​ក្រោយ​ធ្លាយសារសំឡេង​ ផែថងថាន ប្រឈម​រឿង​​សំខាន់៣ លំបាករើ​ខ្លួនរួច​​​​​

​រឿងរ៉ាវ​ផ្ទៃក្នុង​ក្នុងឈុតឆាក​នយោបាយ​របស់​​ប្រទេសថៃ​​បាន​​ផ្ទុះ​ឡើង​ជាបន្តបន្ទាប់​ ចាប់​ពីរសៀល​ថ្ងៃពុធ​នេះ បន្ទាប់​ពីសារ​សន្ទនា​​​រវាង​​ លោកស្រី ផែថងថាន ស៊ីណាវ៉ាត្រ ​នាយករដ្ឋមន្ត្រីថៃ និង សម្តេច​​តេជោ ហ៊ុន សែន ប្រធាន​ព្រឹទ្ធសភានៃ​ប្រទេសកម្ពុជា អំពី​ការ​បើកច្រក​ព្រំដែន​​រវាង​ប្រទេសទាំងពីរ ដើម្បី​សម្រួល​​ឲ្យ​ទំនិញ​ឆ្លងកាត់​ដូច​ធម្មតាវិញ។​

នាយករដ្ឋមន្ត្រី​ថៃ​ ផែថងថាន ស៊ីណាវ៉ាត្រ​ ​ដែល​កំពុង​​ប្រឈម​​បញ្ហា​ផ្ទៃក្នុង​​ក្នុង​ការ​ដឹកនាំ​រដ្ឋាភិបាលថៃ និង មិនអាច​គ្រប់គ្រង​យោធា​​ឲ្យស្ថិតនៅ​ក្នុងអំណាច​របស់ខ្លួន​ស្រប​តាម​ច្បាប់រដ្ឋ​ធម្មនុញ្ញ​ថៃ​​ បាន​និយាយ​​​​​​លួង​ចិត្ត​ប្រជាជន​ខ្លួន​ឯង​ដើម្បី​កុំខុស​ និង​ចាប់​កំហុស ដែល​លោកស្រី ប្រើប្រាស់ភាសា​ពូ ទៅកាន់​សម្តេច​ហ៊ុនសែន ថា ជា​វិធីសាស្ត្រ​នៃ​ការ​ចរចា​ប៉ុណ្ណោះ។​

នៅ​ក្នុងសន្និ​​សីទ​សារព័ត៌មានខ្លី​​នៅរសៀលថ្ងៃទី​​១៨​ខែ​មិថុនានេះ លោកស្រី​ ផែថងថាន ​ស៊ីណាវ៉ាត្រ ​បាន​និយាយ​ដោយ​​ជំហរ​ទន់​ភ្លន់​ទៅកាន់​​ប្រជាជន​របស់​ខ្លួន​ ដើម្បី​ទប់​​បន្ធូរបន្ថយ​ការ​ក្តៅក្រហាយ ក្រោយ​​ពី​សារ​សន្ទ​​នា​​ជាមួយសម្តេច ហ៊ុន សែន ​បាន​ដាក់​បន្ទុក​​​​ទៅ​លើ​មេបញ្ជាការ​​យោធា​ភូមិភាគ២ ដែលសម្រេច​ចិត្ត​បិទ​​ច្រក​ព្រំដែន​​ ដោយ​មិ​ន​មានការ​ឯកភាព​ពីរដ្ឋាភិបាល​ថៃ​នោះទេ។ ការឆ្លើយ​នេះ បាន​បន្ថែម​ភាព​​ក្តៅ​ក្រហាយ​ ឲ្យ​ផ្ទុះ​កក្រើក​​កាន់តែខ្លាំង​ទៅវិញ​។

​​​ប្រតិកម្ម​​ដំបូង​ទៅ​កាន់​សារ​ឆ្លើយ​របស់​​នាយករដ្ឋមន្ត្រីថៃ មេបញ្ជាការភូមិភាគទី២ លោក Boonsin Padklang ​ដែលគេល្បី​ថា មិនស្តាប់​​​ការសម្រេច​របស់​រដ្ឋាភិបាល​​កណ្តាលឈ្នះឆ្នោតនោះ ​បាន​ទាមទារ​​នៅ​រសៀលថ្ងៃពុធ ឲ្យ​នាយករដ្ឋមន្ត្រី ​ផែថងថាន ស៊ីណាវ៉ាត្រ​ បកស្រាយ​ឡើង​វិញ​នូវ​សារ​ចោទ​ប្រកាន់​របស់​នាយករដ្ឋមន្ត្រី​មក​លើ​រូបលោក។

សារព័ត៌មាន Khaosod បានស្រង់សម្តី លោក Boonsin Padklang ​ដូចដែលនិយាយថា៖«អ្វីដែលគួរឲ្យសោកស្ដាយនោះគឺថា នៅក្នុងវីដេអូឃ្លីបដែលបែកធ្លាយរវាងនាយករដ្ឋមន្ត្រីថៃ ផែថងថាន ស៊ីណាវ៉ាត្រ​ និងអតីតនាយករដ្ឋមន្ត្រីកម្ពុជា និងប្រធានព្រឹទ្ធសភា លោក ហ៊ុន សែន គឺថា មិនត្រឹមតែ ផែថងថាន ហៅលោក ហ៊ុន សែន ថាជា «ពូ» ប៉ុណ្ណោះទេ ប៉ុន្តែបានប្រាប់លោក ហ៊ុន សែន កុំឲ្យស្តាប់ «អ្នកនៅ​ផ្សេង​» រួមទាំងមេបញ្ជាការភូមិភាគទី២ ឧត្តមសេនីយ៍ឯក Boonsin Padklang ផងដែរ។

ក្រោ​យ​​បញ្ចេញសារសន្ទនា​វាង​មេដឹកនាំកំពូល​របស់​ថៃ​និង​កម្ពុជានេះ មេដឹកនាំបក្សប្រឆាំង​ថៃ លោក Nattapong Ruangpanyawut ​នៃ​គណបក្ស​ប្រជាជន​ (People’s Party)​ ជំរុញឱ្យនាយករដ្ឋមន្ត្រីថៃ ផែថងថាន ប្រកាស​រំលាយសភា ដើម្បីទប់ស្កាត់រដ្ឋប្រហារ ដោយនិយាយថា ​ការ​និយាយ​សំដៅ​​យោធាថា «អ្នកប្រឆាំង» មិនសមរម្យសម្រាប់មេដឹកនាំ​នោះទេ​។

​នៅល្ងាច​ថ្ងៃ​​​ពុធ​ទៀតសោត​ គណបក្ស​ Bhumjaithai ដែល​កំពុង​មាន​​​ទំនាស់​ក្នុង​ការ​ជជែក​រឿង​ដោះដូរ​​គណៈរដ្ឋមន្ត្រី ដោយ​គណបក្ស​ភឿថៃ​របស់លោកស្រី ផែថងថាន ទាមទារ​យក​ក្រសួង​មហាផ្ទៃទៅកាន់កាប់ បាន​ប្រកាសដកខ្លួន​ចេញ​ពីរដ្ឋាភិបាល​ចម្រុះដឹកនាំ​ដោយគណបក្ស​ភឿថៃទៀត។ កា​រប្រកាសដកខ្លួន​នេះ ទំនង​ជា​រដ្ឋាភិបាលថៃ​របស់​លោកស្រី ផែថងថាន លែង​ជា​រដ្ឋាភិបាល​ពេញលក្ខណៈស្របច្បាប់​ពេញលេញទៀតហើយ។

សេចក្តី​​របស់​ គណបក្ស​ Bhumjaithai ​ស្តីពីការដកខ្លួន​ចេញ ​ក៏បាន​ដាក់​ការ​ទទួលខុសត្រូវ​ឲ្យ​លោកស្រី ផែថងថាន ស៊ីណាវ៉ាត្រ នាយករដ្ឋមន្ត្រី ចំពោះ​​សារបែកធ្លាយ​​ដែលសន្ទនា​ជាមួយ​​ សម្តេច​ ហ៊ុន សែន​ផងដែរ៕

រ៉ាន់ រើយ​