តម្លៃមាសអន្តរជាតិ បន្តបំបែកកំណត់ត្រាខ្ពស់ថ្មី ក្នុងបរិបទសង្រ្គាមពាណិជ្ជកម្ម

តម្លៃមាសអន្តរជាតិ បាន​ហក់ឡើង​បំបែក​កំណត់ត្រាខ្ពស់បំផុតជាថ្មី​សម្រាប់​ការជួញដូរ​នៅថ្ងៃចន្ទ​នេះ ​ដែល​ជំរុញ​ដោយ​ក្ដីបារម្ភអំពីកំណើន​សេដ្ឋកិច្ចសកលក្នុងបរិបទ​នៃ​សង្រ្គាម​ពាណិជ្ជកម្ម និងការធ្លាក់ចុះ​នៃ​តម្លៃប្រាក់ដុល្លារ។ នេះបើតា​មការចុះ​ផ្សាយរបស់​ទីភ្នាក់ងារសារព័ត៌មាន​រ៉យទ័រ។

តម្លៃមាសជួញដោយផ្ទាល់ ​បានឡើងថ្លៃ ២,២៥ ភាគរយ ដល់ ៣ ៣៨៩,៨៣ ដុល្លារ/អោន ​នារសៀលថ្ងៃចន្ទ (ម៉ោងនៅអាស៊ី)​ នេះ។ តម្លៃមាស​ហក់ឡើង ខណៈសន្ទស្សន៍ប្រាក់ដុល្លារ បានធ្លាក់ដល់កម្រិតទាបក្នុងរយៈពេល ៣ ឆ្នាំ​។

អ្នកយុទ្ធសាស្រ្តទីផ្សាររបស់​ក្រុមហ៊ុនសេវាកម្មហិរញ្ញវត្ថុ IG លោក Yeap Jun Rong បាននិយាយប្រាប់រ៉យទ័រ​ថា៖ «ជា​ទូទៅ តម្លៃទីផ្សារប្រែប្រួល​ទៅ​តាមកំណើន​នៃ​​ហានិភ័យភូមិសាស្ត្រនយោបាយ​ ដែល​ជំរុញដោយភាពតានតឹងផ្នែកពន្ធគយរបស់សហរដ្ឋអាមេរិក និងការព្រួយបារម្ភអំពីការជាប់គាំងនៃសេដ្ឋកិច្ច ខណៈ​ភាពរឹង​មាំនៃតម្រូវការរបស់ធនាគារកណ្តាល​ ​ក៏ជួញជំរុញតម្លៃផងដែរ»។

អ្នកជំនាញដដែល​លើកឡើងថា តម្រូវការមាសបច្ចុប្បន្ន​ គឺមាន​ការទិញ​ច្រើន​ជ្រុល ហើយថា តម្លៃអាច​នឹង​បន្តហក់ឡើងដល់ ៣ ៥០០ ដុល្លារ/អោន៕