របៀបសរសេរប្រវត្តិរូបសង្ខេប (CV) អាហារូបករណ៍ឲ្យមានភាពទាក់ទាញ

ប្រវត្តិរូបសង្ខេប (CV) ពិតជាមានសារៈសំខាន់ណាស់សម្រាប់មនុស្សម្នាក់ៗ មិនថាចូលម្រើការងារ ឬដាក់ពាក្យស្នើសុំអាហារូបករណ៍អ្វីមួយឡើយ គឺគ្រប់ស្ថាប័នទាំងអស់តម្រូវឲ្យមានប្រវត្តិរូបសង្ខេបនេះគ្រប់ៗគ្នា។ CV គឺមានច្រើនប្រភេទ និងច្រើនទម្រង់ ហើយ​ CV ដាក់ពាក្យស្នើសុំអាហារូបករណ៍ គឺខុសពី CV ដាក់ពាក្យបម្រើការងារដែលសិស្សនិស្សិតគួរស្វែងយល់ពីគន្លឹះសរសេរឲ្យបានល្អ និងមានភាពទាក់ទាញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តើគន្លឹះសរសេរប្រវត្តិរូបសង្ខេបឲ្យបានល្អ និងមានភាពទាក់ទាញ មានលក្ខណៈបែបណាខ្លះ?

ជំហានដំបូង ដើម្បីកុំឲ្យប្រវត្តិរូបសង្ខេបរបស់អ្នកមានភាពរញ៉េរញ៉ៃ និងក្តោបទិន្នន័យមិនបានល្អ អ្នកគួរបែងចែកការសរសេប្រវត្តិសង្ខេបនេះ ជា០៨ ផ្នែកសំខាន់ៗជាមុនសិន។ ផ្នែកទាំងនោះមានដូចជា ព័ត៌មានទំនាក់ទំនង សង្ខេបប្រវត្តិអប់រំ និងគោលដៅ បទពិសោធការងារ ឬ ពានរង្វាន់ ការអប់រំ ជំនាញ ចំណង់ចំណូលចិត្ត ភាសា និងអ្នកធានា។

១.ព័ត៌មានទំនាក់ទំនង៖ សរសេរប្រវត្តិរូបសង្ខេប ត្រូវភ្ជាប់ជាមួយនឹងនាមត្រកូល លេខទូរសព្ទទំនាក់ទំនង ទីកន្លែងស្នាក់នៅបច្ចុប្បន្ន និងEmail។ អ្នកមិនចាំបាច់ដាក់ព័ត៌មានណាដែលមិនចាំបាច់ឡើយ ដូចជាទីកន្លែងកំណើតជាដើម។

២.សង្ខេបប្រវត្តិអប់រំ និងគោលដៅ៖ នៅចំណុចនេះ អ្នកគួរសង្ខេបបន្តិចពីបច្ចុប្បន្នភាពនៃការសិក្សារបស់អ្នក។ បន្ទាប់មក អ្នកអាចសរសេរពីគោលបំណងសំខាន់ និងច្បាស់លាស់ដែលអ្នកចង់បានពីអាហារូបករណ៍នេះ ព្រមទាំងការប្តេជ្ញាចិត្តយ៉ាងមុតមាំរបស់អ្នក។

៣.បទពិសោធការងារ ឬ ពានរង្វាន់ដែលទទួលបាន៖ បទពិសោធការងារនេះ អ្នកអាចសរសេរពីការងារដែលអ្នកធ្លាប់ធ្វើកន្លងមក ដូចជាការងារស្ម័គ្រចិត្តក្នុងសង្គម ការហាត់ការ និងអាចជាការចូលរួមក្នុងកម្មវិធីសិក្ខាសាលាណាមួយ ឬ អាចជាយុទ្ធនាកាអ្វីមួយដែលចូលរួមចំណែកជួយដល់សង្គម។ ប្រសិនជាអ្នក មានជំនាញភាពជាអ្នកដឹកនាំកាន់តែល្អ មិនថាក្នុងសង្គម ក្នុងសហគមន៍ ឬ ថ្នាក់រៀនរបស់អ្នក។

ម្យ៉ាងវិញទៀត ពានរង្វាន់ ឬ អ្វីដែលអ្នកធ្លាប់ចូលប្រកួតផ្នែកចំណេះដឹងនៅស្ថាប័នណាខ្លះ ក៏គួរតែរាប់បញ្ចូលផងដែរ ដើម្បីឲ្យប្រវត្តិរូបអ្នកកាន់តែមានទម្ងន់ និងភាពទាក់ទាញ។ អ្វីដែលសំខាន់នោះគឺ អ្នកគួរដាក់ឆ្នាំនៃព្រឹត្តិការណ៍នីមួយការងារថ្មីៗ ទៅចាស់។

៤.ការអប់រំ៖ ចំណុចការអប់រំ អ្នកគួរដាក់ប្រវត្តិការសិក្សារបស់អ្នកពីតាមឆ្នាំសិក្សាបញ្រ្ចាស់ពីបច្ចុប្បន្ន ទៅអតីតកាល ត្រឹមកម្រិតវិទ្យាល័យ។ ពិន្ទុដែលអ្នកទទួលបានខ្ពស់បំផុត ឬ GPA នៅសាកលវិទ្យាល័យ។

៥.ជំនាញ៖ នៅចំណុចនេះ អ្នកមិនគួរសរសេរពីចំណុចមិនល្អរបស់ខ្លួនទេ វាជាឱកាសដែលអ្នកអួតពីជំនាញរបស់អ្នក ដូចជាអ្នកពូកែខាងអ្វី? ផ្នែកទំនាក់ទំនង? ប្រព័ន្ធបច្ចេកទេស?

៦.ចំណង់ចំណូលចិត្ត៖ អ្នកគួររៀបរាប់ពីអ្វីដែលអ្នកចូលចិត្តធ្វើ ដូចជាការងារក្នុងសង្គម ធ្វើការជាក្រុម ឬ ចែករំលែកបទពិសោធផ្សេងៗដល់អ្នកដទៃជាដើម។

៧.ភាសា៖ ផ្នែកភាសា គឺសំខាន់ណាស់ អ្នកគួរសរសេរពីភាសាទាំងអ្នកចេះទាំងប៉ុន្មាន ដើម្បីលើកពីគុណភាព CV របស់អ្នកឲ្យមើលទៅកាន់តែលេចធ្លោ។

៨.អ្នកធានា៖ ចំណុចចុងក្រោយនេះ គឺអ្នកធានា អ្នកគួរស្នើសុំដល់បុគ្គលណាដែលមានឋានៈ ឬ មុខតំណែងល្អ ដើម្បីធ្វើជាអ្នកធានារបស់អ្នក អាចជាសាស្ត្រាចារ្យ ឬ អ្នកគ្រប់គ្រងណាមួយដែលអ្នកស្គាល់ស្និទស្នាល។

គួររំលឹកថា ដើម្បីសិស្សនិសិ្សតត្រៀមខ្លួនបានល្អនៅពេលជួបសម្ភាសន៍ផ្ទាល់ក្នុងដំណាក់ការទទួលបានអាហារូបករណ៍នោះ គឺសិស្សនិស្សិតគ្រប់រូប គួរសិក្សាពីក្រុមហ៊ុន សាលា ឬ ស្ថាប័នដែលខ្លួនបានដាក់ពាក្យទៅនោះឲ្យបានច្បាស់លាស់សិន ដើម្បីទទួលបានព័ត៌មានច្រើន និងច្បាស់លាស់៕

ដោយ៖ អុន ស្រីមាន