ព័ត៌មានជាតិ

តម្លៃទុរេនខេត្តកំពត ៣ ប្រភេទលក់តម្លៃខុសគ្នាជិត ១ ម៉ឺនរៀល

បានផុស

២ ខែ មុន

នៅ

ថ្ងៃចន្ទ ៧ មិថុនា ២០២១

ដោយ

ខេត្តកំពតជាស្តេចទុរេន ដោយសារភាពអំណោយផលភូមិសាស្ត្រលើដំណាំសក្ដានុពលនេះ។ ដំណាំយុទ្ធសាស្រ្តមានការដាំដុះនៅស្រុកចំនួនពីរ និងក្រុងកំពត សរុបផ្ទៃដីជាង១ ពាន់ហិតា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកចាន់ រិទ្ធិ ប្រធានមន្ទីរកសិកម្មខេត្តកំពតបានប្រាប់កម្ពុជាថ្មីថា ទុរេននៅខេត្តកំពតលក់ចេញ មិនពិបាករកទីផ្សារនោះទេ គឺមានម៉ូយចាំទទួលទិញទាំងនៅបណ្ដាខេត្ត និងរាជធានី ទោះបីក្នុងសម័យជំងឺកូវីដ19 កំពុងរីករាលដាលនេះក៏ដោយ។

លោកបានបង្ហើបតម្លៃជាមធ្យមទុរេនកំពត ៣ ប្រភេទដែលលក់ចេញមាន ១. មួនថង តម្លៃ ២៨ ០០០រៀលមួយគីឡូ ២. ឱខាក់តម្លៃ ២៥ ០០០ រៀលក្នុងមួយគីឡូ និងសន្តង់កិតតម្លៃ ២១ ០០០ រៀលក្នុងមួយគីឡូ។

លោកប្រធានមន្ទីរបានបន្តថា នៅខេត្តកំពតមានផ្ទៃដីដាំដុះទុរេនចំនួន ១ ០៦០ហិតា ក្នុងនោះផ្ទៃដីប្រមូលផលមានចំនួន ៨៩៨ ហិតា ដែលក្នុងមួយឆ្នាំទទួលបរិមាណផលសរុប ១០ ៣២៧តោន។ ស្រុកដែលដាំដុះទុរេនច្រើនមានស្រុកទឹកឈូចំនួន ៩៤៤ ហិតា ស្រុកឈូកចំនួន ៦៦ ហិតា និងក្រុងកំពត ៥០ ហិតា។

បើតាមលោកប្រធានមន្ទីរ ទិន្នផលទុរេនកំពតនៅឆ្នាំនេះ កើនជាងឆ្នាំមុនប្រមាណ ២៥ ភាគរយ ដោយសារអាកាសធាតុអំណោយផល។

ខេត្តកំពតត្រូវបានគេចាត់ទុកជាស្តេចទុរេន ដែលមានការដាំដុះទុរេនច្រើនជំនាន់មកហើយ។ យ៉ាងណាដំណាំហូបផ្លែជាស្តេចផ្លែឈើនេះ ត្រូវបានពលរដ្ឋកម្ពុជាបានពង្រីកការដាំដុះតាមខេត្តមួយចំនួនទៀត ដែលមានភូមិសាស្ត្រអំណោយផលដូចជា កំពង់ចាម ត្បូងឃ្មុំ បាត់ដំបង ពោធិ៍សាត់ កោះកុងជាដើម។ ដោយឡែកនៅស្រុកបន្ទាយស្រីនៃខេត្តសៀមរាប និងខេត្តព្រះវិហារក៏មានការសាកល្បងដាំដុះ ទទួលបានផលយ៉ាងគាប់ប្រសើរផងដែរ។

បច្ចុប្បន្ននេះ កម្ពុជាមានផ្ទៃដីដាំដុះដំណាំទុរេនចំនួន ៥២៨៩ ហិតា ក្នុងនោះផ្ទៃដីប្រមូលផលមានចំនួន ៣ ៤០៣ ហិតា ដែលទទួលបានបរិមាណផលប្រមាណ ៣៦,៦៥៦ តោនក្នុង១ឆ្នាំ។

លោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទបានឱ្យដឹងថា ការដាំទុរេនលើផ្ទៃដី១ហិកតា កសិករអាចទទួលបានប្រាក់ចំណូលប្រមាណ ១ ទៅ ២ ម៉ឺនដុល្លារ បើមានការដាំដុះតាមបទដ្ឋានបច្ចេកទេសត្រឹមត្រូវ។

លោករដ្ឋមន្ត្រីបានបន្តថា ប្រសិនបើកសិករដាំជាលក្ខណៈទ្រង់ទ្រាយធំឬច្រើនគ្រួសារ ដោយមានការចងក្រងជាសហគមន៍ ដំណាំទុរេននឹងអាចជួយរកចំណូលបានច្រើនដល់សេដ្ឋកិច្ចជាតិទៀតផង។

យ៉ាងណាក៏ដោយ លោករដ្ឋមន្ត្រីបញ្ជាក់ថា ទោះបីដំណាំនេះទទួលបានប្រាក់ចំណូលខ្ពស់ ប៉ុន្តែតម្រូវឱ្យមានការវិនិយោគច្រើន និងទាមទារការអនុវត្តបច្ចេកទេសត្រឹមត្រូវ ទើបទទួលបានជោគជ័យ៕

អត្ថបទ៖ ប៊ុណ្ណារ៉ា