អាជ្ញាធរខេត្តស្ទឹងត្រែង ជំរុញមន្ត្រីបរិស្ថានពង្រឹងកិច្ចការពារ ធនធានជីវចម្រុះតំបន់រ៉ាមសារនៃដងទន្លេមេគង្គលើ

អាជ្ញាធរខេត្តស្ទឹងត្រែង ឲ្យមន្ត្រីផ្នែកបរិស្ថានពង្រឹងកិច្ចសហប្រតិបត្តិការជាមួយសមត្ថកិច្ចពាក់ព័ន្ធការពារធនធានធម្មជាតិ ដើម្បីអភិរក្សពពួកសត្វស្លាប នៅតំបន់រ៉ាមសារ នៃទន្លេមេគង្គលើ ឱ្យប្រសិទ្ធភាព ព្រោះធនធានទាំងនេះ ភ្ញៀវទេសចរកំពុងពេញនិយមមកទស្សានា។       

លោក ដួង ពៅ អភិបាលរងខេត្តមានប្រសាសន៍ថា ធនធានជីវចម្រុះនៅតាមតំបន់រ៉ាមសារទន្លេមេគង្គលើ មានសម្បូរបែប ដូចជាធនធានមច្ឆជាតិ -សត្វស្លាប -ព្រៃឈើលិចទឹក- និងសម្បត្តិធម្មជាតិផ្សេងៗជាច្រើនរយប្រភេទទៀត ជារបស់យើងទាំងអស់គ្នាត្រូវទទួលខុសត្រូវនិងថែរក្សា។   

លោកបន្តថា កិច្ចការពារធនធានទាំងនេះ ទាមទារចាំបាច់ឱ្យមានកិច្ចសហប្រតិបត្តិការប្រកបដោយប្រសិទ្ធភាព ទាំងផ្នែកមន្ត្រីបរិស្ថាន មន្ត្រីជំនាញពាក់ព័ន្ធ អាជ្ញាធរមូលដ្ឋាន ប្រជាសហគមន៍ និងប្រជាពលរដ្ឋផង ព្រោះចាប់ពីថ្ងៃទី០១ ខែឧសភានេះតទៅ ជារដូវបិទនេសាទហើយ ។       

លោក ឈន ឆន  អនុប្រធានការរិយាល័យគ្រប់គ្រងធនធានធម្មជាតិតំបន់រ៉ាមសារនៃមន្ទីរបរិស្ថានខេត្តស្ទឹងត្រែង បានអះអាងថា នៅតំបន់ការពារតាមដងទន្លេមេគង្គលើនេះ កន្លងមកមានជនខិលខូចមួយចំនួន បានលួចលាក់ប្រព្រឹត្តបទល្មើស ធ្វើឲ្យប៉ះពាល់ដល់ធនធានជីវចំរុះ ដូចជាលួចដាក់មងយកត្រីមេពូជនៅតាមអន្លុងអភិរក្ស លួចប្រើប្រាស់អាវុធកែច្នៃបរបាញ់សត្វ ដាក់អន្ទាក់ និងប្រើប្រាស់ថ្មាំបំពុលសត្វស្លាប និងត្រីជាដើម។     

លោកបន្តថា បញ្ហាប្រឈមនេះ បច្ចុប្បន្នកាត់បន្ថយបានច្រើន ព្រោះបងប្អូនប្រជាពលរដ្ឋយើងគាត់ភ្ញាក់រឮក ងាកមកជួយថែរក្សាវិញ ដោយសារពួកគាត់បានប្រកបរបដាំបន្លែបង្កាលក់ និងបានចូលជាសមាជិកសហគមន៍អេកូទេសចរណ៍រៀបចំប្រកបសេវាកម្មដឹកជញ្ជូនភ្ញៀវទេសចរធ្វើដំណើរទស្សនាទៅតាមតំបន់អភិរក្សទាំងនេះ។   

លោក គង់ ចាន់ធី ប្រធានសហគមន៍អេកូទេសចរណ៍បុរីអូរស្វាយសែនជ័យបានបញ្ជាក់ថា នេះជាចំណុចមួយដែលប្រជាសហគមន៍ចង់បានហើយបច្ចុប្បន្ននេះសេវាកម្មដឹកជញ្ជូនភ្ញៀវធ្វើដំណើរទស្សនាសត្វស្លាប់ កំពុងមានសកម្មភាពឡើងវិញ បន្ទាប់ពីសម្តេចតេជោ បានបើកដំណើរការលើវិស័យទេសចរណ៍។     

លោកបន្តថា៖ធនធានជីវចំរុះនេះប្រជាសហគមន៍ក៍ដូចជាប្រជាពលរដ្ឋបានស្រុះស្រួលគ្នាកំពុងនាំគ្នាការពារ ព្រោះមានប្រយោជន៍ទាញយកប្រាក់ចំណូល ដោយប្រយោល ពីវិស័យទេសចរណ៍ ហើយប្រាក់ចំណួលនេះទទួលបានមិនចេះរីងស្ងួតឡើយ ។        

សូមបញ្ជាក់ថា តំបន់រ៉ាមសារមានផ្ទៃទំហ៊ំ ជាង១ម៉ឺន៤ពាន់ហិកតា និងមានប្រភេទថនិកសត្វ២១ប្រភេទ(សត្វដែលមានដោះបំបៅកូន) ថលជលិក០៦ប្រភេទ (ភេ ក្រពើ អន្សង កន្ត្រង អណ្តើក កង្កែប ជាដើម ) ឧរង្គសត្វ០៣ប្រភេទ(ពស់ អន្ទង់-ពស់នាគ )- សត្វស្លាប់៩៧ប្រភេទ-  និងត្រី១៣០ប្រភេទកំពុងរស់នៅក្នុងទឹកតាមដងទន្លេមេគង្គលើក្នុងតំបន់រ៉ាមសារនេះ៕

អត្ថបទ៖ ងិនលីម