Nike ​ដំឡើងថ្លៃផលិតផលខ្លួនលើទីផ្សារអាមេរិក ដោយសារពន្ធ ត្រាំ

ក្រុមហ៊ុនផលិតស្បែកជើង និងសម្លៀកបំពាក់កីឡាអាមេរិក Nike នឹងដំឡើងតម្លៃលើស្បែកជើង សម្លៀកបំពាក់ និង​ផលិតផលជាច្រើន​មុខទៀតលើទីផ្សារសហរដ្ឋអាមេរិក ចាប់ផ្ដើមពីសប្ដាហ៍ក្រោយតទៅ ​ដោយសារតែក្ដីបារម្ភពី​ផលប៉ះពាល់លើប្រាក់ចំណេញនៃពន្ធគយរបស់ប្រធានាធិបតី ដូណាល់ ត្រាំ។ នេះបើតាមការចុះផ្សាយរបស់ទូរទស្សន៍ CNBC និងរ៉យទ័រ។

ក្រុមហ៊ុនប្រកាសកាលពីថ្ងៃពុធថា ​តម្លៃលើសម្លៀកបំពាក់ និងឧបករណ៍សម្រាប់មនុស្សពេញវ័យ នឹង​ដំឡើងចន្លោះពី ២-១០ ដុល្លារ ខណៈ​ផលិតផលដែលមាន​តម្លៃចន្លោះពី ១០០-១៥០ ដុល្លារ នឹង​ដំឡើងថ្លៃ ៥​ ដុល្លារ។

Nike បាននិយាយថា៖ «យើងវាយតម្លៃអាជីវកម្មរបស់យើងជាទៀងទាត់ និងធ្វើការកែតម្រូវតម្លៃជាផ្នែកមួយ​នៃផែនការតាមរដូវកាលរបស់យើង»។

តម្លៃស្បែកជើង ដែលមានតម្លៃលើសពី ១៥០ ដុល្លារ នឹង​ដំឡើង ១០ ដុល្លារ បន្ថែម ខណៈ​ផលិតផលតម្លៃក្រោម ១០០ ដុល្លារ ឬផលិតសម្រាប់កូនក្មេង នឹងមិនមាន​ដំឡើងនោះទេ។

គួរគូសបញ្ជាក់ថា Nike ពឹងផ្អែកលើផលិតកម្មនៅក្នុងប្រទេសចិន និងវៀតណាម។ លោក ត្រាំ ដាក់ពន្ធ ១៤៥ ភាគរយ លើទំនិញនាំចូលពីចិន ហើយកាលពីសប្ដាហ៍មុន បាន​ទម្លាក់មកត្រឹម ៣០ ភាគរយ ជាបណ្ដោះអាសន្នរយៈពេល ៩០ ថ្ងៃ។ លោកបានដាក់ពន្ធគយបដិការ ៤៦ ភាគរយ លើវៀតណាម ប៉ុន្តែអនុវត្តត្រឹម ១០ ភាគរយ សិន រហូតដល់ដើមខែកក្កដា។

កាលពីដើមខែនេះ ក្រុមហ៊ុន​សម្លៀកបំពាក់កីឡាអាឡឺម៉ង់ Puma ឯណោះវិញ បាននិយាយ​ថា ខ្លួនបានកាត់បន្ថយការនាំចេញពីប្រទេសចិនទៅកាន់សហរដ្ឋអាមេរិក ហើយអាចនឹង​បង្កើនតម្លៃផលិតផលរបស់ខ្លួននៅសហរដ្ឋអាមេរិកដោយសារតែពន្ធគយ។