យន្តហោះចម្បាំងអាមេរិក ចាកចេញពីមូលដ្ឋាននៅអង់គ្លេសហើយ ដើម្បីទៅជួយអ៊ីស្រាអែល ប្រយុទ្ធជាមួយអ៊ីរ៉ង់

យន្តហោះចម្បាំងអាមេរិក F-16, F-22 និង F-35 បានចាកចេញពីមូលដ្ឋានទ័ពអាកាស Lakenheath ភាគខាងកើតចក្រភពអង់គ្លេសហើយ ក្នុងដំណើរឆ្ពោះទៅកាន់តំបន់មជ្ឈិមបូព៌ា ដើម្បីជួយអ៊ីស្រាអែល ក្នុងការប្រយុទ្ធជាមួយអ៊ីរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធរឿងនេះ មន្ទីរបញ្ចកោណមិននិយាយអ្វីឡើយ ប៉ុន្តែ Reuters រាយការណ៍កាលពីថ្ងៃចន្ទថា អាមេរិកបានបញ្ជូនយន្តហោះចាក់ប្រេងទ្រង់ទ្រាយធំទៅកាន់មូលដ្ឋានអឺរ៉ុបរួចហើយ ដើម្បីប្រុងជើងការបញ្ជូនទៅតំបន់មជ្ឈិមបូព៌ា ស្របពេលស្ថានការណ៍កំពុងក្តៅគគុក។

តាមពិតទៅ សហរដ្ឋអាមេរិកមានកម្លាំងយោធាដ៏ធំរួចទៅហើយនៅមជ្ឈិមបូព៌ា ពោលគឺមានកងទ័ពជិត ៥០ ០០០នាក់ រួមទាំងប្រព័ន្ធការពារដែនអាកាស យន្តហោះចម្បាំង និងនាវាចម្បាំងដែលអាចស្ទាក់ចាប់ និងបាញ់ទម្លាក់មីស៊ីលរបស់សត្រូវ ផងដែរ។

ព័ត៌មានអំពីការចាកចេញរបស់យន្តហោះចម្បាំងនេះ កើតឡើងបន្ទាប់ពីប្រមុខសេតវិមាន ដូណាល់ ត្រាំ ព្រមានឲ្យគ្រប់គ្នា ត្រូវចាកចេញពីរដ្ឋធានីតេហេរ៉ង់ នៃប្រទេសអ៊ីរ៉ង់ជាបន្ទាន់ ធ្វើឲ្យអ្នកវិភាគមួយចំនួនសន្និដ្ឋានថា សហរដ្ឋអាមេរិក ប្រហែលជាចូលធ្វើអន្តរាគមន៍ជួយអ៊ីស្រាអែល។

លោកត្រាំនិយាយថា «អ៊ីរ៉ង់ គួរតែចុះហត្ថលេខាលើកិច្ចព្រមព្រៀង ដែលខ្ញុំបានប្រាប់ពួកគេ។ ពិតជាគួរឲ្យខ្មាសអៀន និងខ្ជះខ្ជាយអាយុជីវិតមនុស្សណាស់។ និយាយឲ្យសាមញ្ញគឺ អ៊ីរ៉ង់មិនអាចមានអាវុធនុយក្លេអ៊ែរបានទេ។ ខ្ញុំនិយាយម្តងហើយម្តងទៀត! គ្រប់គ្នាត្រូវជម្លៀសចេញពីទីក្រុងតេហេរ៉ង់ជាបន្ទាន់!»។

ក្រោយមកមួយថ្ងៃ ប្រធានាធិបតីអាមេរិក បានតម្រូវឲ្យអ៊ីរ៉ង់ចុះចាញ់ដោយគ្មានលក្ខខណ្ឌ ដោយបង្ហោះសារបង្ហោះលើបណ្តាញសង្គម Truth Socialថា «ត្រូវតែចុះចាញ់ដោយគ្មានលក្ខខណ្ឌ»។ ក្នុងការបង្ហោះជាបន្តបន្ទាប់នោះ ប្រធានាធិបតីអាមេរិកវ័យ៧៩ឆ្នាំរូបនេះក៏លើកឡើងដែរថា «ឥឡូវ យើងគ្រប់គ្រងផ្ទៃមេឃលើប្រទេសអ៊ីរ៉ង់បានទាំងស្រុងហើយ»៕

អត្ថបទ៖ សុខ សុវណ្ណ

ចុចអាន៖ ត្រាំ តម្រូវឲ្យអ៊ីរ៉ង់ «ចុះចាញ់ដោយគ្មានលក្ខខណ្ឌ»