លោក ណេតាន់យ៉ាហ៊ូ បញ្ជាឲ្យ​បង្កើនសម្ពាធយោធា ក្រោយ​ហាម៉ាស​បដិសេធ​សំណើ​បទ​ឈប់បាញ់

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានចេញ​បញ្ជា​​ឲ្យ​យោធា​​​បង្កើនប្រតិបត្តិការប្រឆាំងនឹង​ហាម៉ាស បន្ទាប់ពីក្រុម​សកម្ម​ប្រយុទ្ធ​នេះបដិសេធសំណើបទឈប់បាញ់ចុងក្រោយរបស់អ៊ីស្រាអែល។

យោង​តាម​ការ​ចុះ​ផ្សាយ​របស់​ទីភ្នាក់ងារព័ត៌មាន​ Reuters កាល​ពី​ថ្ងៃ​ទី​២០​ខែ​មេសា លោក ណេតាន់យ៉ាហ៊ូ បានអះអាងថា អ៊ីស្រាអែលត្រូវតែបន្តយុទ្ធនាការរបស់ខ្លួន «រហូតទទួល​ជ័យជម្នះ» ដោយសង្កត់ធ្ងន់លើភាពចាំបាច់នៃការរុះរើក្រុមហាម៉ាស ធានាការដោះលែងចំណាប់ខ្មាំង និងការលុបបំបាត់ការគំរាមកំហែងពីតំបន់ហ្គាហ្សា។

ការវាយលុកជាថ្មី​​របស់​អ៊ីស្រាអែល បាននាំ​ឲ្យ​មានការស្លាប់ និងរបួស​ធ្ងន់ធ្ងរ ដោយជនជាតិប៉ាឡេស្ទីនជាង ៩០​នាក់ត្រូវបានសម្លាប់ក្នុងរយៈពេល ៤៨​ម៉ោងចុងក្រោយនេះ ក្នុង​នោះ​មាន​ទាំង​​ស្ត្រី និងកុមារដែលកំពុងស្នាក់នៅក្នុងតំបន់មនុស្សធម៌។ ចាប់តាំងពីការដួលរលំនៃបទឈប់បាញ់ពីមុនមក ការវាយប្រហារតាមអាកាសរបស់អ៊ីស្រាអែលបានបណ្តាល​ឲ្យ​មនុស្សជាង ១ ៦០០​នាក់បានស្លាប់នៅក្នុងតំបន់ហ្គាហ្សាក្នុងរយៈពេល​ជាង​មួយខែកន្លងមកនេះ។

ជា​វិធានការ​ដាក់​សម្ពាធលើក្រុមហាម៉ាស អ៊ីស្រាអែលបានបង្កើតច្រករបៀង Morag ដែលជាតំបន់សន្តិសុខនៅភាគខាងត្បូងហ្គាហ្សា ដែលបែងចែកទឹកដី និងរឹតបន្តឹង​​ការ​ផ្លាស់ទីលំនៅ។ ច្រករបៀងនេះដែលត្រូវបានប្រកាសដោយ​លោក ណេតាន់យ៉ាហ៊ូ កាលពីថ្ងៃទី​២​ខែមេសា និងចាប់​អនុវត្ត​ពេញលេញ​ចាប់​ពី​ថ្ងៃ​ទី​១២​ខែមេសា មានបំណងកាត់ផ្តាច់​ទីក្រុង Rafah ចេញពីតំបន់​ហ្គាហ្សា និង​បង្កើនសម្ពាធលើក្រុម​ហាម៉ាស​ឲ្យ​ដោះលែងចំណាប់ខ្មាំង និងបោះបង់ការគ្រប់គ្រង​របស់​ខ្លួន។

រដ្ឋមន្ត្រីការពារជាតិ លោក Israel Katz បានប្រកាស​គាំទ្រ​ជំហរ​របស់លោក ណេតាន់យ៉ាហ៊ូ ដោយបញ្ជាក់ថា កងទ័ពអ៊ីស្រាអែលនឹងរក្សាវត្តមានរបស់ពួកគេនៅក្នុងតំបន់ហ្គាហ្សា លីបង់ និងស៊ីរីដោយគ្មានដែន​កំណត់។ ការចូលរួមផ្នែកយោធាដ៏អូសបន្លាយនេះ បានធ្វើ​ឲ្យ​មានការព្រួយបារម្ភក្នុងចំណោមប្រទេសជិតខាង និងអ្នកសង្កេតការណ៍អន្តរជាតិ ដែលចាត់ទុកវាថាជាការបំពានច្បាប់អន្តរជាតិ។

មុន​ការ​លើក​ឡើង​របស់​​នាយករដ្ឋមន្ត្រី​​អ៊ីស្រាអែល ក្រុម​សកម្ម​ប្រយុទ្ធ​ហាម៉ាស បានប្រកាសពីការត្រៀមខ្លួន​ក្នុងការដោះលែងចំណាប់ខ្មាំងអ៊ីស្រាអែលទាំងអស់ដែលនៅសេសសល់ ប្រសិនបើអ៊ីស្រាអែលយល់ព្រមលើបទឈប់បាញ់​ពេញ​លេញ ដកកងកម្លាំងរបស់ខ្លួនចេញពី​​​ហ្គាហ្សា និងចាប់ផ្តើម​ការ​កសាងឡើងវិញនៅក្នុង​តំបន់​ដែលហែកហួរដោយ​ភ្លើង​សង្រ្គាម។

មេដឹកនាំក្រុមហាម៉ាស លោក Khalil Al-Hayya បានសង្កត់ធ្ងន់លើគោលជំហររបស់ក្រុម​សកម្ម​ប្រយុទ្ធ​ប៉ាឡេស្ទីន ដោយបានច្រានចោលសំណើរបស់អ៊ីស្រាអែល សម្រាប់បទឈប់បាញ់​បណ្ដោះ​អាសន្ន​រយៈពេល៤៥​ថ្ងៃ និងបានចោទប្រកាន់លោក ណេតាន់យ៉ាហ៊ូ ថាបានប្រើប្រាស់កិច្ចព្រមព្រៀង​ដែល​មាន​លក្ខណៈ​មិន​ពេញ​លេញ ដើម្បីអូសបន្លាយជម្លោះ។ លោក Al-Hayya បាននិយាយថា ក្រុមហាម៉ាសទទូចលើកិច្ចព្រមព្រៀងពេញលេញ ដោយបដិសេធមិនព្រម​ទម្លាក់​អាវុធ ដែលជាលក្ខខណ្ឌទាមទារដោយ​ភាគី​អ៊ីស្រាអែល។

សូម​បញ្ជាក់​ថា ជម្លោះដែលបានចាប់ផ្តើមនៅថ្ងៃទី​៧​ខែតុលា​ឆ្នាំ​២០២៣ បន្ទាប់ពីការវាយប្រហាររបស់​ក្រុម​ហាម៉ាស បានបណ្តាល​ឲ្យ​មនុស្ស ១ ២០០​នាក់ស្លាប់​នៅ​អ៊ីស្រាអែល និង​មាន​ការចាប់ខ្លួនចំណាប់ខ្មាំង ២៥១​នាក់។ ការណ៍​នេះ​បាន​បង្ក​ឲ្យ​​ផ្ទុះ​សង្គ្រាម​ឡើង​នៅ​ក្នុង​តំបន់​ហ្គាហ្សា និង​បណ្ដាល​ឲ្យ​មានវិបត្តិមនុស្សធម៌ធ្ងន់ធ្ងរនៅ​ទីនោះ។ យោងតាមអាជ្ញាធរសុខាភិបាលក្នុងតំបន់​ហ្គាហ្សា ជនជាតិប៉ាឡេស្ទីនជាង ៥១ ០០០នាក់ត្រូវបានសម្លាប់នៅក្នុងការវាយលុករបស់អ៊ីស្រាអែល៕

ដោយ៖ ឈាង

ចុចអាន៖ ក្រុមហាម៉ាស ប្រកាស​​ត្រៀម​ដោះលែងចំណាប់ខ្មាំងទាំងអស់ ជាថ្នូរនឹងការបញ្ចប់សង្រ្គាម