បង្ក្រាបទីតាំងលួចដាំកញ្ឆា ខុសច្បាប់១កន្លែង នៅខេត្តឧត្តរមាន ជ័​យ និងឃាត់ខ្លួនជនសង្ស័យ​៣នាក់

កម្លាំងសមត្ថកិច្ចខេត្តឧត្តរមានជ័យ បានចុះបង្ក្រាបទីតាំងចំការស្វាយ១កន្លែង លួចបង្កប់ដាំដំណាំកញ្ឆាខុសច្បាប់ ដោយក្នុងនោះសមត្ថកិច្ច បានឃាត់ខ្លួនជនសង្ស័យ៣នាក់។

លោកឧត្តមសេនីយ៍ទោ ហួត សុធី ស្នងការនគរបាលខេត្តឧត្តរមានជ័យ បានឲ្យដឹងនៅរសៀលថ្ងៃទី៥ ខែកក្កដានេះ​ថា កាលទី៤ ខែកក្កដាម្សិលមិញ ដោយមានការសម្របសម្រួលនីតិវិធី ដឹកនាំបញ្ជាផ្ទាល់ពីលោក តូច សុភក្តី ព្រះរាជអាជ្ញា នៃអយ្យការអមសាលាដំបូងខេត្តឧត្តរមានជ័យ លោកបានដឹកនាំកម្លាំងកងអន្តរាគមន៍ពិសេសរបស់ស្នងការដ្ឋាន សហការជាមួយកម្លាំងអធិការដ្ឋានស្រុកអន្លង់វែង បានចុះបង្ក្រាបទីតាំងចំការស្វាយ១កន្លែង នៅចំណុចពាង២ ស្ថិតក្នុងភូមិអូរតាមែង ឃុំអន្លង់វែង ស្រុកអន្លង់វែង ដែលបានធ្វើសកម្មភាពលួចបង្កប់ ដាំដំណាំកញ្ឆាខុសច្បាប់ មានទំហំ៥,៥០០ ម៉ែត្រការ៉េ។

ស្នងការនគរបាលខេត្តឧត្តរមានជ័យ បានឲ្យដឹងទៀតថា ក្នុងកិច្ចប្រតិបត្តិការនេះ កងកម្លាំងសមត្ថកិច្ចបានឃាត់ខ្លួនជនសង្ស័យចំនួន៣ ព្រមទាំងបានដកហូតបាននូវកញ្ឆាក្រៀម ចំនួន៣៦គីឡូក្រាម, កញ្ឆាស្រស់ចំនួន១២៥០០ដើម, រថយន្ត១គ្រឿង, គោយន្តកន្ត្រៃ១ គ្រឿង, និងសម្ភារមួយចំនួនទៀត។

បើតាមលោកឧត្តមសេនីយ៍ទោ ហួត សុធី បច្ចុប្បន្នជនសង្ស័យ និងវត្ថុតាងខាង បាននឹងកំពុងរៀបចំក៏សាងសំណុំរឿងបញ្ជូន ទៅតុលាការចាត់ការបន្តតាមនីតិវីធី៕ (ដោយ)៖ ឃួន សុភ័ក្រ