្ថបទ៖ ប៊ុន សុភាព