ព័ត៌មានជាតិ

ក្រៅពីលតឆា កម្ពុជាបង្កើនការផ្សព្វផ្សាយសក្តានុពលម្ហូបអាហារ ទាក់ទាញទេសចរអន្តរជាតិ

បានផុស

២ ខែ មុន

នៅ

ថ្ងៃពុធ ២៣ វិច្ឆិកា ២០២២

ដោយ

ក្រៅពីទេសចរណ៍វប្បធម៌ និងធម្មជាតិ កម្ពុជាកំពុងបង្កើនការផ្សព្វផ្សាយពីសក្តានុពលម្ហូបអាហារជាផ្នែកមួយដើម្បីទាក់ទាញភ្ញៀវទេសចរបរទេសមកកម្សាន្ត។

លោក គឹម សេរីរ័ត្ន ប្រធាននាយកដ្ឋានគ្រប់គ្រងសេវាកម្មស្នាក់នៅទេសចរណ៍ និងម្ហូបអាហារនៃក្រសួងទេសចរណ៍បានឲ្យដឹងថា កម្ពុជាកំពុងជំរុញការផ្សព្វផ្សាយពីម្ហូបអាហារខ្មែរជាផលិតផលសក្ដានុពលមួយ ដើម្បីទាក់ទាញភ្ញៀវទេសចរបរទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបន្តថា ដោយចាប់ផ្តើមពីនំបញ្ចុក ក្រសួងកំពុងបន្តផ្សព្វផ្សាយពីម្ហូបអាហារសក្តានុពលផ្សេងទៀត។ ក្រសួងបានធ្វើការជាមួយអាជីវកម្មវិស័យទេសចរណ៍ ជាម្ចាស់សណ្ឋាគារនិងរមណីយដ្ឋានកម្សាន្ត ដោយណែនាំឲ្យចូលរួមដាក់បង្ហាញម្ហូបខ្មែរឲ្យបានច្រើនជាងម្ហូបបរទេស។

កន្លងទៅដើម្បីចូលរួមផ្សព្វផ្សាយពីសក្តានុពលម្ហូបអាហារប្រទេសកម្ពុជា ក្រសួងទេសចរណ៍បានធ្វើស្ពតផ្សព្វផ្សាយ Taste Cambodia ដែលបានរំលេចម្ហូបអាហារនៅតាមតំបន់ទូទាំងប្រទេស។ ថ្មីៗនេះលតឆាខ្មែរបានជាប់ជាម្ហូបដែលទទួលស្គាល់លើឆាកអន្តរជាតិ ក្រោយវាយតម្លៃក្នុងចំណោមអាហារ ៥០ មុខ ពេញនិយមនៅតំបន់អាស៊ី។

លោក អាំង សុវណ្ណរ័ត្ន អគ្គនាយករងនៃអគ្គនាយកដ្ឋានអភិវឌ្ឍន៍ទេសចរណ៍ និងសហប្រតិបត្តិការអន្តរជាតិបានឲ្យដឹងថា ក្រៅវប្បធម៌និងធម្មជាតិ ម្ហូបអាហារក៏ជាផ្នែកមួយក្នុងការទាក់ទាញភ្ញៀវទេសចរ។

លោកបន្តថា ក្រសួងទេសចរណ៍គ្រោងបោះពុម្ភផ្សាយ «ផែនទីទេសចរណ៍ម្ហូបអាហារកម្ពុជា» ដែលបង្ហាញពីសក្តានុពលម្ហូបអាហារតាមតំបន់ក្នុងប្រទេសកម្ពុជា។

«ឆាប់ៗនេះក្រសួងនឹងបោះពុម្ភផ្សាយ «ផែនទីទេសចរណ៍ម្ហូបអាហារកម្ពុជា» ដែលមានបញ្ជាក់ពីម្ហូបអាហារនៅតាមខេត្តនិងតំបន់នានា។ ផែនទីទេសចរណ៍ម្ហូបអាហារកម្ពុជា នឹងបង្ហាញថានៅស្រុកខ្មែរ ខេត្តណាខ្លះមានសក្ដានុពលម្ហូបអាហារ ឧទាហរណ៍ថានៅបាត់ដំបងមានមីកូឡាជាដើម»។

ផែនទីទេសចរណ៍ម្ហូបអាហារមានរំលេចអំពីរូបភាព បញ្ជាក់ពីឈ្មោះម្ហូបអាហារ ប្រវត្តិ របៀបធ្វើ ងាយស្រួលក្នុងការឈ្វេងយល់ ពីព្រោះជូនកាលភ្ញៀវទេសចរបានភ្លក្សរសជាតិហើយ បើបានដឹងប្រវត្តិទៀតគឺពួកគេកាន់តែជក់ចិត្ត។

លោក គឹម សេរីរ័ត្ន បានឲ្យដឹងទៀតថា ថៃល្បីល្បាញលើអាហារតាមផ្លូវដែលមួយឆ្នាំៗទាក់ទាញទេសចរណ៍រាប់លាននាក់។ កម្ពុជាក៏ខិតខំផ្សព្វផ្សាយគោលដៅទេសចរណ៍កម្ពុជាជាគោលដៅម្ហូបអាហារ (Gastronomy) ដោយបានរៀបចំបង្កើតវិថីម្ហូបអាហារតាមខេត្តគោលដៅទេសចរណ៍ ជាផ្នែកមួយដែលចូលរួមផ្សព្វផ្សាយបង្កើនការចាប់អារម្មណ៍ពីម្ហូបខ្មែរតាមតំបន់៕