ព័ត៌មានអន្ដរជាតិ

កាត់ទោសប្រហារជីវិតបុរសវៀតណាមម្នាក់ ពីបទសម្លាប់គ្រួសារ

បានផុស

១០ ខែ មុន

នៅ

ថ្ងៃព្រហស្បតិ៍ ១០ កក្កដា ២០២៥

ដោយ

តុលាការប្រជាជនទីក្រុងហាណូយកាលពីថ្ងៃទី ៨ ខែកក្កដា បានសម្រេចកាត់ទោសប្រហារជីវិតលោក Vu Van Vuong អាយុ ៥១ ឆ្នាំ ពីបទឃាតកម្ម។ នៅក្នុងការជំនុំជម្រះ បុសរវ័យ ៥១ ឆ្នាំ បានទទួលស្គាល់ថា ខ្លួនពីតជាបានប្រព្រឹត្តបទឧក្រិដ្ឋ ហើយបានស្នើឲ្យកាត់ទោសឲ្យបានឆាប់តាមដែលអាចធ្វើទៅបាន។

**រូបតំណាងជនជាប់ចោទ (រូបភាព៖e.vnexpress)**

ឧក្រិដ្ឋជនរូបនេះ ធ្វើជាជាងឫស្សី និងតម្បាញ ចំណែកប្រពន្ធជាកម្មករសំណង់។ ពួកគេរស់នៅជាមួយម្តាយអាយុ ៧៨ ឆ្នាំ និងកូនពីរនាក់របស់ពួកគេដែលមានអាយុ ១៧ និង ១៩ ឆ្នាំ។ ចាប់តាំងពីដើមឆ្នាំ ២០២៤ Vuong បានឈប់ធ្វើការដើម្បីមើលថែម្តាយរបស់គាត់ដែលដេកលើគ្រែ។

យោងតាមព្រះរាជអាជ្ញា លោក Vuong មានសុខភាពខ្សោយ ហើយមានអារម្មណ៍ថាជីវិតបានក្លាយទៅជាលំបាកពេក និងអស់សង្ឃឹម។ គាត់បានសម្រេចចិត្តសម្លាប់គ្រួសារទាំងមូល មុននឹងម្លាប់ខ្លួនឯងតាមក្រោយ។

កាលពីថ្ងៃទី១៥ ខែមករា បន្ទាប់ពីប្រពន្ធរបស់គាត់ចេញពីធ្វើការ ហើយកូនប្រុសរបស់គាត់ទៅសាលារៀន ជននេះបានហៅកូនស្រីអាយុ១៩ឆ្នាំរបស់គាត់ចូលទៅក្នុងបន្ទប់នៅម៉ោងប្រហែល១០ព្រឹក ហើយបានបើកភ្លេងខ្លាំងៗនៅលើទូរស័ព្ទផ្ទាល់ខ្លួន រួចធ្វើសកម្មភាពវាយកូននឹងកាំបិតឈើមួយ។ គាត់បានលាក់ខ្លួននាងក្រោមគ្រែ ហើយសម្អាតឈាមដែលប្រឡាក់នៅលើគ្រែភ្លាមៗ។

នៅថ្ងៃនោះ បន្ទាប់ពីបានទទួលទានអាហារថ្ងៃត្រង់ជាមួយកូនប្រុសអាយុ ១៧ឆ្នាំ គាត់បានសម្លាប់កូនក្នុងពេលជាមួយគ្នាផងដែរ ដោយដាក់សាកសពកូនទាំងពីរជាមួយគ្នាតែម្ដង។ នៅពេលប្រពន្ធត្រឡប់មកផ្ទះវិញនៅម៉ោង៥ល្ងាច ហើយសួរពីកូន ជនដៃដល់និយាយកុហកថា ម្នាក់ចេញក្រៅជាមួយមិត្តភ័ក្ដិ និងម្នាក់ទៀតស្នាក់នៅកន្លែងធ្វើការ។ ប្រហែលពាក់កណ្តាលអធ្រាត្រ គាត់បានសម្លាប់ប្រពន្ធរបស់គាត់ និងម្តាយចាស់របស់គាត់ចោលតែម្ដង។ ក្រោយមក គាត់បានសរសេរសំបុត្រអត្តឃាត និងព្យាយាមសម្លាប់ខ្លួនជាច្រើនដង ដោយលេបថ្នាំងងុយគេង ប៉ុន្តែបែរជារួចជីវិតទៅវិញ។

នៅយប់បន្ទាប់ Vuong បានភៀសខ្លួនចេញពីទីក្រុងហាណូយតាមឡានក្រុងទៅកាន់ខេត្ត Ba Ria-Vung Tau ដែលឥឡូវជាផ្នែកមួយនៃទីក្រុងហូជីមិញ។ ពីរថ្ងៃក្រោយមក ប៉ូលិសបានចាប់ខ្លួនគាត់នៅនឹងកន្លែងតែម្ដង៕

អត្ថបទ៖ សាង ស្រីល័ក្ខ

ចុចអាន៖វៀតណាម រកឃើញទីតាំង៣កន្លែង ប្រើសារធាតុគីមី ត្រាំត្រយ៉ូងចេក