ប្រជា​ពលរដ្ឋ​ភូមិតាំងបំពង់​បន្តរបរ​ប្រពៃណី​ធ្វើកញ្ច្រែង ​ចង្អេរ​ពីឫស្សី និង​រពាក់​ដើម្បីលក់

ប្រជាពលរដ្ឋរស់នៅភូមិតាំងបំពង់ ​ឃុំជើងគ្រាវ ​ស្រុករលាប្អៀរ​ ខេត្តកំពង់ឆ្នាំង​ប្រមាណ ២០០ គ្រួ​សារបានបន្តចាប់របរប្រពៃណីដូនតាធ្វើចង្អេរ កញ្ច្រែង ទៅតាមជំនាញនៅតាមផ្ទះ​លក់ដើម្បីផ្គត់​ផ្គង់ជីវភាពរស់នៅ។

​លោក ហ៊ិន វុទ្ធី អាយុ ៣៧ ឆ្នាំ ​ជាអ្នកធ្វើកញ្ច្រែង ​ចង្អេរ​ម្នាក់ និងជាអ្នកប្រមូលទិញ​របស់ប្រើប្រាស់​អំពីឬស្សី រពាក់ និងវល្លិថ្នឹងដឹកលក់តាមរ៉ឺម៉កតាមបណ្ដាខេត្តនានាបាននិយាយឲ្យដឹងថា ក្រៅពីធ្វើស្រែចម្ការ លោកបានចាប់ប្រកបមុខរបរខាងលើនេះរយៈពេលជាង ២ ឆ្នាំហើយ​។

ដោយពេលនៅផ្ទះលោកជួយធ្វើកញ្ច្រែងចង្អេរប្រពន្ធនៅពេលយប់ ដោយសារពេល​ថ្ងៃប្រពន្ធលោកជាប់ធ្វើការងាររោងចក្រ។ ហើយក្រៅពីជួយធ្វើកញ្ច្រែងចង្អេរប្រពន្ធ លោកបាន​ដើរ​ប្រមូលទិញផលិតផល ​ផលិតអំពីឬស្សី ​រពាក់ ​និងវល្លិថ្នឹង របស់អ្នកស្រុកតាមភូមិ ដែលនិយមផលិតរបស់ប្រើប្រាស់ផ្សេងៗគ្នាទៅតាមជំនាញដែលជាប្រពៃណីនេះពីដូនតា មានដូចជាកញ្ជើ ល្អី ចង្អេរ កញ្ច្រែង កន្ត្រងប្រហុក កន្ត្រក ជើងឆ្នាំង និងមួក។

​ក្រោយពីទិញរបស់របរ​ខាងលើនេះ​បានពេញរ៉ឺម៉កម៉ូតូ​ហើយនោះដែលមានដើមទុនប្រមាណជាង៣​ លានរៀលលោកក៏បានចេញដឹក​លក់តាមបណ្ដាខេត្តនានាក្នុងប្រទេស​ដោយត្រូវចំណាយ​ពេល​លក់ដូរ និងទៅមកចន្លោះពី ១៥ ទៅ ២០ ថ្ងៃទើបលក់អស់ត្រឡប់មកផ្ទះវិញដោយអាចចំណេញបានប្រាក់ក្នុងមួយជើងៗប្រមាណ ១លានរៀល ដើម្បីផ្គត់ផ្គង់ជីវភាព ប៉ុន្តែក្នុងពេលមានវិបត្តិ ជំងឺកូវីដ ជិត ២ ឆ្នាំកន្លងមកនេះលោកមិនបានដើរលក់នោះទេ។

លោក ហ៊ិនវុទ្ធី បានបញ្ជាក់ថា៖ លោកក៏ដូចជាប្រជាពលរដ្ឋនៅក្នុងភូមិពិតជាសូមថ្លែងអំណរគុណយ៉ាងជ្រាល ជ្រៅដល់សម្ដេចតេជោ ហ៊ុន សែន ប្រមុខរាជរដ្ឋាភិបាលដែលបានខ្នះខ្នែងជួយទិញវ៉ាក់សាំង កូវីដ១៩ ចាក់ជូនប្រជាពលរដ្ឋ ៤,៥ដូសក្នុងម្នាក់ៗ ដោយឥតគិតថ្លៃ ទើបប្រទេសជាតិយើងទប់ស្កាត់ ការចម្លងជំងឺកូវីដ១៩ បានដោយជោគជ័យ ហើយទើបសម្ដេចប្រកាសបើកប្រទេសឡើងវិញនឹងទើបប្រជាពលរដ្ឋទាំងអស់អាចដំណើការប្រកបមុខរបបចិញ្ចឹមជីវិតបានឡើងវិញផងដែរ។

​ដោយឡែក ​ស្ត្រីឈ្មោះ អឹម យឿនអ្នកប្រកបមុខរបរធ្វើកញ្ច្រែង​ចង្អេរនៅក្នុងភូមិតាំងបំពង់​ក៏បានឱ្យ​ដឹងដែរថា មុខរបរខាងលើនេះមិនអាចធ្វើមានធ្វើបាននោះឡើយ។ ប៉ុន្តែអាចដោះ​ទាល់​បាន​ម្ដងម្កាល ដោយអាចយកលុយកាក់ ៥០ ឬ ៦០ម៉ឺន ពីអ្នកទិញដុំមកប្រើប្រាស់បានតាមតម្រូវការ និងទើបធ្វើកញ្ច្រែងចង្អេរ កាត់សងបណ្ដោះឲ្យគេវិញតាមក្រោយ។

ចំពោះការធ្វើកញ្ច្រែង ឬចង្អេរនេះ គិតជាមធ្យមក្នុងមួយថ្ងៃអាចធ្វើបានតែមួយប៉ុណ្ណោះ ដែលអាចលក់ចេញបានក្នុងតម្លៃមួយៗ ៦ ពាន់រៀល ហើយតម្លៃនេះអាចចំណេញបានចន្លោះពី ១ ០០០ ទៅ ១ ៥០០ រៀលតែប៉ុណ្ណោះ ព្រោះវត្ថុធាតុ​ដើមមានឬស្សី ត្រូវទិញគេក្នុង១ដើមពី១ ម៉ឺន ទៅ ១៥ ០០០ រៀល ដើមរំពាក់ដែល​ត្រូវជាន់ក្តាប់​មាត់ចង្អេរកញ្ច្រែងក៏ត្រូវជួលម៉ូតូគេជិះទៅរកនៅទីឆ្ងាយៗ ឬត្រូវទិញពីផងគេដែរ។ ចំពោះមុខ​របរនេះរូបគាត់ក៏ដូចជាអ្នកស្រុកនៅ ក្នុងភូមិបាន​ចេះតៗគ្នាតាំងពីដូនតាមក ដោយនៅផ្ទះគ្មានមុខ​របរអ្វីធ្វើក៏ចេះតែនាំគ្នាធ្វើៗទៅកុំឲ្យទំនេរដៃទើបផ្ទៃបានឆ្អែត៕

អត្ថបទ៖ ឈៀងថារិទ្ធ