ព័ត៌មានអន្ដរជាតិ

តុលាការធម្មនុញ្ញថៃ ផ្តើមធ្វើការលើញត្តិព្រឹទ្ធសភាដែលស្នើដក«ផែថងថាន»

បានផុស

១១ ខែ មុន

នៅ

ថ្ងៃចន្ទ ២៣ មិថុនា ២០២៥

ដោយ

តុលាការធម្មនុញ្ញប្រទេសថៃ ត្រូវបានរាយការណ៍ថា នឹងចាប់ផ្តើមត្រួតពិនិត្យបណ្តឹងរបស់គណៈកម្មាធិការព្រឹទ្ធសភា ដែលបានដាក់ពាក្យប្រឆាំងនាយករដ្ឋមន្ត្រីថៃ ផែថងថាន ស៊ីណាវ៉ាត្រ អំពីក្រមសីលធម៌ជុំវិញការបែកធ្លាយសារសន្ទនាជាមួយសម្តេចតេជោ ហ៊ុន សែន អំពីការបើកនិងបិទព្រំច្រកទ្វារព្រំដែននៃប្រទេសទាំងពីរ។

នាយករដ្ឋមន្ត្រីថៃ ផែថងថាន ស៊ីណាវ៉ាត្រ បានចុះទៅជួបសុំទោសយោធាថៃ ក្រោយបែកធ្លាយការសន្ទនា។ FB

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មានបាងកកប៉ុស្តិ៍របស់ថៃ បានដកស្រង់ប្រភពស្និទ្ធនឹងតុលាការធម្មនុញ្ញ បានអះអាងថា តុលាការធម្មនុញ្ញត្រូវបានរំពឹងចាប់ផ្តើមការត្រួតពិនិត្យបឋមនៃបណ្តឹងប្តឹងដោយក្រុមសមាជិកព្រឹទ្ធសភា ដើម្បីដក លោកស្រី ផែថងថាន ស៊ីណាវ៉ាត្រ ពីនាយករដ្ឋមន្ត្រី។

គណៈកម្មាធិការព្រឹទ្ធសភាដែលគេស្គាល់ថា កើតចេញពីសមាជិកក្រុមយោធាវ័យចំណាស់ភាគច្រើន បានដាក់ពាក្យបណ្តឹងទៅកាន់លេខាធិការដ្ឋានតុលាការធម្មនុញ្ញកាលពីសប្តាហ៍មុន ហើយ តុលាការនឹងត្រូវត្រួតពិនិត្យបឋមដើម្បីដឹងថា វាគ្រប់លក្ខខណ្ឌសម្រាប់ការពិចារណាដោយតុលាការធម្មនុញ្ញឬទេ។

តាមការផ្សាយរបស់បាងកកប៉ុស្តិ៍ ដំណើរការត្រួតពិនិត្យនោះនឹងរួមបញ្ជូល ការផ្ទៀងផ្ទាត់ភាពត្រឹមត្រូវនៃហត្ថលេខារបស់អ្នកផ្តិតមេដៃលើពាក្យបណ្តឹង ហើយមន្ត្រីតុលាការនឹងពិនិត្យ ថាតើ មានហេតុផលដែលបានលើកឡើងដើម្បីជំរុញឱ្យមានការដកតំណែងនាយករដ្ឋមន្ត្រីស្របតាមបទប្បញ្ញត្តិនៃរដ្ឋធម្មនុញ្ញដែរឬទេ ។ ប្រសិនបើដំណើរការត្រួតពិនិត្យបឋម អាចបញ្ចប់ត្រឹមថ្ងៃអង្គារ ញត្តិអាចត្រូវបានពិភាក្សាភ្លាមៗនៅថ្ងៃព្រហស្បតិ៍។

ទោះបីជាបែបណា ដំណើរការចងក្រងឯកសារពាក្យបណ្តឹងនេះឲ្យមានរបៀបរៀបរយពេញលក្ខណៈ នៅត្រូវការពេលវេលានមួយចំនួនទៀត ដោយត្រូវបញ្ជូនបន្តទៅអនុគណៈកម្មការពិនិត្យ ដែលមានចៅក្រមយ៉ាងតិចបីនាក់នៃតុលាការធម្មនុញ្ញដែលនឹងវាយតម្លៃថាតើ ពាក្យបណ្តឹងនោះត្រូវនឹងលក្ខណៈវិនិច្ឆ័យតាមផ្លូវច្បាប់សម្រាប់ពិចារណាឬអត់។

នាយករដ្នមន្ត្រីថៃ លោកស្រី ផែថងថាន ប្រឈមសម្ពាធដ៏ខ្លាំងទាមទារឲ្យចុះចេញពីអំណាចក្នុងរយៈពេល១សប្តាហ៍ចុងក្រោយនេះ ទាំងពីក្នុងគណបក្សក្នុងរដ្ឋាភិបាលចម្រុះ បណ្តាញក្រុមអ្នកតវ៉ា ក៏ដូចជា ស្ថាប័នជាច្រើនទៀត ខណៈពេលដែលលោកស្រី ត្រៀមសម្រាប់ការដោះដូរគណៈរដ្ឋមន្ត្រីផងដែរ៕

រ៉ាន់ រើយ