កម្ពុជា មានមជ្ឈមណ្ឌលព្យាបាល និងស្តារនីតិសម្បទាអ្នកញៀនគ្រឿងញៀន ៤៧២ កន្លែង

អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនបានអះអាងថា រហូតមកដល់ពេលនេះ កម្ពុជាមានមជ្ឈមណ្ឌល និងកន្លែងផ្តល់សេវាព្យាបាល និងស្តារនីតិសម្បទាដល់អ្នកញៀនគ្រឿងញៀនប្រមាណ៤៧២កន្លែងនៅទូទាំងប្រទេស។ លោកអះអាងបែបនេះ នៅក្នុងកិច្ចប្រជុំគណៈកម្មាធិការទទួលបន្ទុកការ​ងារព្យាបាល និងស្តារនីតិសម្បទាអ្នកញៀនគ្រឿងញៀនកាលពីរសៀលថ្ងៃទី៣១ ខែមករា ឆ្នាំ ២០២២តាមប្រព័ន្ធអនឡាញ។

លោកនាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន បានបន្តថា មជ្ឈមណ្ឌល និងកន្លែងផ្តល់សេវាព្យាបាល និងស្តារនីតិសម្បទាដល់អ្នកញៀនគ្រឿងញៀនទាំង៤៧២កន្លែងនេះ រួមមាន មជ្ឈមណ្ឌលបណ្តោះអាសន្នរដ្ឋ ឯកជន និងអង្គការចំនួន១៨កន្លែង និងទីកន្លែងផ្តល់សេវាតាមមូលដ្ឋានសុខាភិបាលមន្ទីរពេទ្យជាតិ មន្ទីរពេទ្យបង្អែករាជធានី-ខេត្ត ក្រុង -ស្រុក និងមណ្ឌលសុខភាពបា នចំនួន៤៥៤កន្លែង និងមានក្រុមគ្រូពេទ្យដែលបម្រើការងារនេះចំនួន៨៨៣នាក់។

ចំណែក លោកសាស្ត្រាចារ្យ  ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មាធិការទទួលបន្ទុកការងាររព្យាបាល និងស្តារនីតិសម្បទាអ្នកញៀនគ្រឿងញៀន បានណែនាំដល់មន្ត្រីជំនាញពាក់ព័ន្ធទាំងអស់បន្តពង្រឹងនូវកិច្ចសហការតាមជំនាញរបស់ខ្លួន ដើម្បីការផ្តល់សេវាព្យាបាលស្តារនីតិសម្បទាប្រកបដោយគុណភាព និងប្រសិទ្ធភាព ដល់អ្នកញៀនគ្រឿងញៀននៅកម្ពុជា។ ជាមួយគ្នានេះ លោករដ្ឋមន្ត្រី ក៏បានអនុញ្ញាតឱ្យមន្រ្តីដែលទទួលបន្ទុកការងារព្យាបាលស្តារនីតិសម្បទា ធ្វើបទបង្ហាញជូនអង្គប្រជុំពិនិត្យពិភាក្សា ក្នុងនោះ មានការផ្តល់សេវាព្យាបាលនៅតាមមូលដ្ឋានសុខាភិបាល និងការផ្តល់សេវាព្យាបាលស្តារនីតិសម្បទានៅតាមមជ្ឈមណ្ឌលជាតិ នៅខេត្តព្រះសីហនុ និងមជ្ឈមណ្ឌល

បណ្តោះអាសន្នរដ្ឋ ឯកជន និងអង្គការផងដែរ៕

អត្ថបទ ៖ សំអឿន